Bibeli Luayãtaalá Isaia 29

Yã́ pↄ́ a Yelusalɛũdeↄ le

1 Waiyoo Aliɛli!

Aliɛli wɛ̃́lɛ pↄ́ Davidi zↄ̃̀lɛu!

I dikpɛkɛ wɛ̃ ń wɛ̃o, álɛ gɛ́.

2 Ń beeo má Aliɛli da taasiu.

Wa búbuapɛ, wa búbuapɛ,

Aliɛli i gↄ̃mɛɛ sa'okĩi kĩna ũ.

3 Má koe'ↄpooi, mí ɛyↄ̃ liai,

mí gbà lɛsĩ dai.

4 Wa ↄnaalɛwá,

á yã'oa i gↄ̃ dↄ tↄↄlɛu,

á lↄↄ i gↄ̃ wíwia bùsuu.

Á yã'oa aↄ bↄ tɛ̃́ɛnau lán gɛngbãgbãnawa,

á kĩ́i aↄ dↄ bùsutiu kpã́ikpãi.

5 Ń beeo á ibɛɛ dasipiↄ gↄ̃ lán luutɛ̃waɛ,

gbɛ̃́ pãsĩpiↄ aaↄ dɛ lán ése ṹa pↄ́ ĩ́ana lɛ́ gɛ̃ò zɛ́awaɛ.

Yã́pi a ń le kpóokpoo kã́ndoɛ.

6 Ma Dii Zĩgↄ̃de má mↄ ĩadamá

ń loupũnaao ń tↄↄlɛ lualuaao

ń kↄ̃fĩ zↄ̃ↄo ń zàa'ĩanao

ń zàao ń tɛ́lɛpiↄ pↄkaalɛnao.

7 Bui dasi pↄ́ mↄ̀ lɛ́lɛi Aliɛliwaↄ gↄ̃ lán nana yã́wa,

gbɛ̃́ pↄ́ mↄ̀ a bĩ́i gbooi aa koezↄ̃iↄ gↄ̃ lán wɛ́pungu'ea yã́wa.

8 Lá nↄandɛna ì nana'o à e álɛ pↄble,

ↄ̃ ì vu ń nↄanao,

lá imidɛna ì nana'o à e álɛ imi,

ↄ̃ ì vu yɛ̃̀ɛɛsai kòlo gagaa,

màa aↄ dɛ ń bui dasi pↄ́ lɛ́ mↄ́ Siↄna gbɛwa ń zĩopiↄ.

9 Àↄ gɛ́ ń yãdiawáo,

àↄ gɛ́ ń yã́ tↄ̃awáo,

à tó á vĩ̀akɛ àↄ gɛ́!

Á kua bùubuu aↄ gɛ́,

i kɛ vɛ̃ɛ mɛ́ lɛ́ á dɛo.

Á tàlaatalaaboa aↄ gɛ́,

i kɛ í gbãa yã́i no.

10 Asa Dii kpasa'i zↄ̃ↄ dàálaɛ.

Ãnabiↄ mɛ́ á wɛ́ ũ,

ↄ̃ a tò wɛ́piↄ lɛ́ gu'e lↄo.

Gu'enaↄ mɛ́ á mi ũ,

ↄ̃ à pↄkùaɛ́.

11 Ãnabikɛyãɛ bee dɛɛ́ yã́ pↄ́ kú taala nanaau ũ píi. Tó á kpà kyokɛnawa aà a kyokɛ, a mɛ á fↄ̃o, asa a nanaaɛ. 12 Tó á kpà kyodↄ̃nsaiwa aà a kyokɛ, a mɛ á kyó dↄ̃o.

13 Ma Dii ma mɛ̀ bui bee ì sↄ̃mazi

à ma kpɛla ń lɛ́oɛ, an sↄ̃ kuao.

Aaì ma sísi gbɛ̃nazĩna yãdilɛaↄwaɛ.*

14 A yã́i má ɛa yãbↄnsaɛↄ kɛnɛ́,

má ↄ̃nↄdeↄ ↄ̃nↄ midɛ,

má wɛzɛ̃naↄ wɛzɛ̃ suumpa.†

15 Waiyoo gbɛ̃́ pↄ́ aaì yã́ pↄ́ aalɛ yáↄ ulɛmɛɛ zã̀zã,

aaì ń yã́ↄ kɛ gusiau aaì mɛ:

Démɛ lɛ́ wá ei?

Démɛ wá yã́ dↄ̃i?

16 Yãfuangbanaↄ!

Álɛ e oobona dɛ lán gĩwaɛ.

Pↄ́ pↄ́ wa bò a o a bonaɛ i a booa?

Oo a o a kùunaɛ a yãe dↄ̃oa?‡

17 À gↄ̃̀ yↄↄ kɛ́ Libã a gↄ̃ bugbɛ ũ,

mɛ́ bugbɛ a gↄ̃ likpɛ ũ.

18 Gↄↄ bee swãdoↄ taalapi yãma,

vĩ̀aↄ bↄ gusia níiniiu aa gu'e.

19 Taasideↄ pↄ a ɛa kɛ na Diiwa,

wɛ̃nadeↄ pↄnakɛ ń Isailiↄ Lua pↄ́ a kua adoao.

20 Gbɛ̃́ pãsĩↄ gɛ̃lɛ,

gbɛ̃́laanikɛnaↄ midɛ.

Gbɛ̃́ pↄ́ an mɛ wã̀ ń vãioↄ kaalɛ,

21 gbɛ̃́ pↄ́ aaì yãdↄ gbɛ̃́wa,

aaì baikpa yãnadeɛ yã́kpalɛkɛkĩi,

aaì yãda yãesaidela ń ɛɛopiↄ.

22 Ayãmɛto Dii pↄ́ Ablahaũ bↄ̀ yã́ɛ bee ò Yakↄbu buiↄ musu:

Wí a Yakↄbu buiↄ kũ lↄo,

an gɛɛ a gↄ̃ kpá ń wɛ́i lↄo.

23 Tó an buiↄ ma yãkɛa ń guu è,

aaↄ dↄ̃ kɛ́ ma kua adoa.§

Aa ma dↄ̃ Yakↄbu Lua pↄ́ a kua adoa ũ,

an mɛ i kukɛ ma Isailiↄ Lua aɛ.

24 Gbɛ̃́ pↄ́ an nↄ̀sɛ lìaaↄ ↄ̃nↄkũ,

yã́kũtɛ̃kanaↄ lɛdama ma.

* 29:13 Mat 15.8-9, Maa 7.6-7 † 29:14 1Kln 1.19 ‡ 29:16 Isa 45.9 § 29:23 Mat 6.9