☰ Mateus 1
Mateus
Ure Awu Jesus Rore Jiboe Makore Jiboe Bu Bapera Keje
1
Jesus Uwobe Reo
1 Ainore Jesus Cristo uwobe ekiere. Mariguduwuge uwobe etumana iere Davi.* Mariguduwuge uwobe etuo iere Abraão. 2 Abraão onaregedu imedu iere Isaque. Isaque onaregedu imedu iere Jacó.† Jacó ore ime emagare. Ia iere Judá. 3 Judá onaregedu imedu iere Peres. Ia onaregedu imedu iere Zera. Nou Peres, nou Zera etuje iere Tamar. Peres onaregedu imedu iere Esrom. Esrom onaregedu imedu iere Arão. 4 Arão onaregedu imedu iere Aminadabe. Aminadabe onaregedu imedu iere Nasom. Nasom onaregedu imedu iere Salmom. 5 Salmom onaregedu imedu iere Boaz. Nou Boaz uče iere Raabe. Boaz onaregedu imedu iere Obede. Nou Obede uče iere Rute. Obede onaregedu imedu iere Jessé. 6 Jessé onaregedu imedu iere Davi. Boe eimijera kurireu nure ema. Nou Davi ure tugeragu Urias oredujeji toreduječe. Etonaregedu imedure. Iere Salomão. 7 Salomão onaregedu imedu iere Roboão. Roboão onaregedu imedu iere Abias. Abias onaregedu imedu iere Asa. 8 Asa onaregedu imedu iere Josafá. Josafá onaregedu imedu iere Jorão. Jorão onaregedu imedu iere Uzias. 9 Uzias onaregedu imedu iere Jotão. Jotão onaregedu iere Acaz. Acaz onaregedu imedu iere Ezequias. 10 Ezequias onaregedu imedu iere Manassés. Manassés onaregedu imedu iere Amom. Amom onaregedu imedu iere Josias. 11 Josias onaregedu imedu iere Jeconias. Jeconias uwiemagere jamedu. Nou Josias ore ime edu kimore Judá moto keje dukeje Babilônia kejewuge tugobaigarege ere tugeragu Judá kejewugei turaga tabo tuduwo ebo toro to moto Babilônia moto ka.‡ 12 Babilônia kejewuge ere Judá kejewuge erego Babilônia moto ka dukeje nou Jeconias onaregedu imedure. Ure iedo Salatiel. Nou Salatiel onaregedu imedu iere Zorobabel. 13 Zorobabel onaregedu imedu iere Abiúde. Abiúde onaregedu imedu iere Eliaquim. Eliaquim onaregedu imedu iere Azor. 14 Azor onaregedu imedu iere Sadoque. Sadoque onaregedu imedu iere Aquim. Aquim onaregedu imedu iere Eliúde. 15 Eliúde onaregedu imedu iere Eleazar. Eleazar onaregedu imedu iere Matã. Matã onaregedu imedu iere Jacó. 16 Jacó onaregedu imedu iere José. Nou José oreduje iere Maria. Nou Maria onaregedure Jesus rema. Nou Jesus iere Pao Kurireu ure boe ekinorudowu nure ema. Ainore Jesus iere.
17 Ainore Jesus uwobe imere. Abraão pijire boe ere catorze jii Davi boture du ka.§ Davi pijire boe ere catorze pugeje jii Babilônia kejewuge ere Judá moto kejewuge etawuje du ka. Judá kejewuge edure Babilônia moto keje du pijire boe ere catorze pugeje jii nou Jesus boture du ka.
Jesus Cristo Boture
18 Ainore Jesus Cristo boture. Uče Maria ure tuwadaru maku boe etai tumugumoduie imedu José apo rugadu. Mare emugukare puapo raga. Eribarikare pui raga. Nogwaredu jeribarikareudo nure nou Mariače rugadu. Mare Maria kuiarure. Pao Kurireu Uwari koiare Maria kuiarure. 19 José jorduwagodure nou tumugumode apowu aredu kuiarure duji. Imedu pemegareu nure Joseče rugadu. Jorduwakare kaba kodiba Maria kuiarure dukodire aidukare tumuguwo apo pugeje. Mare aidukare tuwo Maria pogurudo boe egai. Dukodire ukare boe ewie. Ure tumeardae tawuje tumagowo tu Mariaji tumugumodukaie apo pugeje. 20 Nou José ure nou tumeardae tawuje dukeje ia boečoji uniaure. Nou uniau tada ia Pao Kurireu utugare baru tadawu aregodure José ae. Makore José ieji. Akore: – José. Davi onaregedu nure aki. Apagudukaba amuguwo Maria apo rugadu. Reko awai ka amuguwo apo rugadu. Kuiarure mare jeribarikare ia imeduji. Pao Kurireu Uwari koiare ure kuiarudo. 21 Onaregedu imedumode rugadu. Emare umode boe ekinorudo ewarigudukawo bope doge eda kejewu joruto ero pegareu moriče pugeje. Dukodire tamode iedo Jesus.
Ainore nou Pao Kurireu utugare baru tadawu akore Joseji. 22-23 Marigudu Pao Kurireu makore ia imeduji tuwo boe ewie ainore boemoduie duji. Akore: – Nogwaredu jeribarikareudo kuiarumode. Onaregedu imedu mode. Emode iedo Emanuel*.
Ainore Pao Kurireu akore marigudu. Aino ča nou Pao Kurireu bataru jeture pudui rugadu. (Nou boe egore “Emanuel” aino tuwadaru tabo. Pawadaru tabo pamagore Pao Kurireu Mugure Pagabo.)
24 Nono čare José jetadure. Meartorure nou Pao Kurireu makore pudui duji rugadu. Ure Maria reko tuwai ka tumuguwo apo rugadu. 25 Mare jeribarikare nou Mariaji jii toro nou Maria kuri buture du ka. Ča Maria kuri buture rugadu. Imedu rugadu. José ure iedo Jesus rugadu.
* 1:1 Mariguduwuge Israel doge eimijera kurireu nure Daviče. Nou mariguduwuge boe eimijerage ewimode dukeje etonaregedu mugumode tumuga keje. Aino čare awu bataru ure parduwado Davi uwobe nure Jesusče rugadu. Dukodire boe eimijera kurireu nure Jesusče rugadu Davi mugato. Nou boe eimijera kurireu bagaire nou Israel doge epagare marigudu. Mare paga karega. Pao Kurireu ure Israel doge ewie marigudu. Pao Kurireu jakarere nou Davi rore jiboeji dukodire ure Davi bie rugadu tumoduie ia Davi uwobe mugudo boe eimijera kurireu mugato Israel doge eimijera kurireuče rugadu. Du akedumodukare rugadu jii toro rugadu. Nou bataru padure 2 Samuel 7.12-13 keje. † 1:2 Nou Jacó ore ime ere doze. Nou ore ime ekie tabore nou boe doge egore to clã dogei. Nono Pao Kurireu ure awu Jacó iedo Israel. Nou bataru padure Gênesis 32.28 keje. Dukodire nou uwobe ekiere Israel doge aino marigudu. Jesus boture dukeje Israel doge ekiekare Israel doge pugeje. Ekiere Judeu doge aino. 1948 joru keje Nações Unidas ure tuwadaru maku Judeu doge etai eno moto moduie pugeje nono Palestina moto keje. Dukodire čare Israel doge eno motore. Iere Israel aino. Dukodire nou boe ekiere Israel doge aino pugeje. Mare ekiere Judeu doge kimo jamedu. ‡ 1:11 Babilônia moto kejewuge tugobaigarege etaregodure Judá moto ka turugoduwo Judá kejewugei. Turaga tabo ere tugeragu Judá kejewugei rugadu. Ere Judá kejewuge etawuje eno moto piji turaga tabo tuduwo ebo to moto ka tuwo emaragodu rakado pudai nono to moto keje. Jorumode mais ou menos 590 eroino dupiji jii Jesus boture du ka. § 1:17 Brae egore geração aino awuji. Abraão pijire geração ure 14 jii Davi boture du ka. Abraão piji Jacó boture du ka geração ure pobe. Abraão pijire Peres ka geração ure quatro. Dujire brae egore geração aino. * 1:22-23 Awu bataru padure Isaías 7.14 keje.
☰