Ⅴ
Bɛkɔa Ovoli a Bɛkpa Kavelibi a.
Ⅰ Fukĩĩ liti a, mmɔ́ ovoli butawa odi nɛ oti a kĩ edzi nɛ lɛgãkpo akũ a sɔmɔna awɛ. Bɛtsɛlɛ fɔtsa nɛ ye kamɛ mɔ liti ade bɛkɔa kɔma fɔtsa evũkɔnɔ bɛtalɛ ye onukpɛ̃ a.
Ⅱ Mmɔ́ ode fɔtɔ ɔnyanɛ mɔ kɔbɛ̃ odi kĩ ɛbɔa fɔwɔla kɔɔba nɛ ode, evia kĩ, “Owei lɛkpɔla kĩ yaapuli ɛwai kɔma a, ebinya ovoli butawa a?”
Ⅲ Lɛmɛ odima lɛláa nɛ ode, nɛ tite akũ, ĩye nɛ tite ɔda kĩ yaapuli ebinya ovoli a, ĩye ɛdã ye kamɛ.
Ⅳ Mbe paa, kitonɛkĩ bɛtámɔ odima kĩ ɛkpɔla kĩ yabinya ovoli a, ĩye ɛdã ye kamɛ.
Ⅴ Ade banɔkɔɛ̃ a kamɛ ɔmɔa bi yĩ kĩ, “Fɔ̃ kabe! Dã! Dzata a kĩ eto Yuda katete kamɛ a, kĩ ɛnyɛ Dawid kasinu kamɛ obi a nya akũ, kĩ ɛkpɔla kĩ yawai kɔma fɔtsa evũkɔnɔ a kĩ bɛkɔa bɛtalɛ ovoli a onukpɛ̃, ebinya ye lɛmɛ.”
Ⅵ Kĩ ndã a, mmɔ́ Kavelibi kadi kĩ kɛdzɛ̃ nɛ lɛgãkpo a kayite nɛ fɔtsa ɛna a kĩ fudzi nkpã a kamɛ, ade banɔkɔɛ̃ tɛya-ana a sinya ye a. Fɔdã ndɛ kakɔ bɛkɔ Kavelibi a. Kavelibi a deĩ tɛlɛ evũkɔnɔ mɔ banebi evũkɔnɔ kĩ fɔnyɛ Baguma hũhũ evũkɔnɔ a kĩ edo nɛ tite flee akũ a.
Ⅶ Kavelibi a naa kɛnatɛ ovoli a etomɛna oti a kĩ edzi nɛ lɛgãkpo a akũ a sɔmɔna awɛ.
Ⅷ Kĩ yatɛ ovoli a, fɔtsa ɛna a kĩ fudzi nkpã a, mɔ banɔkɔɛ̃ tɛya-ana a tsa anɛ nɛ tite nɛ Kavelibi a anɛ kamɛ. Be kamɛ odi nyɛ odi nɛɛ ɔsankuo mɔ sika ngbã lɔɔda kĩ biyula mɔ titsonu mɔ ɔlɛ̃, kĩ fɔnyɛ bati a kĩ Baguma kpalɛ be akũ a mpaɛbɔ.
Ⅸ Bɛsã ɔnɔ vɔɛ̃ odi kĩ,
“Nɔ kĩĩ lɛkpɔla kĩ atɛ ovoli a
lɔkɔa ɔwai kɔma evũkɔnɔ a
kĩ bɛkɔa bɛtalɛ ye onukpɛ̃ a.
Kitonɛkĩ nɔ bɛkɔ,
ade ɔkɔa nɔ babɔanɛ,
ɔya bati ɔkpa Baguma a.
Bati kĩ bito fude nyɛ fude, tide nyɛ tide,
ɔmaĩ nyɛ ɔmaĩ kamɛ,
mɔ batidziwa ahɔlɔ ahɔlɔ a kamɛ.
Ⅹ Ɔkɛna be lɛgãkanyakɔ̃ basɔfɔ kĩ bisum boe Baguma,
ade baanya fɔgã nɛ tite akũ a.”
Ⅺ Ade kĩ mbuki ndã a, nnu ode fɔtɔ banyanɛ mpim mpim kĩ bɛláapuli bɛkã odo. Bɛdza bisinya lɛgãkpo a, mɔ fɔtsa ɛna a kĩ fudzi nkpã a, mɔ banɔkɔɛ̃ tɛya-ana a.
Ⅻ Ade bɛsã ɔnɔ kɔɔba kĩ,
“Kavelibi a kĩ bɛkɔ a,
lɛkpɔla kĩ katɛ otumi, mɔ akũ kana, mɔ nyansã,
mɔ kɔbɛ̃, mɔ obu, mɔ kukũkpalɛ mɔ kamu!”
ⅩⅢ Adeke nnu kĩ lɛtsa nyɛ lɛtsa a kĩ Baguma bɔa nɛ tite mɔ ode, mɔ tite ɔda, mɔ mpo kamɛ, mɔ fɔtsa a kĩ fudeĩ nɛ foe kamɛ a flee lamɛna ɔnɔ kasã kĩ,
“Kamu, mɔ obu, mɔ kukũkpalɛ
mɔ otumi fɔna daa fɔkpa,
oti a kĩ edzi nɛ lɛgãkpo akũ a mɔ Kavelibi a!”
ⅩⅣ Ade fɔtsa ɛna a kĩ fudzi nkpã a tɛ futunɔ kĩ, “Fɔya lɔmɔ!” Ade banɔkɔɛ̃ a tsa anɛ nɛ tite bisum Baguma mɔ Kavelibi a.