Ⅶ
Bɛpau Bati Mpim Ɔha Tɛna-ana Nɛ Israel.
Ⅰ Fukĩĩ liti a, mmɔ́ ode fɔtɔ banyanɛ ɛna kĩ bɛdzɛ̃ nɛ tite tukontoũ ɛna a akũ. Bisua tite akũ ɔwɛ fɔkɔ ɛna a osi, kĩ ɛtavũ nɛ tite akũ, ĩye mpo akũ, ĩye nɛ kutse kudima kamɛ.
Ⅱ Ade mmɔ́ ode fɔtɔ ɔnyanɛ bɛbã kĩ eto suwa kadekɔ̃ yaya, kĩ ɛnɛɛ Baguma kĩ edzi nkpã a ɔsũkayi fɔtsa a nɛ awɛ. Ɛbɔa fɔwɔla kɔɔba ɛvɛ ode fɔtɔ banyanɛ ɛna a kĩ Baguma kpa kɔbɛ̃ kĩ bɛkɛna tite mɔ mpo awɔda a,
Ⅲ ɛlɛ kĩ, “Mitakɛna tite, mpo ĩye futse lɛtsamanɔ kɛnaawo kĩ bɔ́akɔa ɔsũkayi fɔtsa buyi boe Baguma basumunɛ a ɔsũ nɛ be nnyɛ.”
Ⅳ Ade nnu kĩ bati a kĩ biyi be ɔsũ mɔ Baguma ɔsũkayi a kĩ bito Israelfɔ futete ewua-nviã kamɛ a lidede nyɛ bati mpim ɔha tɛna-ana (144,000).
Ⅴ Nɛ Yuda katete a kamɛ biyi bati mpim ewua-nviã ɔsũ.
Ruben katete kamɛ bati mpim ewua-nviã.
Gad katete kamɛ bati mpim ewua-nviã.
Ⅵ Aser katete kamɛ bati mpim ewua-nviã.
Naftali katete kamɛ bati mpim ewua-nviã.
Manase katete kamɛ bati mpim ewua-nviã.
Ⅶ Simeon katete kamɛ bati mpim ewua-nviã.
Levi katete kamɛ bati mpim ewua-nviã.
Isakar katete kamɛ bati mpim ewua-nviã.
Ⅷ Zebulon katete kamɛ bati mpim ewua-nviã.
Yosef katete kamɛ biyi bati mpim ewua-nviã.
Ade nɛ Benyamin lɛmɛ katete kamɛ biyi bati mpim ewua-nviã ɔsũ a.
Yohanes Mɔ́ Bati Kɔdabu Baũ.
Ⅸ Fukĩĩ liti a, mmɔ́ bati kɔdabu baũ kudi kĩ odima lɛláapuli ɛkã. Bito batidziwa ahɔlɔ ahɔlɔ a, kade nyɛ kade, ɔmaĩ nyɛ ɔmaĩ, mɔ tide nyɛ tide flee kamɛ, ade bɛdza bɛtsɛlamɔ lɛgãkpo mɔ Kavelibi a. Be flee bido tɛtadiɛ ovoe wulaa, ade bɛnɛɛ tukuo nɛ awɛ a.
Ⅹ Bɛbɔa fɔwɔla kɔɔba kĩ, “Nkpã katɛ a to boe Baguma a kĩ edzi nɛ lɛgãkpo a akũ, mɔ Kavelibi a sɛkɛ̃!”
Ⅺ Ode fɔtɔ banyanɛ a flee dza bisinya lɛgãkpo a, mɔ banɔkɔɛ̃ a, mɔ fɔtsa ɛna a kĩ fudzi nkpã a, ade bɛka bɛtsa anɛ nɛ tite nɛ lɛgãkpo a anɛ bisum Baguma,
Ⅻ bɛlɛ kĩ,
“Fɔya lɔmɔ!
Kamu, mɔ kukũkpalɛ,
mɔ nyansã, mɔ kɔlɛkanyɛ, obu,
kɔbɛ̃ mɔ otumi
nyɛ boe Baguma fude daa daa!
Fɔya lɔmɔ!”
ⅩⅢ Banɔkɔɛ̃ a kamɛ ɔmɔa odi via yĩ kĩ, “Bawei nyɛ bikĩ bido tɛtadiɛ ovoe wulaa kĩĩ a? Nɛ ndia bito?”
ⅩⅣ Nkpa ye mbuayɛ kĩ, “Yĩ Ɔlate, ĩnyína. Nɔ nyina.”
Ade ebi yĩ kĩ, “Ade be nyɛ bati a kĩ bɛtsã lubo kamɔ kpale kamɛ bɛnɛ sɔũ a. Bɛvɔlɛ be tɛtadiɛ tivoe fitaa nɛ Kavelibi babɔanɛ a kamɛ.
ⅩⅤ Ade foesũ bɛdzɛ̃ nɛ Baguma lɛgãkpo a anɛ basum ye lɛnyɛ mɔ suwa flee nɛ ye Asɔli Kɔla kamɛ a. Oti a kĩ edzi nɛ lɛgãkpo a akũ a, aafɔ̃ lɛtsama lɛláakɛna be nɛ ye anɛ kamɛ.
ⅩⅥ Kɔlɛ ĩye ɔmɔado lɛláabuki ɛkɔ be da.
Suwa lɛláapila be ĩye ovio libuki ɛkɔ be da.
ⅩⅦ Kitonɛkĩ Kavelibi a kĩ kideĩ nɛ lɛgãkpo a kayite a nyɛ be ɔkpãnɛ.
Yaakpã be ɛnamɛna awã kĩ nkpã mui anɛ kato a,
ade Baguma aayɔ babe flee nɛ be anɛ a.”