8
Dyisas i mdatah bà di Dwata
(Éksodus 19:5-6; 20:1-17)
1 Na ani gumtatek kdee manmi gine, tanun mdatah baito di Dwata i tasudeng di gsen kwanan Dwata i Harì Too Mdatah di langit dunan Dyisas.
2 I nimò Dyisas nimò i mdatah bà déén di muna Dwata di too glut gumangamfù di langit ise ku to mimò dun, bay Amuito Dwata.
3 I kfagu i mdatah bà di Dwata di tah tanà ale mgalék du mlé di Dwata, na damsù di kenen. Taman salngad én i baito, là fakay ku landè blén di Dwata.
4 Balù ku dini fa Dyisas di tah tanà, ise kenen bà di Dwata, du i dad bà di Dwata di tah tanà, i mlé di Dwata fagu fa di flalò mdà di ku Mosis.
5 Na déén gumimò i dad bà di gumangamfù di Dwata. Na gumangamfù ani tatì alò guflingen i too glut gumangamfù ditù di banwe di langit. Too glut ani, du di fan kafdak Mosis gumangamfùla, dek Dwata, manan,
“Toom neye di kimoam i gumangamfù, én laloam kdee fiteta ge ditù di bulul.” Ani man Dwata.
6 Kabay i nimò Dyisas Krayst too mdatah fa di dad bà di Dwata di tah tanà ani. I falami dalan mdà di ku Dyisas i smafye gito di Dwata, mdatah fa di muna dalan, du i falami dalan ani gagin di too fye fakang Dwata di gito. I fulé fakang Dwata di gito mdatah fa di muna fakangan.
7 Du ku là kulang i muna dalan là tanlas dun.
8 Kabay tanlas Dwata falami, du di kiten kulang i nimò i dad to Israél, du là ale mayè mimen i muna dalan. Na én duen man Amuito Dwata, manan,
“Ani i mangu di dad to Israél,
na di dad bel Dyuda,
nun duh kadang
fgadègu gamu i falami dalan salu di deg.
9 Falami dalan ani là gambet
i fgadègu di dad gutambulla
di kebegu dale
lamwà di banwe Idyif,
du là ale fadlug mlalò i dalan fgadègu di dale,
na én duengu fbayà dale, agu i Amu, na ani i mangu di dale.
10 Na lêman mangu di dale gablà di falami dalan.
Ku kel kadang i duh i gmangu di dale,
fkahgu i dad tdògu di lam i fandamla,
na di nawala.
Na di bang én agu mbaling Dwatala,
na ale mbaling dad togu.
11 Na kakel i duh én, landè gukmamu kasatdò kat satu dale gablà di deg,
na landè gukmamu i to fgadè ku simto agu,
du i kdee kadang gmadè deg,
mdà di mdanà to kel di mdatah to.
12 Na làgu fandam i dad salàla,
du tanlifetgu i dad sasè nimòla.” Ani gman Dwata.
13 Du tanun gman Dwata di gito gablà di falami dalan na ani duen i muna dalan landè gukmamu. Na gadeito balù i tan ku talabi talandè gukmamu dun.