Bibeli Luayãtaalá Isaia 5

Dii vɛ̃ɛbu

1 Má lɛsi ma yenzideɛ aà vɛ̃ɛbu musu.

Ma yenzide vɛ̃ɛbu vĩ sĩ̀sĩ táaede pↄlɛu.

2 À a gu bì à a gbɛↄ kↄ̀lɛ,

à vɛ̃ɛli maaↄ bàu.

À gugwakĩi lɛsĩ dà a guoguo,

à vɛ̃ɛfɛ̃kĩi yↄ̃̀ a guu.*

Aà wɛ́ dↄi à nɛ́ maa iɛ,

ↄ̃ nɛ́ gia a ìɛ̀.

3 Tiasa Yelusalɛũdeↄ ń Yudaↄ,

à yã́gↄ̃gↄ̃wɛ̃ɛ, mapi ń ma vɛ̃ɛbuo.

4 Yã́ kpele mɛ́ gↄ̃̀ mà kɛ ma vɛ̃ɛbuɛ,

mɛ́ mi kɛo ni?

Ma wɛ́ dↄi aà nɛ́ maa imɛɛ.

Bↄ́yãi à nɛ́ gia ìmɛɛi?

5 Tiasa má oɛ́ lá má kɛ ma vɛ̃ɛbuɛ:

Má a kaa gbooɛ, wi a ↄ̃̀ↄkpa,

má a bĩ́iↄ daaĩɛ, wi ↄ̃zↄ̃wà.

6 Má pãkpaiɛ̀,

wa a líↄ mibo lↄo, wa a sɛ̃wao.

Lɛaa ń lɛsikaoo mɛ́ a fɛlɛ we,

mɛ́ má o louɛ asu ma we lↄo.

7 Isailiↄ mɛ́ Dii Zĩgↄ̃de vɛ̃ɛbupi ũ,

Yudaↄ mɛ́ kaa pↄ́ ì pↄnakɛò ũ.

Yã́zɛde a wɛ̀ɛlɛ, ↄ̃ gbɛ̃dɛa mɛ́ kↄ̃̀,

aà wɛ́ dↄ maakɛai, ↄ̃ búbua mɛ́ dↄ.

Waiyoo vãikɛnaↄ

8 Waiyoo gbɛ̃́ pↄ́ aaì kpɛ́ nanakↄ̃wa,

aaì bú pɛ́pɛkↄ̃lɛ e gu láa,

aaì gↄ̃ bùsu vĩ ńdoↄ.

9 Dii Zĩgↄ̃de ò, ma swã́ mà à mɛ̀:

Ua yàlalapiↄ gↄ̃ uazĩ ũɛ,

bɛ zↄ̃ↄ maapiↄ gↄ̃ bɛzia ũɛ.

10 Baa vɛ̃ɛbu bà kwi,

a vɛ̃ɛ a ka litili baoo,

pↄ́wɛna zaa lɛ basↄo tↄ̃a guu,

lɛ kwi wa e.

11 Waiyoo gbɛ̃́ pↄ́ aaì fɛlɛ kↄↄkↄↄ

wàↄ kpálɛkɛ í gbãai,

aaì gɛ̃gɛ̃ vɛ̃ɛi gwãasĩna

e à gɛ̀ fɛ̀lɛńnↄↄ.

12 Mↄↄna ń kotilio ń gã̀ao ń kulɛo

ń vɛ̃ɛo ↄ̃ aaì pↄnakɛò.

Aali Dii yãkɛaↄ dao,

aali làasookɛ zĩ pↄ́ a kɛ̀ↄwao.

13 Ma gbɛ̃́ↄ ↄ̃nↄkɛ̃sãama yã́i

wa ń sɛ́lɛ táńnↄɛ.

An gbɛ̃́ gbiaↄ gaga ń nↄanaoɛ,

imi a ń daside dɛ.

14 A yã́i tò bɛda lɛ́ vù,

à lɛ'ɛ̀lɛ à gɛ̃agɛ̃̀.

An gawideↄ ń ń dasideↄ siu we,

ń ń zↄadeↄ ń ń pↄnakɛnaↄ sãnu.

15 Gbɛ̃nazĩnaↄ gↄ̃ suuunnↄ,

aa gↄ̃ yɛ̀ɛɛ,

waladeↄ gɛɛ a gↄ̃ kpá ń wɛ́i.

16 Dii Zĩgↄ̃de a tↄbↄ yã́zɛde guu,

Lua Kuaadoade a a kuaadoakɛ ↄlↄnɛ́ yãkɛa a zɛ́wa guu.

17 Sãↄ i gbasa aaↄ kú ń dã́dãkɛkĩi,

sãnɛbↄlↄnaↄ pↄble ↄdeↄ bɛziapiu.

18 Waiyoo gbɛ̃́ pↄ́ aaì yãvãi dↄ ń pi ń mↄafilio,

aaìↄ ń duuna gálɛ ń kpɛ lán zugowaↄ.

19 Aaì mɛ: Yã́ pↄ́ Lua kũa,

aà bↄò kpakpa wà wɛsiɛ.

Yã́ pↄ́ Isailiↄ Lua Kuaadoade lɛ́ yá mↄ́ wà e.

20 Waiyoo gbɛ̃́ pↄ́ aaì mɛ vãiɛ maa

mɛ́ aaì mɛ maaɛ vãiↄ.

Aaì gusia dilɛ gupua ũ

mɛ́ aaì gupua dilɛ gusia ũ.

Aaì ĩ́i dilɛ na ũ

mɛ́ aaì na dilɛ ĩ́i ũ.

21 Waiyoo gbɛ̃́ pↄ́ aaìↄ e wà kà,

aaì ńzĩa dilɛ ↄ̃nↄna ũↄ.

22 Waiyoo gbɛ̃́ pↄ́ aa tↄbↄ̀ wɛ̃mia guuↄ

ń gↄ̃sa pↄ́ aa í gbãa yãalɛa dↄ̃ↄ.

23 Aaì yãnakpa tàaedeↄwa gbagusaɛ yã́i,

aaì gbɛ̃maaↄ yã́ málɛnɛ́.

24 A yã́i tò lá tɛ́ ì áwa sãsã

mɛ́ sɛ̃ ì kwɛ́ tɛ́ guu,

màa an zĩ́naↄ yↄ́,

an vúↄ gɛ̃ ń ĩ́anao lán luutɛ̃wa,

asa aa gì Dii Zĩgↄ̃de ikoyãi,

aa sakà Isailiↄ Lua Kuaadoade yã́uɛ.

25 A yã́i Dii pↄkũmabↄ̀bↄ a gbɛ̃́ↄwa,

à ↄ ue sùmá à ń gbɛ̃́.

Gbɛ̀sĩsĩↄ dèe,

an gɛↄ gↄ̃̀ kálɛ bàasi lán bìsawa.

Ń beeↄ píi aà pↄkũma i kpálɛo,

aà ↄ gi looańlaɛ.

26 Dii gudↄkↄ̃ɛkĩi dìlɛ bui zã̀zãↄnɛ,

à swe pɛ̀ gbɛ̃́ pↄ́ kú tↄↄlɛ lɛ́waↄzi.

Gwa, aalɛ mↄ́ wãawãa dìoo.

27 An gbɛ̃e i kpasao,

an gbɛ̃e i gɛ̃nalɛo.

An gbɛ̃e lɛ́ igofampao,

i lɛ́ ń gbɛ̃e dɛdɛo.

An gbɛ̃e pↄdↄmpi i fɛ̀ɛsio,

an gbɛ̃e kyaleba i kɛ̃o.

28 An kaↄ lɛna, an sáↄ kãa píiɛ,

an sↄ̃́ↄ swɛ gbãa lán gbɛsiwa,

an sↄ̃́goↄ gbá lɛ́ liasãizↄ̃ lán zàawa.

29 An kↄ̃fĩ dↄ lán nↄ̀ↄmusuↄwa,

aalɛ pũna lán nↄ̀ↄkusi bↄlↄↄwa.

Aalɛ lɛ́ kú pↄ́wa ń palaao,

aalɛ taò, gbɛ̃e a fↄ̃ gɛ́ síio.

30 Zĩbeezĩ aaↄ pũnamá lán ísia pũnaawa.

Tó n bùsupi gwà,

gusia ń yooyeao mɛ́ aↄ ku we,

gu a sisi luabɛsiana yã́i.