ⅩⅩ
Bido Okesĩnɛ a Nɛ Kɔla Futeli Apim Mɔa.
Ⅰ Ke liti a, mmɔ́ ode fɔtɔ ɔnyanɛ odi kĩ eto ode yaka, kĩ ɛnɛɛ lɛkɛ dzununuunu a safi mɔ nkɔsɔnkɔsɔ kpale adi nɛ awɛ.
Ⅱ Epi kɔɛ kpale a, kĩ kɔna kɔkɔɔkɔɛ a, kĩ bavɛ Abonsam ĩye Satana a, esuli koe eyi ɛkpa futeli apim mɔa.
Ⅲ Ode fɔtɔ ɔnyanɛ kɔa ye edo nɛ lɛkɛ dzununuunu a kamɛ ɛbalɛ de onukpɛ̃, ɛtalɛ de lɛmɛ ayekĩ ɛláapuli ebuki ɛkɛ fude fude bati kɛnaawo kĩ futeli apim mɔa a yatɛ̃. Lɛmɛ nɛ foe liti a, kɛnɛ kĩ bɛfɔnɛ ye awɛ sukuloo.
Ⅳ Ke liti a, mmɔ́ fɔgãkpo fudi, ade bati a kĩ bidzi nɛ foe akũ a, bɛkpa be kɔbɛ̃ kĩ bɛdzɛ fɔlɛtsa. Mbuki mmɔ́ bati a kĩ bikpeli be fɔlɔ, nɛ ayekĩ bidi adansiɛ nɛ Yesu ɔnɔkɔali, mɔ Baguma kalɛ a akũ sũ a tɛkla. Ade be lɛtásum ɔyaɛ kpa ĩye ye kutidu a kĩ bɛmɛ a, ĩye bɛtɛ ye sɔkpɔ̃na nɛ be nnyɛ ĩye nɛ awɛ a. Biyidza bibuki bidzi nkpã bɛnya lɛgã mɔ Kristo futeli apim mɔa.
Ⅴ Ade fukĩĩ nyɛ banɔkpa kayidza kadzi nkpã atɔnyade a. Banɔkpa nkaɛ a kɔ̃ táyidza bidzi nkpã kɛnawo kĩ futeli apim mɔa a aatɛ̃.
Ⅵ Baguma hila bati a kĩ bɛna tsɛfã nɛ banɔkpa kayidza katɔnyade kĩĩ kamɛ a, kĩ ɛkpalɛ be akũ lɛmɛ a. Wuda ayade a lɛlá kɔbɛ̃ nɛ be akũ, baanya Baguma mɔ Kristo basɔfɔ, ade baanya fɔgã mɔ ye futeli apim mɔa a.
Bɛnya Satana Akũ.
Ⅶ Ntɛ futeli apim mɔa wũna a, baanyɛ Satana nɛ kɔla,
Ⅷ ade yanaa ɛnaakɛ fude fude kĩ fudeĩ nɛ katinya tukontoũ ɛna a kamɛ kĩ fɔnyɛ Gog mɔ Magog, ɛkpɔta be ɛkpa kawũkanɔ. Be lidede aana ndɛ mpo abuĩ dã.
Ⅸ Bɛtsã tite dzɛlɛwa a akũ bɛnadza bisinya Baguma bade a kadzikɔ̃ mɔ ye ɔmatɔ kpale a kĩ yawɛ kalɛ a. Lɛmɛ fi to ode fɔyawɔla be flee.
Ⅹ Ade bɛta Abonsam a kĩ ɛkɛ be a bido nɛ fi lutubu mɔ fukpokpo gɛĩgɛĩ a kamɛ, nɛ awã kĩ bɛnya lɔtɔ bɛta ɔyaɛ kpa mɔ fɔvã onukpɛ̃ ɔnyɛnɛ a bido a. Baamɔna be lubo lɛnyɛ mɔ suwa daa daa.
Katinya Kamɛ Kadzɛmɛna Nkaɛ.
Ⅺ Ke liti a, mmɔ́ lɛgãkpo kpale ovoe lidi mɔ oti a kĩ edzi nɛ de akũ a. Tite mɔ ode lo nɛ ye anɛ kamɛ, ade bɛtána kakɔma bɛkpa te a.
Ⅻ Ade mmɔ́ banɔkpa, banɔkɔɛ̃ mɔ babisɛ̃ kĩ bɛdzɛ̃ nɛ lɛgãkpo a anɛ a. Bibinya tuvoli biyi, ade bibinya ovoli bɛbã odi lɛmɛ kĩ ɛnyɛ nkpã ovoli a. Bɛdzɛmɔ banɔkpa nɛ be fɔkɛlatsa onukpɛ̃ ndɛ ayekĩ bɛtsɛlɛ biyi nɛ tuvoli a kamɛ a.
ⅩⅢ Mpo nyɛ banɔkpa a kĩ bideĩ nɛ ye kamɛ a ɛkpa, ade wuda mɔ kanɔkpade lɛmɛ nyɛ banɔkpa a kĩ bɛnɛɛ a bɛkpa a. Ade bɛdzɛmɔ be kamɛ odi nyɛ odi nɛ ye fɔkɛlatsa onukpɛ̃ a.
ⅩⅣ Ke liti a, bɛta wuda mɔ kanɔkpade biwula nɛ fi lutubu baũ a kamɛ. Fi lutubu baũ kĩĩ nyɛ wuda ayade a.
ⅩⅤ Ade odi nyɛ odi kĩ bɛtámɔ ye dĩ nɛ nkpã ovoli a kamɛ ni, bɛta ye bido nɛ fi lutubu baũ a kamɛ.