2
Ainore Nou Ro Pegareu Umode
1-2 Ia boe emagonure Pagimijera Jesus Cristo aregoduie marigudu. Pagare egoino. Etaidure tuwo tarduwa bokwado. Etaidure tuwo tagaora pegado. Čegi čemagokare aino atugoreboeto. Nouia inodukare tudawuje čeiabiji rugadu. Ča imedage nure tagi. Imire imode tarduwa pemegado Jesus aregodumode kejewu meriji, umode parego tudogi du ka.
3 Tameartorukaba ia bataruji. Jesus aregodumodukare jii boe erduwamode Ro Pegareu Remawu jitu ka. Boe erduwamode ji dukeje Jesus aregodumode. Mare paga karega. Boe emode turagado pudui tuwo taekiripagado, tuwo tumeartoru bokwado Pao Kurireuji. Čare boe emode boe emeartoru bokwado Pao Kurireuji dukeje boe erduwamode Ro Pegareu Remawuji. Nou Ro Pegareu Remawu meartoru bokwamode rugadu. Pao Kurireu ure boe ewie marigudu nuba turomode nou Ro Pegareu Remawuji, tumoduie barigu bope doge eda kejewu joru pegareuto rugadu. Nou bataru jetumode pudui rugadu
4 Mare nou Ro Pegareu Remawu aidumode tuwo boe emeartorudo pudui boe eiamedu boe piji. Umode tumugudo Pao Kurireu uwai tada. Makomode Pao Kurireu nuie pudumi. Mare Pao Kurireu umode barigu boe pegareuto rugadu.
5 Tawiabutudo iwadaru keje. Iragojere tagabo dukeje ire tawie nou inoduji.
6 Mare nou Ro Pegareu Remawu aregodukare raga. Pao Kurireu aidukare aregoduwo tu aino jao. Tarduware nou inoduji. Mare Pao Kurireu aidumode dukeje nou Ro Pegareu Remawu aregodumode.
7 Boe erore marigudu nou Ro Pegareu Remawu roji. Mare nou Ro Pegareu Remawu aregodumode dukeje umode turo to rugadu. Mare ia boe ekedure ji aregodukawo kuri aino. Mare nou iedure jiwu tawujedumode piji dukeje Ro Pegareu Remawu umode turo to rugadu.
8 Aino boe eiamedu boe erduwamode Ro Pegareu Remawuji. Mare Pagimijera Jesus aregodumode dukeje umode nou Ro Pegareu Remawu bito togwamudu tabo. Joru urugureu tabore romode ji jamedu.
9-10 Nou Ro Pegareu Remawu aregodumode bope doge eimijera Satanás raka tabo. Ro rakamode mare ro raka remawu modukare. Romode aino tuwo ia boe ekiripagado. Emeartorukare Pao Kurireuji dukodire nou Ro Pegareu Remawu ure ekiripagado tuwo emeartorudo pudui. Nono meartorure nou Ro Pegareu Remawu jiwuge etagedumode rugadu. Emeartorukare boe remawuji dukodi. Etaidukare boe remawuji rugadu. Dukodire Pao Kurireu umodukare edo činorudo.
11 Pao Kurireu umode edo tuwuredo nou emeardae pegareu keje. Nou emeardae pegareu koiare umode emeartorudo batrarodureuji.
12 Aino Pao Kurireu umode meartorukare boe remawu jiwuge ewarigu boe pegareuto. Emeartorukare boe remawuji tiegarewo nou turo pegareuji.
Pao Kurireu Ure Tugeragu Iagei Tuwo Edo Činorudo
13 Čemedage nure tagi. Čegimadure Pao Kurireu apo meri jameduji tabaru tabo. Pao Kurireu meardu kurire tai rugadu. Tagi tameartorure boe remawuji dukodire ure tugeragu tai tuwo taginorudo Tuwari raka tabo tuwo taro pemegado, tuwo tameardae udo tuginai nou tameardae pegareu piji. Ure tuginorudowuge boetojiwuge nure tagi.
14 Čere tawie Jesus bataru pemegareuji. Dutabore čare Pao Kurireu makore tawagai tamuguwo Pagimijera Jesus Cristo apo toro o boe pemegareu keje.
15 Dukodire tagaba tagera ra Pao Kurireu piji. Čemedage nure tagi. Tameartorudo čere tarduwado jiwu boe jokodureu bataruji. Čere tawie čemago tabo, atugoreboe tabo jamedu.
16-17 Ča Pagimijera Jesus Cristo, Pao Kurireu ewo tameartoru rakado jii toro rugadu taro pemegawo, tamago pemegawo rugadu. Pao Kurireu meardu kurire pai rugadu. Dukodire ure turo pemegareu maku pagai tuwo paragado, nou paraga akedukawo jii toro rugadu. Aino parduware aregodumode rugadu duji.