Bibeli Luayãtaalá Isaia 46

46

Babɛli diiↄ kↄ̃'ea ń Luao

1 Bɛli lɛ́ su zĩ́lɛ,

Nɛbo lɛ́ naalɛ,

an tã́a pↄ́ zuↄ sɛapiↄá asoɛ,

aa kpàsa ń a sɛao.

2 Zupiↄ lɛ́ naalɛ, aalɛ su zĩ́lɛ,

aalɛ fu asowa sãnusãnu,

ↄ̃ tã́apiↄ lɛ́ gɛ̃zɛa zĩ̀zↄↄ ũ.

3 Yakↄbu buiↄ, à ma yãma!

Isaili kↄ̃na pↄ́ má á sɛa za nↄ̀sɛu,

má á zↄ̃a ma gã̀u za nɛasakpɛupiↄ.

4 E à gɛ zikũò máↄ ku kɛ́waɛ.

E á mikã gɛ può máↄ á kũaɛ.

Mámɛ ma á kɛ́, mámɛ máↄ á sɛa,

mámɛ máↄ á kũa, mɛ́ má á bↄ.

5 Dé álɛ e ma muaaòi?

Dé álɛ e wá sáai?

Dé álɛ e wá doũ, álɛ ma lɛɛũòi?

6 Gbɛ̃́ↄ ì vua bↄ ń sↄ̃̀ↄu,

ge aaì ã́nusu yↄ̃ kiloowa,

ↄ̃ aaì a zĩ da siaɛ aà tã́apionɛ́,

ↄ̃ aaì kúlɛɛ̀ aa misiilɛɛ̀.

7 Aaì sɛ da ń gã̀u aa taò,

aaì dilɛ a pɛ́lɛkĩi,

ↄ̃ ì gↄ̃ zɛa we, ìli go a tíao.

Tó wà lɛzùi, ìli weo,

ìli ń yã'ↄ̃ma bↄnɛ́o.

8 À làasookɛ yã́ɛ beewa,

íↄ kũa á sↄ̃u, swã́gbãadeↄ.

9 À làasookɛ yãzi káauↄwa,

asa mámɛ má Lua ũ, a pãle kuo.

Mámɛ má Lua ũ, diie muaamanↄo.

10 Mi dↄaa yã́ zã̀ kpàwakɛ za káau,

mi yã́ pↄ́ a su mↄ o e àↄ gɛ́ kái.

Mi mɛ yã́ pↄ́ ma zɛò a kɛ,

yã́ pↄ́ má yei píi, má kɛɛ.

11 Má lɛzu bãsoi gukpɛ oi,

má gbɛ̃́pi sísi za bùsu zã̀zãu aà yã́ pↄ́ málɛ yá kɛ.

Yã́ pↄ́ má ò má bↄò saɛ,

yã́ pↄ́ ma zɛò má kɛɛ.

12 Á swã́gbãade pↄ́ álɛ e á zĩblea zã̀ↄ,

à ma yãma.

13 Ma zĩblea gↄↄ zã̀o, à kãikũ̀,

ma gbɛ̃́ↄ suabaa a gↄↄ ga lↄo.

Má tó Siↄna zĩble,

má a gawi pisi Isailiↄwa.