Bibeli Luayãtaalá Isaia 10

1 Waiyoo gbɛ̃́ pↄ́ aaì yãfaasai ń gbɛ̃wɛtãao yãdilɛↄ.

2 Aaì taasideↄ yãna símá,

aaì ma gbɛ̃́ wɛ̃nadeↄ yã́ málɛnɛ́.

Gyaa gbɛ̃andoↄ ì gↄ̃ ń pↄ́ mↄsↄaↄ ũ,

aaì nɛtonɛ pↄ́ gwana vĩoↄ waa.

3 Gↄↄ pↄ́ Dii mↄ̀ ĩadaiwá,

wà bↄ̀ za zã̀zã wà mↄ̀ á músikɛi,

á kɛ kpelewa ni?

Dé kĩ́i á bàalɛ gɛ́u aà á misii?

Mákĩi á á àizɛɛↄ toui?

4 A kee kpɛ́o,

sema à vlãnau ń zĩ̀zↄↄ,

ge àↄ ku gbɛ̃́ pↄ́ wà ń dɛdɛↄ guu.

Ń beeo aà pↄkũma a kpálɛo,

aà ↄ aↄ looańlaɛ.

Dii yãdaa Asiliↄla

5 Waiyoo Asili pↄ́ aaì pↄkũmabↄbↄmámɛɛↄ!

Ɔ̃mɛ ma pↄkpɛ̃nɛ go pↄ́ na ma ↄzĩ ũ.

6 Málɛ ń kpakↄ̃a ń bui luayãdansaiↄ,

málɛ ń zĩ gbɛ̃́ pↄ́ aa ma pↄ fɛ̃̀ↄwaɛ,

kɛ́ aa ń pↄ́ↄ naaa, aa ń àizɛɛ sɛ́lɛ,

aai ↄ̃zↄ̃má zɛ́kpaaↄu lán pɛ̀lɛawa.

7 Ãma yã́ pↄ́ aalɛ yán weo,

làasoo pↄ́ kúmán weo.

Gbɛ̃́ↄ midɛa yã́ mɛ́ dↄ ń sↄ̃wa,

kɛ́ aa e buiↄ míↄnzↄ̃ dasi.

8 Asa aaì mɛ:

Ma dↄaanaↄá kíaↄnɛ píio lò?

9 Lá má kɛ̀ Kaakemiɛ,

má kɛ̀ Kalenↄɛɛ.

Lá má kɛ̀ Amataɛ,

má kɛ̀ Aapadaɛɛ.

Lá má kɛ̀ Damasiɛ,

má kɛ̀ Samaliɛɛ.

10 Ma ↄbↄ̀ ma tã́aↄ bùsuↄ sìmá,

kási sↄ̃ an diipiↄ dasi

dɛ Yelusalɛũ ń Samalio pↄ́ↄla.

11 Lá má kɛ̀ Samaliɛ ń a tã́aↄ,

má kɛ Yelusalɛũɛ ń a diiↄo lé?

12 Tó Dii a yãkɛa Yelusalɛũ Siↄna gbɛ musu lɛzɛ̀, a Asiliↄ kía swã́gagaɛ̀ wala pↄ́ a vĩ ń aà wɛkũaamao yã́i. 13 Asa à mɛ̀:

Má kɛ̀ ń mazĩa gbãaoɛ ń ma ↄ̃nↄo,

asa ma wɛ́ zɛ̃aɛ.

Ma bùsu zↄ̃lɛↄ dɛ̀,

ma ń àizɛɛↄ nàaa,

ↄ̃ ma ń gↄ̃sa kpalablenaↄ pã̀lɛ.

14 Lá wì ↄgɛ̃ bã sakpɛu,

màa ma buiↄ àizɛɛↄ nàaa.

Lá wì gbe pↄ́ bã gòa sɛ́lɛ,

màa ma ń bùsuↄ sì píi.

An kee i kúu'oao,

an kee i lɛwɛ̃aaao.

15 Tó wa mↄo kũao, a zĩkɛe?

Tó wi sii sɛo, a zĩkɛa?

Lípana a liaa ń a kũnaoe?

Go a fɛlɛ ń gbɛ̃́ pↄ́ lɛ́ pↄgbɛ̃òoe?

16 A yã́i tò Dii Lua Zĩgↄ̃de

a ibabagyã kpa Asili kíapi zĩgↄ̃ kãapiↄzi,

i to tɛ́ aà gawi kↄ'ɛ.

17 Isailiↄ Gupua a gↄ̃ tɛ́ ũ,

an Lua Kuaadoade a gↄ̃ tɛ́vua ũ,

i kũ Asili lɛaaↄ ń aà lɛsikaoↄwa gↄↄ do kóũ.

18 A aà likpɛↄ ń aà swaluↄ gawi midɛ míↄ,

aa láa lán gyãe ibabaawa.

19 Lí pↄ́ a gↄ̃ aà likpɛu aↄ dasio,

baa nɛ́fɛ̃nɛna a fↄ̃ a lɛ́ dↄ̃ɛ.

20 Zĩbeezĩ sa Isaili kↄ̃naↄ na gbɛ̃́ pↄ́ lɛ̀lɛmápiↄ kpɛ lↄo.

Yakↄbu bui pↄ́ bↄ̀piↄ,

Dii an Lua Kuaadoade ↄ̃ aa nai ń sĩanao sa.

21 Yakↄbu bui kↄ̃naↄ ɛa su,

gbɛ̃́ kↄ̃napiↄ ɛa zɛ ń Lua Gbãadeo.

22 Isailiↄ, baa tó á gbɛ̃́ↄ dasi lán ísialɛ ũfãawa,

an kↄ̃naↄ mɛ́ aa ɛa su.*

Pisaboa looaála kɛ́ yã́zɛde e kɛ zài yã́i.

23 Asa Dii Lua Zĩgↄ̃de mɛ́ a mↄ́

ń kaalɛ pↄ́ a dìlɛo á bùsuu píi.

24 A yã́i tò ma Dii Lua Zĩgↄ̃de ma mɛ̀:

Ma gbɛ̃́ pↄ́ kú Siↄnaↄ,

Asiliↄ á gbɛ̃ ń flão,

aa go'ↄ sɛ́ázi lá Egipiↄ kɛ̀wa,

ãma ásu vĩakɛnɛ́o.

25 Asa à gↄ̃̀ yↄↄ kɛ́ ma pↄ weewá,

mi gbasa pↄkũmabↄbↄmá mà ń dɛdɛ.

26 Dii Zĩgↄ̃de a fɛlɛmá ń flàalao,

lá à Madiãↄ gbɛ̃̀ Ɔlɛbu gbɛ saɛwa.

A a go poo ísiaa,

là a kɛ̀ Egipiↄnɛwa.

27 Zĩbeezĩ a ń aso go á gã̀u,

a ń zuu bↄɛ́ á nↄɛ à ɛ́'ɛ.

Asiliↄ mↄa lɛ́lɛi Yelusalɛũwa

28 Aa ku Ayata,

aa bↄ̀lɛ ń Migↄ̃nↄo,

aa ń asoↄ kàlɛ Mimasa.

29 Aa bↄ̀lɛ ń gbɛbↄlɛo,

aa bòokpà Gɛba,

Lamadeↄ lɛ́ lualua,

Gibɛa Saulu wɛ̃́lɛdeↄ lɛ́ bàalɛ.

30 Galiũdeↄ, à búbuapɛ!

Laisideↄ, à swã́kpa!

Waiyoo Anatodeↄ!

31 Mademɛnadeↄ lɛ́ tílɛ,

Gebiũdeↄ lɛ́ ulɛkĩi wɛɛlɛ.

32 Gↄↄ bee aa pila Nↄbu,

aa ń gã gbãɛ Yelusalɛũdeↄnɛ Siↄna gbɛ̀sĩsĩ musu.

33 Gwa! Dii Lua Zĩgↄ̃de

ali lɛsĩpiↄ zↄ̃,

ali zↄ̃ↄpiↄ nɛ́,

an gↄ̃naↄ kwɛ wìliũ.

34 A dào likpɛpi zↄ̃zↄ̃ ń mↄoo,

likpɛpi i kwɛ Lua Gbãade aɛ.