ལེའུ་བདུན་པ།
སྨྱུང་གནས་སྲུང་བའི་སྐོར།
1 དེ་ནས་རྒྱལ་པོ་དར་ཡཱའི་ལོ་བཞི་པའི་ཟླ་དགུ་པ་སྟེ། གེ་སཱི་ལེ་ཟླ་བ་ཞེས་བྱ་བའི་ཚེས་བཞི་ཉིན་དཀོན་མཆོག་ཡ་ཝཱེའི་བཀའ་ནི་ཟཱ་ཀར་ཡ་ལ་བྱུང་བ་དང་།
2 དུས་དེར་པེད་ཨེལ་པས་ཤར་ཨེ་ཟེར་དང་། རེ་གེམ་མེ་ལེག་དང་དེའི་རྗེས་འབྲང་པ་རྣམས་ནི་དཀོན་མཆོག་ཡ་ཝཱེས་དྲིན་གྱིས་བསྐྱང་ཕྱིར་ཁོང་ལ་ཞུ་བར་མངགས་ཤིང་།
3 དེ་དག་གིས་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཆོད་ཁང་ནང་གི་མཆོད་དཔོན་རྣམས་དང་ལུང་སྟོན་པ་རྣམས་ལ་འདི་ལྟར། ངེད་ཅག་གིས་ད་དུང་ལོ་ངོ་མང་པོའི་རིང་ལ་བྱས་པ་བཞིན་ཟླ་ལྔ་པར་མྱ་ངན་བྱས་ཏེ་སྨྱུང་གནས་བསྲུང་དགོས་སམ་ཞེས་དྲིས་པ་ལ།
4 དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་བཀའ་ནི་ང་ལ་བྱུང་ནས་འདི་སྐད་དུ།
5 ཁྱོད་ཀྱིས་ཡུལ་འདིའི་མི་ཐམས་ཅད་དང་མཆོད་དཔོན་རྣམས་ལ་འདི་ལྟར་སྨྲོས་ཤིག ལོ་བདུན་ཅུའི་རིང་ལ་ཁྱོད་རྣམས་ཀྱིས་ཟླ་ལྔ་པ་དང་ཟླ་བདུན་པའི་ནང་དུ་མྱ་ངན་བྱས་ཏེ་སྨྱུང་གནས་བསྲུངས་པ་དང་། དེ་ནི་དངོས་གནས་ངའི་ཆེད་དུ་སྨྱུང་གནས་བསྲུངས་པ་ཡིན་ནམ།
6 ཁྱོད་རྣམས་ཀྱིས་ཟ་ཞིང་འཐུང་བ་ནི་རང་གི་ཕྱིར་དུ་ཟ་བ་དང་རང་གི་ཕྱིར་དུ་འཐུང་བ་མ་ཡིན་ནམ།
7 གཏམ་འདི་དག་ནི་དཀོན་མཆོག་ཡ་ཝཱེས་སྔར་ལུང་སྟོན་པ་རྣམས་བརྒྱུད་ནས་བསྒྲགས་པ་མ་ཡིན་ནམ། དུས་དེར། ཡེ་རུ་སཱ་ལེམ་དང་མཐའ་འཁོར་གྱི་གྲོང་ཁྱེར་རྣམས་སུ་འདུག་མཁན་ཡོད་ཅིང་ཤིན་ཏུ་དར་བ་དང་། ནེ་གུབ་ཡུལ་དང་རི་ཀླུང་དུ་ཡང་འདུག་མཁན་ཡོད་དོ་ཞེས་པའོ་ཞེས་གསུངས་སོ། །
8 ཡང་དཀོན་མཆོག་ཡ་ཝཱེའི་བཀའ་ནི་ཟཱ་ཀར་ཡ་ལ་བྱུང་ནས་འདི་སྐད་དུ།
9 དཔུང་ཚོགས་ཀུན་གྱི་དཀོན་མཆོག་ཡ་ཝཱེས་སྔར་ཁྱོད་ཅག་གི་མེས་པོ་རྣམས་ལ་འདི་སྐད་དུ། ཁྱོད་རྣམས་ཀྱིས་ཁྲིམས་དྲང་པོར་སྤྱོད་ཅིག མི་རེ་རེས་བྱམས་དང་སྙིང་རྗེའི་སྒོ་ནས་རང་གི་སྤུན་ཟླ་སྐྱོངས་ཤིག
10 ཡུགས་མོ་དང་དྭ་ཕྲུག བྱེས་པ། དབུལ་པོ་བཅས་སུ་ཡིན་ཡང་ཁྱོད་རྣམས་ཀྱིས་དེར་གཉའ་གནོན་བྱེད་མི་རུང་ལ། སོ་སོའི་སེམས་སུ་རང་གི་སྤུན་ཟླ་སུ་ཞིག་ལའང་གནོད་འཚེ་གཏོང་བའི་ལྐོག་ཇུས་བཤམ་མི་རུང་ཞེས་གསུངས་སོ། །
11 ཡིན་ནའང་དེ་དག་གིས་མ་མཉན་པར་མ་ཟད་ད་དུང་གཉའ་རེངས་བྱས་ཏེ། རྣ་བ་བཀབ་ནས་མ་མཉན་པ་དང་།
12 དེ་དག་གིས་རང་གི་སེམས་རྒྱུད་ནི་མེ་རྡོ་ལྟར་མཁྲེགས་པོ་བྱས་ཤིང་། བཀའ་ཁྲིམས་དང་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་ཉིད་ཀྱི་ཐུགས་ཉིད་དང་སྔོན་མའི་ལུང་སྟོན་པ་རྣམས་བརྒྱུད་ནས་གསུངས་པའི་བཀའ་ལ་མ་མཉན་པས། དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ཐུགས་རབ་ཏུ་ཁྲོས་པའོ། །
13 སྔར་ངས་དེ་རྣམས་བོས་ཀྱང་ཁོ་ཚོས་མ་མཉན་པ་བཞིན་དུ། མ་འོངས་པར་དེ་དག་གིས་ང་འབོད་དུས་ངས་ཀྱང་མཉན་པར་མི་བྱའོ་ཞེས་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་གསུངས་སོ། །
14 ངས་རླུང་འཚུབ་ཀྱིས་དེ་རྣམས་ནི་ཁོ་ཚོས་ངོ་མི་ཤེས་པའི་ཡུལ་ཁམས་ཀུན་ཏུ་གཏོར་ཞིང་། དེ་དག་ཤུལ་གྱི་ཡུལ་ནི་མི་མེད་ལུང་སྟོང་དུ་གྱུར་ཏེ། ཐ་ན་ཡུལ་དེ་བརྒྱུད་ནས་འགྲོ་འོང་བྱེད་མཁན་ཡང་མེད་དོ། །ཅིའི་ཕྱིར་ཞེ་ན། དེ་དག་གིས་ཡིད་དུ་འོང་བའི་ཡུལ་དེ་མི་མེད་ལུང་སྟོང་དུ་བསྒྱུར་བས་སོ་ཞེས་གསུངས་སོ། །