Bibeli Luayãtaalá Kↄlↄsideↄ 4

1 Diiↄ, à á zↄↄ gwa a dↄ̀ↄwa súsu. Àↄ dↄ̃ kɛ́ ápiↄ sↄ̃ á Dii vĩ musu.*

2 À ázĩa kpa wabikɛa Luawawa, í itɛ̃kɛò ń aà sáaukpaao. 3 À wabikɛwàwɛ̃ɛ lↄ, aà zɛwɛ̃wɛ̃ɛ wà a yã́ waasokɛ, wí Kilisi asiiyã'ònɛ́. A yã́i wà ma dai kpɛ́u. 4 À wabikɛmɛɛ mà yã́pi o wásawasa lá à kũ̀ mà owa. 5 Àↄ ázĩa kũa dↄ̃ Yesusaideↄ guu ń ↄ̃nↄo. Àli yã́ pↄ́ Lua a zɛbↄ̀ɛ́ kɛ.† 6 À tó á lɛgbɛ'i àↄ na, iↄ kã́fĩa vĩ, íↄ yãwea baadewa dↄ̃.

Lɛzaamá

7 Wá gbɛ̃́ yenzide Tisiki, ma dↄnlɛde zĩkɛndee náaide Dii zĩ guu, a ma baokpaɛ́ píi. 8 Bee yã́i málɛ aà zĩwá, aà wá kua oɛ́, á nↄ̀sɛ i níni.‡ 9 Á gbɛ̃do Ɔnɛziũ,§ wá gbɛ̃́ náaide yenzide lɛ́ mↄaànↄ. Aa lakĩi yã́ↄ oɛ́ píi.

10 Alisaka pↄ́ wá sãnu kpɛ́u fↄkpàwá ń Baanaba dãuna Maakuo. Wà Maaku yã'òɛ́ kↄ̀. Tó à kà á kĩ́i, à gbãakpaaàzi. 11 Yesu pↄ́ wì mɛ Yusitu fↄkpàwá lↄ. Yuda pↄ́ wálɛ kpala pↄ́ bↄ̀ Lua kĩ́i zĩ kɛ sãnuↄ lɛ́n we. Aa ma nↄ̀sɛ nìni. 12 Á gbɛ̃do Ɛpafa,* Kilisi Yesu zↄ̀blena fↄkpàwá. Ìↄ dɛ̃ɛka ń wabikɛaɛ́o gↄↄpii, kɛ́ à e zɛ gbãa, í kàsaakũ, Lua pↄeã i pɛɛwá wásawasa. 13 Má ò àlɛ zĩkɛɛ́ maamaa á ń Laodisideↄ ń Iɛlapↄlideↄ. 14 Wá lòotoo yenzide Luku ń Demasio fↄkpàwá. 15 À fↄkpa wá gbɛ̃́ pↄ́ kú Laodisiↄwa ń Nimfao ń gbɛ̃́ pↄ́ aaì kↄ̃ kãaa aà bɛↄ. 16 Tó a láɛ bee kyokɛ̀, à kpa Laodisi gãlideↄwa aa a kyokɛ, í ń pↄ́ kyokɛ sↄ̃. 17 À o Aasipuɛ, aà laaidↄ Dii zĩ pↄ́ wa dàɛwa, i a midɛ.

18 Ma Pↄlu mámɛ ma fↄkpaawáɛ bee kɛ̃̀ ń mazĩa ↄo: Ma fↄkpàwá. À to ma kua kpɛ́u yã́ àↄ dↄágu. Lua gbɛ̃kɛkɛɛ́.

* 4:1 Ɛfɛ 6.9 † 4:5 Ɛfɛ 5.16 ‡ 4:8 Ɛfɛ 6.21-22 § 4:9 Flm 10 * 4:12 Kls 1.7, Flm 23