Bibeli Luayãtaalá Ozee 7

7

1 Tó má ye mà su ń ma gbɛ̃́ↄ ń pá ziuɛ,

tó má ye mà Isailiↄ gba aafiaɛ,

Ɛflaiũ buipiↄ duuna ì bilɛ,

Samalideↄ vãikɛaↄ ì bↄ gupuau.

2 Aalɛ e ń yãkɛae dↄmaguo.

An dàa kũ̀aamá, málɛ wɛsiɛ.

3 An yãvãikɛaↄ ì ka kíagu,

an mↄafili ì kɛ dↄaanaↄnɛ na.

4 Gbãsĩkɛnaↄnɛ ḿpii,

an mɛ ìↄ wãa lán pɛ̃ɛkpɛwa.

Za pɛ̃ɛtotogↄↄ e a kã́kãgↄↄ

pɛ̃ɛkɛna lí a tɛ́ kɛkɛ lↄo.

5 Kía dikpɛgↄↄ vɛ̃ɛ ì tɛ́kpa kíaↄgu,

kía i ↄda kↄ̃ ↄu ń gbɛ̃́laanikɛnaↄ.

6 An mɛ wã̀ ń kↄ̃nio lán pɛ̃ɛkpɛwa,

gwã́ an pↄ ì gi àↄ fɛ̃a e gu gɛ̀ dↄ̀o,

ↄ̃ ì dɛdɛ kↄↄ lán tɛ́lɛpiↄwa.

7 Ampii aa wãa lán pɛ̃ɛkpɛwa,

aaì bùsu yãgↄ̃gↄ̃naↄ mↄ́mↄ.

An kíaↄ ì kwɛ píi,

an gbɛ̃e lí lɛzumazio.

8 Ɛflaiũ buiↄ yãalɛa ń buipãleↄ,

ↄ̃ aa gↄ̃̀ lán kàagbaala lilɛsaiwa.

9 Buipãleↄ lɛ́ ń gbãable, aa dↄ̃o,

an mikã lɛ́ dadau, aa a fãn vĩo.

10 Isailiↄ wala ì ń dayãu,

gia ń beeo aali tá Dii ń Luawao,

aali aà kĩ́i wɛɛlɛo.

11 Ɛflaiũ buiↄ dɛ lán felenawaɛ.

Sↄũↄnɛ, aa mi vĩo,

aaì lɛzu Egipiↄzi,

ↄ̃ aaì ɛa gɛ́ Asiliↄwa.

12 Tó aa dàzɛu, má táalu zuńlaɛ,

mí ń kwɛ́ lán bãↄwa.

Tó aa kã̀aa gudoũ,

mí ń wɛtã ń vãikɛa yã́i.

13 Waiyoo ampiↄ, asa aa kɛ̃̀aɛ.

Kaalɛ mɛ́ gↄ̃̀nɛ́, asa aa bↄ̀ ma kpɛɛ.

Má ye mà ń bo, ↄ̃ aaì ɛɛdↄa.

14 Aali wiilɛa ń nↄ̀sɛmɛndooo,

aaì wiipɛ ń lii musu.

Aaì ńzĩa líli pↄ́wɛna ń vɛ̃ɛo ea yã́i,

aaì kɛ̃a.

15 Ma ń toto,

má tò an gã̀sa gbãakũ̀,

ↄ̃ aaì làasoo vãi kɛ ma musu.

16 Ma Musude, aali suao,

aa dɛ lán sá gia baiwaɛ.

Fɛ̃nda mɛ́ a ń kíaↄ kwɛ́ an lɛ́'ɛaa yã́i,

Egipiↄ i ń yáalↄ.