ⅩⅧ
Bibubuli Babilonia Ɔmatɔ a.
Ⅰ Ke liti a, mmɔ́ ode fɔtɔ ɔnyanɛ bɛbã kĩ eduma eto ode yaka. Edeĩ kɔbɛ̃ paa, ade ye akũ ɔhaĩ kpalɛ tite flee akũ a.
Ⅱ Ɛbɔa fɔwɔla kɔɔba ɛlɛ kĩ,
“Ɛtɔ o-o! Babilonia ɔmatɔ a kĩ ɛtɛ dĩ a tɔ tsoo!
Ɛdani hũhũ kpa mɔ hũhũ kĩ efĩĩ deĩ nɛ ye akũ,
mɔ efĩĩ kɔvɔlabi, mɔ kɔvɔlabi kĩ bakesĩ a kadzikɔ̃.
Ⅲ Kitonɛkĩ fude flee mɔa ye adɔpaa akũ kalɔkpa bavɛ a.
Tite akũ fɔgã bɔa adɔpaa mɔ ye,
ade katinya kamɛ fɔyaatɔ banyanɛ tsã ye anɛngbã kana kamɛ bɛdani asikafɔ a.”
Ⅳ Ade nnu odo bɛbã kĩ eto ode ɛlɛ kĩ,
“Yĩ bati, minɛ́ nɛ ye kamɛ!
Kɛtánɛ kĩ miakɛna tɔkpa a na odu,
ade kɛtánɛ kĩ miana ye sɔtɔ kavɛlɛ a na odu a.
Ⅴ Kitonɛkĩ bɛtɛɛtɛɛ ye tɔkpa tide tɛnatamɔ ode,
ade Baguma te anɛ nɛ ye tɔkpa akũ a.
Ⅵ Mikɛna ye ndɛ ayekĩ ye malo ɛkɛna mi a.
Mise ye foe titi nviã nɛ fukĩ ɛkɛna a onukpɛ̃.
Miyula bavɛ mɔ ɔsĩ tɛkɔɔpu nviã mikpa ye,
nɛ amɔa a kĩ ɛkpa mi a onukpɛ̃!
Ⅶ Mimɔna ye lubo,
ebe kɔnya ayekĩ kɛfɛta
fuketimɔ ayekĩ edzi nɛ akũ kahɛhɛ mɔ nkpã kanya kamɛ a.
Kitonɛkĩ yabi ye akũ daa kĩ,
‘Ndzi nɛ awĩ ndɛ lɛgãtsole aye!
Nnɛ́ okunawa manɛ,
ade nláabe ayɔlɔhɔ da a!’
Ⅷ Nɛ fukĩĩ sũ ni, nɛ luwi mɔapɛ kamɛ,
lubo kamɔ kĩ fɔnyɛ,
wuda, fɔsɔ, kɔnya kabe mɔ kɔlɛ aaya nɛ ye akũ.
Baapila ye mɔ fi evio gbunugbunugbunu,
kitonɛkĩ boe Ɔlate Baguma a kĩ ɛkɔ ye kɔɔtɔ a nyɛ ɔbɛlɛbɛ.
Ⅸ “Ntɛ tite akũ fɔgã a kĩ bɛbɔa adɔpaa mɔ ɔmatɔ a, bɛnya nkpã mɔ ye a, mɔ́ fi a kĩ fɔapila ye ɔnyɔ a yade ni, baabɔa fɔwɔla bibe ye.
Ⅹ Baadza mɔ lugo nɛ ye lubo kamɔ kavila a sũ bɛlɛ kĩ,
‘Ao! Ao! Nɔ, ɔmatɔ kĩ ɛtɛ dĩ!
Nɔ, Babilonia kĩ odeĩ kɔbɛ̃!
Dɔũhuilɛ mɔapɛ kamɛ bɛkɔ nɔ kɔtɔ!’
Ⅺ “Tite akũ fɔyaatɔ banyanɛ a lɛmɛ aabe biwo ɔblɔ mɔ ye, kitonɛkĩ odima buki yaáya be fɔtsa.
Ⅻ Kɔyaatɔ fɔtsa a nyɛ sika ngbã, sika ovoe, boe mɔ kɔya, fulitsa mɔ kɔya, aklala, tilima ngbã, tilima ɔɔwa, tilima plɔplɔ, titse kĩ tabɔa mɔ ɔlɛ̃, kunu adɔ̃ fɔtsa, mɔ titse mɔ kɔya, kɔɔble mɔ sɔbɔtsaɛ ɔɔwa fɔtsa, mɔ kɔla kake boe kĩ bɛtɛ kɔya.
ⅩⅢ Fɔbɛbã nyɛ futse fɔkpã mɔ ɔlɛ̃ kĩ bavɛ sinamɔn mɔ kutu ɔlɛ̃ kado fɔtsa, lifii mɔ klubɔũ, bavɛ mɔ kugua kĩ bakɔa katɔ, onuvoe kpɛtɛɛ mɔ fɔwã, kugua kĩ batsɛla, banantsue mɔ baveli, bapɔnkɔ mɔ tihilili, basate mɔ batidziwa kĩ baya kɔkɔ malo.
ⅩⅣ “Fɔyaatɔ banyanɛ a aalɛ kĩ, ‘Futse babi a kĩ fɔakɔ nɔ odo a aalo fɔfɔnɛ nɔ. Nɔ akũ kana fɔtsa flee mɔ nɔ akũ kahɛhɛ a yɛla nɛ nɔ akũ, ɔláabuki ɔmɔ́ foe da!’
ⅩⅤ Fɔyaatɔ banyanɛ a kĩ bɛnya kɔyaatɔ fɔtsa kumɛkumɛ kamɛ mɔ ɔmatɔ a bɛdani asikafɔ a, aadza mɔ lugo, nɛ lubo kamɔ kavila sũ. Bibe, biwo ɔblɔ,
ⅩⅥ bɛlɛ kĩ, ‘Ao! Ao! Ɔmatɔ kĩ ɛtɛ dĩ!
Ɔmatɔ kĩ bɛhɛhɛ ye mɔ aklala fitaa, tilima ngbã, tilima ɔɔwa,
sika ngbã fɔtsa, boe kĩ bɛtɛ kɔya mɔ fulitsa mɔ kɔya!
ⅩⅦ Dɔũhuilɛ mɔapɛ kamɛ ye akũ kana fɔtsa a flee bu kade pasaa.’
“Ɔkɔlɔ a kamɛ banɔkɔɛ̃ flee, mɔ ɔwɔ akũ basitsãnɛ, ɔkɔlɔ batanɛ a mɔ bati bɛbã a kĩ batsã mpo akũ kanya kɔyaatɔ a dza mɔ lugo,
ⅩⅧ bɛbɔa fɔwɔla kɔɔba nɛ lɔkɔ a kĩ bɛmɔ́ ɔmatɔ a kĩ ɛlamɛna kavio a ɔnyɔ a kĩ, ‘Ɔmatɔ kpale kĩĩ odu nɛ́ katinya tɔ̃?’
ⅩⅨ Bifila kudu biko nɛ be fɔlɔ kamɛ ade bibe mɔ kɔnya bɛlɛ kĩ,
‘Bɔbɔɛ bɔbɔɛ bɔakpa ɔmatɔ kpale kĩĩ!
Ɔmatɔ kpale kĩ ye kamɛ futima balate
na akũ bitomɛna ye akũ kana fɔtsa kamɛ bɛdani asikafɔ.
Kitonɛkĩ nɛ dɔũhuilɛ mɔapɛ kamɛ bɛkɛna ye bubloo!
ⅩⅩ O ode, mɔ mi Baguma bade a, mɔ mi fɔtɔ banyanɛ mɔ Baguma onukpɛ̃ banyɛnɛ a, mimɔ kawɔlɛ!
Kitonɛkĩ Baguma kɔ ye kɔtɔ ɛkpa mi nɛ lɛtsa a kĩ ɛkɛna mi a sũ!’ ”
ⅩⅪ Ke liti a, ode fɔtɔ ɔnyanɛ mɔ kɔbɛ̃ odi bɔɛ de kĩ lɔpɔnɛ lububu ndɛ kɔwɔlɛ ade ɛta edo nɛ mpo kamɛ, ɛlɛ kĩ,
“Ade aye baabɔɛ Babilonia ɔmatɔ kpale a bibo mɔ fɔkɔ,
ade bɛláabuki bɛmɔ́ ye da a.
ⅩⅫ Bɛláabuki binu tɔwɛ̃ tɛsankuo, tifluti mɔ kugbulɛɛ tido
nɛ nɔ kamɛ da.
Bɛláabuki bɛmɔ́ awɛ adzuma ɔkɛnanɛ odima lɛmɛ
nɛ nɔ kamɛ da,
ade ayea lɛmɛ bɛláabuki binu fɔtsa kawɔlɛ
nɛ kɔwɔlɛ akũ nkã da nɛ nɔ kamɛ a!
ⅩⅩⅢ Bɛláabuki bɛmɔ́ ɔsɛdza katɛ̃
nɛ nɔ kamɛ da,
ade bɛláabuki binu olitsɔ̃ mɔ obolitsɔ̃ nyɔ tido
nɛ nɔ kamɛ da a.
Nɔ kɔyaatɔ banyanɛ a
nyɛ katinya kamɛ banɔkɔɛ̃ banɔkɔɛ̃,
ade ɔkɔa nɔ kanɔkɔnɛ kadã ɔkɛ katinya kamɛ bati flee a.
ⅩⅩⅣ Bɛvɛlɛ Babilonia sɔtɔ, kitonɛkĩ ye kamɛ bɛmɔ́ Baguma onukpɛ̃ banyɛnɛ mɔ Baguma bade a babɔanɛ.
Nnɛ́ be odi bade bɛmɔ́, mbom mɔ bati a kĩ bɛkɔ nɛ tite akũ a
babɔanɛ bɛ́mɔ nɛ ye kamɛ.”