7
I ilè di dad salig Dwata
1 Kafnge én, teengu fat kasaligan Dwata. Na tadag ale di sbalà kilil di tah tanà ani, du nsangla nus du fye là mbal di tah tanà, ku demen di mahin na balù di dad kayu.
2 Na teengu satu dademe kasaligan Dwata fdu di gusut i duh. Na nagotan i ilè i too mto Dwata. Na toon falbong i taluan du tlon i fat kasaligan Dwata i nun eneg falmo i tanà na mahin.
3 Na manan di dale, “Nangyu tayò falmo i tanà na i mahin na i dad kayu, silangyu falmo ku tafngemi nimò ilè Dwata di angas i dad saligan.”
4 Kafnge én, nun tmulen di deg ku file i kdeela mafkah ilè Dwata di angasla, dunan mlatu fat falò fat libu slame mdà di kdee lumbuk i dad bel Israél.
5 Mdà di lumbuk Dyuda, sfalò lwe libu i nun ilè,
mdà di lumbuk Rubén, sfalò lwe libu i nun ilè,
mdà di lumbuk Gad, sfalò lwe libu i nun ilè,
6 mdà di lumbuk Asher, sfalò lwe libu i nun ilè,
mdà di lumbuk Naftali, sfalò lwe libu i nun ilè,
mdà di lumbuk Manasas, sfalò lwe libu i nun ilè,
7 mdà di lumbuk Simyon, sfalò lwe libu i nun ilè,
mdà di lumbuk Libay, sfalò lwe libu i nun ilè,
mdà di lumbuk Isakar, sfalò lwe libu i nun ilè,
8 mdà di lumbuk Sabulun, sfalò lwe libu i nun ilè,
mdà di lumbuk Dyosif, sfalò lwe libu i nun ilè,
na mdà di lumbuk Bénhamin, sfalò lwe libu i nun ilè.
I mlabung dad to lamsak i klaweh bukay
9 Kafnge én, teengu bong mlabung dad to i landè fakay gamse dun, na i gumdàla di kdee sahal banwe, di kdee sahal lumbuk i dad to, di kdee sahal bung to, na mdà di kdee sahal bung talù. Na tadag ale di muna i gusudeng i gumdatah na di muna i Tingà Bilibili. Na kdeela lamsak bukay klaweh na kat satu dale magot i taglang falmira.
10 Na toola falbong i talùla, na manla,
“Dnayenmi Dwatami, i sudeng di gusudeng i gumdatah,
na i Tingà Bilibili
du di dale gumdà i kagalwàmi.”
11 Na di kagdayenla Dwata na Tingà Bilibili, kdee kasaligan Dwata sdulê tadag glibut di gusudeng i gumdatah na i dad lwe falò fat ulu, na i dad fat gambet lmanaf, lkuad ale di muna i gumdatah dunan Dwata, na mangamfù ale kenen.
12 Na manla,
“Amén. Too glut ani.
I Dwataito, too kenen gablà dmawat kdayen, kfangamfù,
kablé fye, na afè,
du kenen mfun i kfulung na glal, na too kenen mtulus,
kel di landè sen. Amén.”
13 Kafnge én, satu di lwe falò fat ulu smalek deg, manan, “Simto kè dad to kamlaweh bukay ani na nè gufdula?”
14 Na tnimelgu kenen, mangu, “Làgu gadè dun. Ge sa gmadè.” Na manan di deg, “Ale sa i dad to tafdu di too bong kaflayam. Na tamagfukla i klawehla di litè Tingà Bilibili, na tambaling bukay.
15 Taman,
‘tadag ale di muna i gusudeng Dwata,
na mimò ale i knayean mduh na butang di Bong Gumnean,
na i sudeng di gusudeng i gumdatah dunan Dwata, kenen sa too mifat dale du mnè ale di kenen.
16 Na talà ale lêman bitil,
na talà ale lêman malinum,
ku demen maflayam di kinit i duh,
ku demen dademe dad kinit.
17 Du i Tingà Bilibili, déén di muna i gusudeng i gumdatah, kenen i mifat dale,
na naginan ale di yéél i mlé nawa landè sen,
na Dwata i mifu kdee lwakla.’ ”