Bibeli Luayãtaalá Isaia 34

34

Yã́kpalɛkɛa ń dṹniao Ɛdↄũ

1 Bui ń buio à sↄ̃ kãi à yãma,

bùsu píi gbɛ̃́ↄ à swã́kpa,

dṹnia ń gbɛ̃́ pↄ́ kú a guuↄ à yãma,

tↄↄlɛ ń pↄ́ pↄ́ bↄ̀lɛwàↄ píi.

2 Asa Dii pↄ pà bui píizi,

à fɛ̃̀ ń ń zĩgↄ̃ↄ.

A ń dɛdɛ, i ń míↄnzↄ̃.

3 Wa gbɛ̃́ pↄ́ wà ń dɛdɛↄ kↄ́lɛ,

gbɛ̀sĩsĩↄ ń au mi, an gɛↄ gĩdↄ.

4 Saanaↄ yↄ musu píi,

luabɛ a koo lán pɛwa,

musupↄↄ wolo lán vɛ̃ɛlaↄwa,

aa kwɛ lán kaadↄɛnlaↄwa.

5 Dii fɛ̃nda gà ń auo musu.

Gwa! Àlɛ su Ɛdↄũwa yã́kpalɛkɛi,*

àlɛ mↄ́ pilai gbɛ̃́ pↄ́ àlɛ ń míↄnzↄ̃piↄwa.

6 Dii fɛ̃nda tã̀ ń ble ń são auo,

sãsa gòle nísi ìwà,

asa Dii sa'oa vĩ Bↄzɛla,

aà pↄ́ kòlokpakpaa dasi Ɛdↄũ.

7 An zùsɛ̃lɛↄ ń ń zuswanaↄ kwɛ́ńnↄ sãnu

ń ń gbãadeↄ píi,

an bùsu i ga ń auo,

nísi i i ń tↄↄlɛwa.

8 Asa Dii tↄsimagↄↄɛ,

aà ĩadama wɛ̃̀ɛ yã́sia ń Siↄnao yã́i.

9 Ɛdↄũ swaↄ li kↄtaa ũ,

a bùsuti a li ĩatɛ̃gbↄ̃ ũ,

an bùsu i gↄ̃ lán kↄtaa tɛ́wa.

10 Aↄ gaa vĩo fãanɛ ń gwãasĩnao,

a súɛlɛ aↄ dↄ gↄↄpiiɛ.†

Wɛ̃ ń wɛ̃o aↄ da wáiwaiɛ,

gbɛ̃e a a baa vĩ lↄo.

11 Gáuↄ ń kpↄbↄ'ilɛnaↄ kɛ ń kúkĩi ũ,

koohũhũnaↄ ń gbagbaaↄ sakpɛda we.

Dii a guyↄ̃bↄ poowà, i gↄ̃ da pã,

a gwa ń gĩsusugwabao, i gↄ̃ gii.

12 Kía buiↄ ku wà ń kpá kpalau lↄo,

an dↄaanaↄ gɛ̃lɛ míↄ.

13 Kàelɛↄ ń lɛaaↄ kúlɛ ń kpɛ́ gbãaↄwa,

lɛsikao ń gàagaao a da ń zɛgikĩiↄla.

Aↄ dɛ gbɛ̃gbonaↄ tòo ũ, kooↄ bɛ ũ.

14 Àwalɛwanaↄ ń maiↄ kpaaũ we,

tã́aↄ fↄkpakpakↄ̃wa,

babayↄ̃ɛↄ zↄ̃lɛkĩi eu, aaↄ kálɛu.

15 Bãso a sakpɛ da we à gbedau,

a nɛpipi, i ń kãaa a zíɛ.

Yãamusuↄ kↄ̃ nↄnↄaau,

sa ìↄ tɛ a nai.

16 À wɛɛlɛ Dii taala guu,

à a kyokɛ,

an kee a kɛ̃́são,

a dae a kua a sawao,

asa aà lɛ́ mɛ́ ò,

aà Nisĩna mɛ́ a ń kãaa.

17 Ɔ̃mɛ ń baa kpàmá,

à ↄdↄ̀ ń baadeɛ a kúkĩiwa.

A gↄ̃ ń pↄ́ ũ gↄↄpii,

aaↄ ka a guu wɛ̃ ń wɛ̃o.

* 34:5 Isa 63.1, Mal 1.4 † 34:10 Zia 14.11, 19.3