ⅩⅤ
Ode Fɔtɔ Banyanɛ Kɔa Lubokamɔ Nkaɛ a Bɛyamɛna.
Ⅰ Ke liti a, mmɔ́ awãwã fɔtsa kpale bɛbã kĩ fɔanyɛnɛ akũ paa nɛ odetɔ́ kamɛ. Ade foe nyɛ ode fɔtɔ banyanɛ evũkɔnɔ kĩ bɛnɛɛ lubokamɔ evũkɔnɔ a. Lubokamɔ kĩĩ nyɛ nkaɛ flee a kĩ foe aanyɛ Baguma kalɔkpa nkaɛ a fɔtsa.
Ⅱ Ade mmɔ́ litsedi ndɛ mpo kĩ ladã ndɛ ahuhɔɛ kĩ fi tsɛka mɔ ye. Mmɔ́ bati a kĩ bɛnya ɔyaɛ kpa, mɔ ye kutidu a kĩ bɛmɛ́, mɔ ye kakã katsɛlɛ dĩ akũ a, kĩ bɛdzɛ̃ nɛ ahuhɔɛ mpo a abuĩ, bɛnɛɛ tɛsankuo kĩ Baguma kpa be.
Ⅲ Bɛkasã Baguma ɔsumunɛ Mose mɔ Kavelibi a ɔnɔ kĩ,
“O boe Ɔlate Baguma Kpale,
nɔ tudzuma pɔnɛ,
ade takɛna wãwã a!
Nɔ fude fude flee Lɛgã,
Nɔ tisi adã kpĩĩ,
ade tɛnyɛ ɔnɔkɔali a!
Ⅳ O boe Ɔlate, owei koũ lɛláavila nɔ?
Owei aasĩ kĩ ɛláado nɔ dĩ obu?
Kitonɛkĩ nɔ odi nyɛ oti kpalɛwa,
fude fude flee a aayasum nɔ,
kitonɛkĩ bɛnyɛ nɔ fɔtsa kakɛna kpĩĩ a bɛtsa bati flee.”
Ⅴ Ke liti a, ndã fɔkɔ ade mmɔ́ kĩ bibinya Asɔli Kɔla nɛ ode a kĩ Lɛpɛ Kpalɛwa a deĩ nɛ koe kamɛ a biyi.
Ⅵ Ode fɔtɔ banyanɛ evũkɔnɔ a kĩ bɛnɛɛ lubo kamɔ evũkɔnɔ a nɛ́ bito Asɔli Kɔla a kamɛ. Bido aklala fitaa kĩ yata muamua tɛtadiɛ, ade bɛkɔa sika ngbã abɔsɔ bɛbɔa nɛ tɔwɔlɛ a.
Ⅶ Ade fɔtsa ɛna a kĩ fudzi nkpã a kamɛ fɔmɔa kɔa sika ngbã tɔkɔɔpu evũkɔnɔ kĩ tiyi tsɔnɔnɔɔnɔ mɔ Baguma kĩ edzi nkpã daa a kalɔkpa, ɛkpa ode fɔtɔ banyanɛ evũkɔnɔ a.
Ⅷ Ade ɔnyɔ a kĩ eto Baguma kukũkpalɛ mɔ ye kɔbɛ̃ kamɛ a yi Asɔli Kɔla a flee kamɛ a. Odima tápuli ewo nɛ Asɔli Kɔla a kamɛ kɛnawo kĩ lubo kamɔ evũkɔnɔ a kĩ ode fɔtɔ banyanɛ evũkɔnɔ a yamɛna a onukpɛ̃ tsua.