Salmo 118
118
I dasal i harì mlé fye di Dwata mdà di katu
1 Mlé gamu fye di Amuito Dwata, du too kenen fye,
na i kakdon landè kgilin kel di landè sen.
2 Gamu bel Israél, manyu,
“I kakdo Dwata, landè kgilin kel di landè sen.”
3 Gamu dad bàmi di Dwata, i bel Aron, manyu,
“I kakdo Dwata, landè kgilin kel di landè sen.”
4 Gamu dad to nun klikò di Dwata, manyu,
“I kakdo Dwata, landè kgilin kel di landè sen.”
5 Di knun kaflayamgu tlogu Amugu Dwata,
na tnimelan agu na falwaan agu.
6 Taman du Amugu Dwata msen deg, là agu likò;
du landè gagan i dad to nimò di deg.
7 I Amugu Dwata dini di safédgu du tmabeng deg,
na too glut gfisangu kadang i dad to mnang nawa deg.
8 Fye fa ku Amuito Dwata i guflidungito,
nang ku i ktabeng i dad to i gusmaligito.
9 Fye fa ku Amuito Dwata i guflidungito,
nang ku i ktabeng i dad ulu di tah tanà ani gusmaligito.
10 Balù tamaglibut agu i dee to mdà di dee sahal banwe dmuen deg,
knean gfisangu ale fagu di ktabeng i Amugu Dwata.
11 Too glut tasanlibutla agu,
bay fagu di ktabeng i Amugu Dwata gfisangu ale.
12 Sanlibutla agu salngad di dlagan i sugen,
bay balù too minit i kalbutla deg mlal magwè,
du fagu di ktabeng i Amugu Dwata gfisangu ale.
13 Tatoola agu sanfati, na fan agu fisan,
bay i Amugu Dwata tmabeng deg.
14 I Amugu Dwata mlé deg eneg na gal;
na kenen i falwà deg.
15 Fadé fanlingeyu i kit dad to Dwata déén di slungla du lehew ale mdà di katula,
manla, “Én bong ktulus Amuito Dwata i gamgimò ani!
16 I ktulusan i gumdaito matu;
kenen sa i fatu gito di kasfati.”
17 Tagmangu di ktogu, “Là agu mati di kasfati ani, mto agu,
na tmulen agu kadang gablà di mgimò Amugu Dwata.”
18 Na balù glut tatoo agu fanlayam i Amugu Dwata,
bay laan agu blé di fati.
19 Taman lanwayu deg i takab di Bong Gumnè Dwata,
du fye gfusuk agu du mlé agu fye di Amuito Dwata.
20 Ani i gufusuk di Bong Gumnè Amuito Dwata,
na én alò gfusuk dini i dad to matlu.
21 Mlé agu bong fye di ge, Amugu Dwata,
du tatnimelam agu, na fatum agu.
22 I batu too knang i dad to fdak i gumnè batu,
du di dale fandam landè gukmamu dun,
én baling i batu too mabtas di kdee.
23 Hae, ani mgimò i Amuito Dwata,
na di kiteito, too gamtikeng i nimoan.
24 Ani i duh katu mgimò i Amuito Dwata,
taman flehew ito di mgimoan.
25 E Amumi Dwata, begam gami falwà;
na begam gami banlé fye knè.
26 Too nun kafye i to salu dini mebe i glal Amuito Dwata,
mlé gami kafye di gamu dini di Bong Gumnè Dwata.
27 I Amuito Dwata, dunan i too glut Dwata, na tabanlén ito kafye;
taman mebe gamu dad malnak fanga i kayu, na tambù gamu mimò i klehew,
magu gamu mlibut di gumlé dsù di Dwata.
28 Ge i Dwatagu na mlé agu fye di ge;
ge i Dwatagu na tulengu di kdee to i bong kdataham.
29 Mlé gamu fye di Amuito Dwata, du too kenen fye,
na i kakdo Dwata landè kgilin kel di landè sen.