Ⅷ
Yesu Nyɛ́ Boe Ɔsɔfɔnɔkɔɛ̃ Flee.
Ⅰ Kalɛ titiliwu nɛ fɔlɛtsa a kĩ bɔlamɛna kalɛ a kamɛ nyɛ kĩ budeĩ Ɔsɔfɔnɔkɔɛ̃ Flee kĩĩ odu, kĩ edzi nɛ Obu Lɛgã Kpale lɛgãkpo a sɔmɔna nɛ ode.
Ⅱ Yasum ndɛ ɔsɔfɔnɔkɔɛ̃ aye nɛ Kakɔ Kpalɛwa Flee a kĩ kɛnyɛ lima patampa wĩ a kamɛ, kĩ nnɛ́ otidziwa lɛbɔa de, mbom boe Ɔlate a lɛbɔa de.
Ⅲ Badzina ɔsɔfɔnɔkɔɛ̃ flee kamɛ odi nyɛ odi kĩ ɛkɔa afɔliɛ fɔtsa ɛkpa Baguma ɛbɔa afɔliɛ lɛmɛ, foesũ kɛnɛ kĩ Ɔsɔfɔnɔkɔɛ̃ Flee kĩĩ lɛmɛ ɛna afɔliɛ litsedi ɛkpa Baguma.
Ⅳ Ade ntɛ tite akũ edzi ni, kufɛ ɛláanya ɔsɔfɔ kɔlaa, kitonɛkĩ basɔfɔ a kĩ be akɔa futetsa kakpa Baguma nɛ Yudafɔ mbla a onukpɛ̃ a deĩ kɔkɔɛ.
Ⅴ Adzuma kĩ bakɛna ndɛ basɔfɔ aye nɛ kasumkɔ̃ la ndɛ fukĩ fudeĩ nɛ ode a kuyo odi.
Ade foesũ kĩ Mose aabɔa Lima Patampa Kpalɛwa a ni, Baguma bi ye kĩ, “Dã kĩ ɔkɛna nɛ lɛtsa nyɛ lɛtsa a kĩ bɛtsa nɔ nɛ ɔtɔ akũ a onukpɛ̃.”
Ⅵ Lɛmɛ finyaa Baguma kpa Yesu ɔsɔfɔ adzuma kĩ ɛnɛnɛ ɛbɛ̃ basɔfɔ a tide kɔlaa, ndɛ ayekĩ apam a kĩ ɛkɛna nɛ Baguma mɔ ye bati kayite a nɛnɛ ɛbɛ̃ a, kitonɛkĩ bɛkɛna ye nɛ bɔhɛ a kĩ ɛnɛnɛ ɛbɛ̃ a akũ.
Ⅶ Ntɛ mfumsu adima ɛtana nɛ apam atɔnyade a akũ ni, kufɛ fɔláabuki fusĩ kĩ bakɛna ayade.
Ⅷ Lɛmɛ Baguma amɔ mfumsu nɛ ye bati akũ kĩ ɛlɛ kĩ,
“Boe Ɔlate a lɛ kĩ,
fuwi fudi aya kĩ maakɛna apam vɔɛ̃ mɔ
Israel kade a
mɔ Yuda kade a lɛmɛ.
Ⅸ Apam kĩĩ lɛláana ndɛ ekĩ
nkɛna mɔ be bawanyɔ
nɛ lɔkɔ a kĩ mpi be nɛ akpɔ
nkpã be nnɛmɛna nɛ Egipte tite akũ a.
Kitonɛkĩ bɛtákɛna nɛ apam a kĩ nkɛna mɔ be a akũ,
foesũ yĩ malo mbɔa kanɛ nkpa be.”
Ⅹ Ɔlate a buki ɛlɛ kĩ,
“Ade apam kĩ maakɛna mɔ Israel bati
nɛ fuwi a kĩ fɔ́aya a liti a.
Maakɔa yĩ mbla ndo nɛ be adzuni kamɛ,
ade maatsɛlɛ ye nɛ be tɔwɔlɛ kamɛ a.
Maanya be Baguma,
ade be baanya yĩ bati a.
Ⅺ Odima lɛláabuki ɛtsa ɔkɔba fɔtsa
ĩye ebi ɔwaɛ̃ kĩ, ‘Nyi Baguma,’
kitonɛkĩ odi nyɛ odi aanyi yĩ
kito babisɛ̃ akũ kɛnawo banɔkɔɛ̃ akũ.
Ⅻ Maamɔ be kɔnya nɛ be ɔbla kpa a kĩ bɛbɔa akũ,
ade nláabuki nte anɛ nɛ be tɔkpa akũ kɔlaa a.”
ⅩⅢ Kĩ Baguma lɛ kĩ apam vɔɛ̃ a, fɔatsa kĩ ɛkɛna atɔnyade a akɔɛ. Ade finyaakĩĩ lɛtsa nyɛ lɛtsa kĩ lɛkɛna lɔkɔɛ ni, owi lɛláabuna mɔ laatɛ̃ lɛnaa.