Bibeli Luayãtaalá 2 Tɛsalonideↄ 1

TƐSALONIDEƆ LÁ PLAADE

Yã́ pↄ́ kú láɛ bee guuↄ

Pↄlu yã́ pↄ́ á ò Tɛsalonideↄ lá sɛ̃́ia guu ò la lↄ, à Kilisi mↄa ń gawi zↄ̃ↄo ònɛ́. Yã́pi lɛ́ ĩada Tɛsalonideↄwa. An gbɛ̃eↄ lɛ́ e gↄↄpi kà kↄ̀ɛ (2.2), ↄ̃ an gbɛ̃eↄ lɛ́ gí zĩkɛi, ↄ̃ aa gↄ̃̀ ń gbɛ̃́ↄnɛ aso ũ, asa aalɛ e gↄↄ gbɛzãpi kà kãikãi (3.6-12). Láɛ bee lɛ́ ń da zɛ́wa an làasoo kpaanla kɛapi yã́ musu.

Pↄlu nà Lua sáaukpaawa Tɛsaloni Yesudeↄ yeakↄ̃i yã́ musu, ↄ̃ à wabikɛ̀ Diiwa aà ń gba gbãa zĩ pↄ́ a nànɛ́ ń ↄzĩ yã́ musu (1.1-12). Ɔ̃ à Kilisi mↄa yã'ònɛ́. Bee a kɛo e gbɛ̃́ pↄ́ wì mɛɛ̀ luayãdansai à gɛ mↄò. Tó aà gbãa dɛ̀dɛ, a to dṹnia gbɛ̃́pii bↄ Lua yã́ kpɛ, aai íbɛlɛsɛ ń Yesudeↄ (2.1-12). Vãi ↄdaa zãa yã́ musu, sema Yesudeↄ zɛ gbãa luanaaikɛa guu (2.13-3.5). A gbɛa Pↄlu lɛkã̀ gbɛ̃pãↄ yã́wa, kɛ́ aasu wàↄ dɛ gbɛ̃eɛ aso ũo (3.6-15). Lápi midɛkĩi à báaadàńgu, à fↄkpàmá (3.16-18).

Yãdilɛaɛ bee lɛ́ wá gba laai: Gbɛ̃́ pↄ́ ye pↄe woaio a pↄbleo (3.10). Wá Yesudekɛ guu wásuli pãkpa yã́ pↄ́ kũ̀ wà kɛzio.

Yã́kpalɛkɛa Kilisi mↄgↄↄzĩ

1 Ma Pↄlu ń Silivɛ̃ɛo ń Timↄteeo, wámɛ wa láɛ bee kɛ̃̀ Tɛsaloni* Yesude pↄ́ aa ku Lua wá Mae ń Dii Yesu Kilisio guuↄnɛ. 2 Mae Lua ń Dii Yesu Kilisio gbɛ̃kɛkɛɛ́, aai á gba aafia.

3 Wá gbɛ̃́ↄ, a maa wàↄ Lua sáaukpa á yã́ musu gↄↄpiiɛ, lá a maawa, asa á luanaaikɛa lɛ́ zↄ̃ↄkũ maamaa, mɛ́ á yeakↄ̃i lɛ́ kã́fĩ. 4 A yã́i tò wi ĩ́anadã á yã́ musu Lua gbɛ̃́ↄ kↄ̃kãaaↄ guu, lá i ĩadama ń taasi píio fↄ̃ ń mɛnao ń luanaaikɛao. 5 Lua ì yã́gↄ̃gↄ̃ ń gbɛ̃́ↄ a zɛ́waɛ. Taasi pↄ́ álɛ kɛ kpala pↄ́ bↄ̀ Lua kĩ́i yã́i lɛ́ ↄlↄnɛ́ kɛ́ a ka à gɛ̃u. 6 Lua ì yãkɛ a zɛ́waɛ. A gbɛ̃́ pↄ́ aalɛ á wɛtãↄ wɛtã, 7 i á gbɛ̃́ pↄ́ wàlɛ á wɛtãↄ gba ĩ́ampakĩi ń wápiↄ. Tó Dii Yesu bↄ̀ luabɛ, a mↄ́ ń a malaika gbãaↄ 8 ń tɛ́vuao, a mↄakaò luadↄ̃nsai pↄ́ aai wá Dii Yesupi bao sioↄwa.† 9 Kaalɛ láasai ↄ̃ Lua a fĩaboonɛ́. Aaↄ ku zã̀ ń Diio ń aà gbãa gawideo. 10 Tó à mↄ̀ gↄↄpi zĩ́, a tↄbↄ a gbɛ̃́ↄ yã́ musu, aà náaikɛnapiↄ i aà maabo ḿpii. Áↄ kú ń guu, asa a yã́ pↄ́ wá òɛ́ sìɛ.

11 Ayãmɛto wiↄ wabikɛɛ́ wá Luawa gↄↄpii, aà tó á kua ka gbɛ̃́ pↄ́ à ń sisi à ń sɛ́ↄ kuawa, i yãmaa pↄ́ a zɛ ń a kɛaↄ ń zĩ pↄ́ álɛ kɛ aà náaikɛa guuↄ píi papaɛ́ ń a gbãao, 12 Dii Yesu tↄ́ i bↄ á musu, á tↄ́ i bↄ aà musu wá Lua ń Dii Yesu Kilisipio gbɛ̃kɛkɛaɛ́ yã́i.