3
1-2 Jesus Cristo jewodure pugeje dukeje ruture baruto boe eimijera kurireuwo ema. Dukodire mugure baru tada to ira keje Pao Kurireu ukana pemegareu jagwai. Tagire ča tameartorure Jesus Cristoji dukodire tare nono jewodureuge emogadure. Mare taewodu ji karega inagoino. Tare tagera ra taro pegareu piji. Tameardae pemegare taro pemegawo nono Jesus Cristo meardae mogadure. Dujire inagoino. Dukodire imode tawie. Tameardae pemegado tu baru tadawu Jesus meardae mogadure taro pemegawo nono Jesus meardaeji. Tameardaekaba awu woewu moto kejewuge emeardae mogadure. Tameardaewo tu baru tadawu Jesus meardae pemegareuji.
3 Mare paga karega. Tawire nou taro pegareu piji. Mare tawi ji karega inagoino. Tameardae maiwure tawo tagera ra taro pegareu piji tameardaewo tu baru tadaboe bagai. Dujire inagoino. Mare meartorukare Jesus jiwuge erduwakare raga kaba kodiba taroino. Erduwakare Jesusji dukodire erduwakare raga nuba boemode tai baru tada. Jesus rakojere Pao Kurireu apo. Dukodire erduwakare raga Pao Kurireu meardaeji.
4 Mare Jesus Cristo utugarege nure tagi. Tameartorure ji rugadu. Ure tamugu pemegado Pao Kurireu apo. Dukodire Jesus Cristo aregodumode baru piji mato moto ka pugeje dukeje boe eiamedu boe erdumode ji. Taragojemode apo jamedu tameartorure ji kodi. Nono boe erdumode tai jamedu boe pemegare tai duji rugadu. Tamode nono Jesus mogadure rugadu. Boe pemegamode tai rugadu. Nono boe erduwamode rugadu tamugu pemegare Pao Kurireu apo duji rugadu.
Boe Ero Pegareu Reo. Boe Ero Maiwu Reo.
5 Tagera ra tawodure tabowu tameardae pegareu piji. Boe eiamedu boe ewodure tumeardae pegareu meture tudada dutabo. Dukodire emeardaere tu turo pegawo. Emeardaere tieribariwo tumugukare apowugei tu je. Emeardaere tieribari kigoduwo aremei. Ekare tuwia ra areme epiji. Areme jamedu emeardaere tuwo tumagu ime etai tu tu je. Emeardaere tieribari kigoduwo imei jamedu. Ekare tuwia ra ime epiji jamedu. Moto kejewuge ime areme etaidure tu turo pegawo rugadu. Enogwa kidure tu pudai tuwo toe kurido tumedage epiji. (Boe enogwa kidure tu pudai du aino erore nono meartorure tuwari santo dogeiwuge ero mogadure.) Pagare eroino.
6 Pao Kurireu jordu pegare eroino duji. Dukodire umode boe pegado ei rugadu nou eroino du moriče.
7 Ainore tarore marigudu. Tameardaere tu taro pegawo nono moto kejewuge ero mogadure jamedu. Taroiwakare tawo tagera ra piji. Mare aino čare tameartorure Jesusji.
8 Dukodi čare tarokaba aino pugeje. Tagorigodukaba boei. Tardu pegakaba boei. Tagaba taro pegado boei. Tamago pegakaba boe eroji. Tawadaru pegareu barigu tabiji.
9 Tawadrarodukaba boe ewiagai. Tameartorure Jesusji dukodire tare tagera ra nou taro pegareu jamedu boe piji rugadu. Marigudu taro pegareu meture tagaora tada tameardaekawo ia boe emeardae pemegareuji. Mare aino taromodukare ji pugeje.
10 Tare tageragu Jesus ure maku tagaiwu taro maiwuji. Pao Kurireu unure tado nono tumogadure gu gu je. Emare ure boe jamedu boe towuje. Emare unure taro udo nono turo mogadure gu gu je. Dukodire umode tarduwado pudui rugadu.
11 Meartorure Jesus jiwuge eiamedu boe ere nono pumogadure Pao Kurireu jakai. Meardae pemegare eiamedu boei. Dukodire Judeu doge emode nono boe tuginaiwuge emogadure. Ero umode tuginai pubiji mare Pao Kurireu jakai ere nono pumogadure. Boe emeartorumode Jesusji dukeje emode nono meartorure Jesus jiwuge brae emogadure Pao Kurireu jakai. Kaiamo doge emeartorumode Jesusji dukeje emode nono meartorure Jesus jiwuge boe emogadure Pao Kurireu jakai. Boe etugarege emeartorumode Jesusji dukeje emode nono meartorure Jesus jiwuge boe eimijerage emogadure jamedu. Jesus Cristo kurire moto kejeboe jamedu boe kori, baru tadaboe jamedu boe kori. Tu Jesus Cristo jire boe emeartorumode tiamedu boe tabo. Jesus rakojere meartorure puduiwuge eiamedu boe ebo jamedu.
12 Čare Pao Kurireu uwobe nure tagi. Emare meardu kurire tai. Ure tugeragu tai tuwo taro udo tuginai nono tumeardaeji tarokawo tameardae pegareuji pugeje taro pemegawo tu je. Dukodire tageragu Pao Kurireu ro pemegareuji tarowo ji. Tagogududo boebo. Taro pemegado boei. Tagaba boe remawugedo tagi mare boe utugaregedo tagi. Taro pega kaba boei. Taro butugudo boei.
13 Tagorigodukaba boei. Tamedage ero pegamode tai mare taro pegakaba ei ero pegareu moriče. Tawiagodudo nou ero pegare tai dupiji. Pagimijera biagodure taro pegareu piji rugadu. Dukodi čare tarodo nono awu Pagimijera Jesus rore tai dumogadure taro pegakawo tamedagei ero pegare tai du moriče.
14 Nono tameardu kurido boei. Tameardu kurimode boei dukeje taro pemegamode awu inagoino boe ero pemegareuji rugadu. Boe emeardu kurimode pui dukeje boe pemegamode ei rugadu. Emeardaemode pumeardaeji. Emeardaemodukare toro ia boe emeardaeji pubiji.
15 Tamode tameardae pemegareu tawuje dukeje Jesus Cristo umode tamororamagadu akedudo tabiji tameardae kuriwo Pao Kurireuji rugadu. Nono tarduwamode rugadu tare tameardae pemegareu tawuje rugadu. Pao Kurireu makore tawagai tameartoruwo pudui rugadu dukodire ure tamororamagadu akedudo rugadu. Nono ure tado nono tuwobe emogadure taedu pemegawo pudabo taedu pemegawo puapo jamedu. Dukodire Pao Kurireu uwobe nure tagi rugadu. Dukodi čare imode tawie. Tagimadudo Pao Kurireu apo rugadu rore aino tai duji.
16 Jesus Cristo jiwu bakaru ure turugadu. Kurire rugadu. Tameartorudo ji rugadu. Tarduwado ji rugadu. Nono tawo pu jorduwado awu Jesus bataruji rugadu boe ewo turo pemegado jamedu. Nono taragodudo Jesus bataruji jamedu. Tawo roia ta Pao Kurireu bataru tabo. Taragodudo Pao Kurireu bataru tabo Pao Kurireu biagai taegarere tai dutabo.
17 Taegaredo tai Jesus rore tai jiboeji tagimadu tabo Pao Kurireu biagai. Taro jamedu boe pemegado boei Jesus ie tabo nono Pagimijera Jesus ro mogadure. Tawadaru jamedu boe pemegado boei Jesus ie tabo nono Pagimijera Jesus bataru mogadure jamedu.
Meartorure Jesus Jiwuge Ero Maiwu Reo
18 Aremeire imagore. Tameartorudo tagogei. Ainore meartorure Jesus jiwuge areme erore.
19 Imeire imagore jamedu. Tameardu kurido tawirei. Tamago rakakaba ei.
20 Boe etore eire imagore. Tameartorudo taomagei tajemagei tu tu je taro jamedu boe tabo. Ainore meartorure Jesus jiwuge erore. Tameartorumode taomagei tajemagei dukeje tamode Pao Kurireu jakaredo pudui tarore aino duji.
21 Boe etuo mage eire imagore jamedu. Tagaba tagore ekorigo. Tamode ekorigo dukeje ekiarigodumode rugadu.
22 Boe etugarege eire imagore. Tameartorudo tagimijeragei tu tu je taro jamedu boe tabo. Etaiwomode taroji dukeje tameartorumode emagore jiboeji tawo egaredo taroji. Mare eragojemodukare tagabo taiwowo taroji mare du inodu tabo tameartorudo emagore jiboeji rugadu. Mare paga karega. Tameardaere tameartoruwo Pagimijera Jesusji. Emare aidure tameartoruwo tagimijeragei tu tu je.
23 Tamaragodudo taraga tabo taro jamedu boeji. Tamaragodae udo nono Pagimijera Jesus maragodae mogadure tamaragodu pemegawo rugadu.
24 Pagimijera Jesus umode iaboe pemegareu maku meartorure puduiwuge etai ero pemegareu moriče rugadu. Jesus Cristo utugarege nure tagi. Tagimijera Remawu nure ema.
25 Mare umode boe pegado ro pegareugei ero pegareu moriče. Boe remawu tabore Pao Kurireu meardaere boe eiamedu boei. Umodukare tuiordae tumeardae tawujedu pagado boei.