Bibeli Luayãtaalá Isaia 56

56

Bui píi suabaa

1 Ma Dii ma mɛ̀:

À zɛ ń yã́zɛdeo,

í yãkɛ a zɛ́wa,

asa ma sↄu mà ń á suabaao,

má làa ń á bↄa maao.

2 Báaaden gbɛ̃́ pↄ́ lɛ́ bee kɛ

a yã́pi kũa ũ.

Ìli kã́mabogↄↄ pↄ́ má dìlɛ gbãlɛo,

à ↄbↄ̀lɛ vãi píiu.

3 Buipãle pↄ́ nàa su o

má we à gɛ̃ ma gbɛ̃́ↄ guuoo.

Gbɛ̃́ pↄ́ a lɛ wia su mɛ

lí giin a ũo.

4 Asa ma Dii ma mɛ̀:

Tó gbɛ̃́ pↄ́ wà ń lɛ wìↄ ma kã́mabogↄↄ yãdà,

tó aa zɛ̀ ń ma pↄeão,

mɛ́ aa ma bàakuańnↄ yã́ kũa,

5 má ↄgbɛkɛnɛ́ ma kpɛ́u,

an maa aↄ dɛ nɛgↄ̃ɛↄ ń nɛnↄɛↄla,

má ń tↄ́ na kɛ̃ a gĩↄwa,

tↄ́pi aↄ láaa vĩo, a ga bauo.

6 Buipãle pↄ́ aa nàa aa zĩkɛmɛɛ,

aa ye ma tↄ́i aa zↄblemɛɛↄ,

aali kã́mabogↄↄ pↄ́ má dìlɛ gbãlɛo,

aa ma bàakuańnↄ yã́ kũaↄ,

7 má gɛ́ńnↄ ma sĩ̀sĩ pↄ́ a kua adoa musu,

má tó an pↄ kɛ na ma sísikpɛu.

Má ń sa pↄ́ aaì o ma gbagbakĩiↄ sí

ń sa pↄ́ wì a pↄ́ kátɛu à tɛ́kũↄ,

asa wa mɛ ma kpɛ́ɛ bui píi lousisikpɛ.*

8 Ma Dii Lua pↄ́ mi Isaili zĩ̀zↄↄ kãaa ma mɛ̀

má ɛa gbɛ̃́ↄ kãaa kã́fĩ gbɛ̃́ pↄ́ kã̀aaↄ guu.

Lua yã́kpalɛkɛa ń ãnabi vãiↄ

9 Sɛ̃̀a nↄ̀bↄↄ píi, à mↄ pↄble

ń lákpɛ nↄ̀bↄↄ píi.

10 Isaili gudↄ̃anaↄá vĩ̀aↄnɛ píi,

aa a kee gbáɛo,

gbɛ̃ lɛ́nanaalɛaↄnɛ, aali gbokɛ dↄ̃o,

aaìↄ wúlɛa ń nana'oao, aa ye ii.

11 Gbɛ̃ asiadeↄnɛ, blɛ lí mↄ́máo,

dↄaana pↄ́ yãe dↄ̃oↄnɛ.

An baade a pↄeã zɛ́ sɛ̀,

an baade zĩa mì mɛ̀ndo ài àlɛ wɛɛlɛ.

12 Aaì okↄ̃ɛ: À mↄ wà vɛ̃ɛ wɛɛlɛ,

wà í gbãa mi wà a dɛ kɛ.

Pↄ́ pↄ́ mↄ̀ ń gbão a mↄ́ ń ziao,

iↄ dɛ gbã pↄ́ɛ beea maamaa.

* 56:7 Mat 21.13