ལེའུ་ལྔ་པ།
འཕུར་སྐྱོད་བྱེད་པའི་ཤོག་དྲིལ་གྱི་ཞལ་གཟིགས།
1 དེ་ནས་ཡང་ངས་མགོ་ཡར་བཀྱགས་ནས་བལྟས་པ་ན། འཕུར་སྐྱོད་བྱེད་པའི་ཤོག་དྲིལ་ཞིག་མཐོང་བྱུང་།
2 ཁོང་གིས་ང་ལ་འདི་སྐད་དུ། ཁྱོད་ཀྱིས་ཅི་ཞིག་མཐོང་ངམ་ཞེས་དྲིས་པ་ལ། བདག་གིས་ཁོང་ལ་ངས་འཕུར་སྐྱོད་བྱེད་པའི་ཤོག་དྲིལ་ཞིག་མཐོང་སྟེ། དེའི་རིང་ཚད་ལ་ཁྲུ་ཉི་ཤུ་དང་ཞེང་ལ་ཁྲུ་བཅུ་འདུག་ཅེས་ཞུས་པ་དང་།
3 ཁོང་གིས་ང་ལ་འདི་སྐད་དུ། འདི་ནི་ས་གཞི་ཡོངས་ལ་བཏབ་པའི་དམོད་མོ་ཡིན་ཏེ། རྐུ་བྱེད་མཁན་ཐམས་ཅད་ཤོག་དྲིལ་གྱི་ཕྱོགས་གཅིག་ལ་བཀོད་པ་བཞིན་ཡུལ་འདི་ནས་ཚར་དུ་གཅོད་པར་འགྱུར་ལ། མནའ་རྫུན་མ་སྐྱེལ་མཁན་ཐམས་ཅད་ཤོག་དྲིལ་གྱི་ཕྱོགས་ཅིག་ཤོས་སུ་བཀོད་པ་བཞིན་ཡུལ་འདི་ནས་ཚར་དུ་གཅོད་པར་འགྱུར་རོ། །
4 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ངས་ཤོག་དྲིལ་འདི་ཕྱི་རུ་མངགས་ཏེ། རྐུ་བྱེད་མཁན་གྱི་ཁྱིམ་དང་ངའི་མིང་བརྗོད་ནས་མནའ་རྫུན་མ་སྐྱེལ་མཁན་གྱི་ཁྱིམ་ནང་དུ་སོང་ནས། ཤོག་དྲིལ་ནི་དེའི་ཁྱིམ་དུ་ལུས་པར་འགྱུར་ལ། དེའི་ཁྱིམ་ནང་གི་ཤིང་ཆ་དང་རྡོ་རྣམས་རྩ་བ་ནས་བརླག་པར་འགྱུར་ཞེས་གསུངས། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་གསུངས་ཞེས་གསུངས་སོ། །
རྫ་བུམ་ནང་གི་བུད་མེད་ཀྱི་ཞལ་གཟིགས།
5 བདག་ལ་གསུང་གནང་བའི་ཕོ་ཉ་དེ་ཕྱི་རུ་ཐོན་ནས་ང་ལ་འདི་སྐད་དུ། ཁྱོད་ཀྱིས་མགོ་ཡར་བཀྱགས་ནས་ལྟོས་ཤིག ཕྱི་རུ་ཐོན་པ་དེ་ཅི་ཡིན་པར་ལྟོས་ཤིག་ཅེས་གསུངས་བྱུང་།
6 དེར་བདག་གིས་འདི་ནི་ཅི་ཡིན་ནམ་ཞེས་ཞུས་པ་ན། ཁོང་གིས་ལན་དུ་འདི་སྐད་དུ། ཕྱི་རུ་ཐོན་པ་འདི་ནི་རྫ་བུམ་ཞིག་ཡིན་ཞེས་གསུངས་པ་དང་། ཡང་ཁོང་གིས་འདི་སྐད་དུ། འདི་ནི་དེ་དག་གི་ས་གཞི་ཡོངས་ཀྱི་སྡིག་པའི་དཔེ་ལྟ་བུ་ཡིན་ཞེས་གསུངས་སོ། །
7 ལྟོས་དང་། རྫ་བུམ་གྱི་ཞ་ཉེའི་ཁ་གཅོད་ཟླུམ་པོ་ཕྱེས་པ་ལ། བུད་མེད་ཅིག་རྫ་བུམ་ནང་དུ་བསྡད་འདུག
8 ཕོ་ཉ་དེས་འདི་སྐད་དུ། འདི་ནི་སྡིག་པ་ཡིན་ཞེས་གསུངས་པ་དང་། དེ་ནས་ཁོང་གིས་བུད་མེད་དེ་རྫ་བུམ་ནང་དུ་འཕངས་ཏེ། ཡང་ཞ་ཉེའི་ཁ་གཅོད་དེ་རྫ་བུམ་གྱི་ཁ་རུ་གཡུགས་སོ། །
9 ཡང་ངས་མགོ་ཡར་བཀྱགས་ནས་བལྟས་པ་ན། བུད་མེད་གཉིས་ཕྱི་རུ་ཐོན་པ་མཐོང་སྟེ། ཁོ་མོ་གཉིས་ལ་གཤོག་པ་ཡོད་པ་དང་། དེ་ནི་ཁྲུང་ཁྲུང་གི་གཤོག་པ་དང་འདྲ་ཞིང་གཤོག་པའི་འོག་ཏུ་རླུང་ཡོད་དེ། ཁོ་མོ་གཉིས་ཀྱིས་རྫ་བུམ་དེ་ཡར་གནམ་ས་གཉིས་ཀྱི་བར་དུ་བཀྱགས་སོ། །
10 དེ་ནས་བདག་གིས་ང་ལ་གསུང་གནང་བའི་ཕོ་ཉ་དེ་ལ་འདི་ལྟར། ཁོ་མོ་གཉིས་ཀྱིས་རྫ་བུམ་གང་དུ་འཁྱེར་རམ་ཞེས་ཞུས་པ་ན།
11 ཁོང་གིས་ང་ལ་འདི་སྐད་དུ། ཤིན་ཨར་ དུ་རྫ་བུམ་ལ་ཁང་པ་ཞིག་བརྩིག་དགོས་པ་དང་། ཁང་པ་གྲ་སྒྲིག་བྱས་ཚར་རྗེས་གནས་དེ་རུ་རྫ་བུམ་སྔར་གནས་སུ་འཇོག་པར་འགྱུར་ཞེས་གསུངས་སོ། །