58
Lɛyea sĩande
1 Wii lɛ́ gbã́ugbãu,
ńsu ǹ nzĩa kṹkũo.
Ǹ n lↄↄ fɛlɛ musu lán kuu'ↄwa.
Ma gbɛ̃́ↄ tàae kpàwakɛnɛ́,
Yakↄbu buipiↄ duunaↄ onɛ́.
2 Aaìↄ ma kĩ́i wɛɛlɛ lá gu lɛ́ dↄ,
an mɛ̀sa ì wã ma yãkɛaↄ dↄ̃ai
lán bui pↄ́ ì yãkɛ a zɛ́wa
ìli pãkpa a Lua yãdilɛaↄziowa.
Aaì yã́gↄ̃gↄ̃a a zɛ́wa gbɛaa,
aaìↄ ye mà sↄ̃ńzi.
3 Ɔ̃ aaì ma la: Bↄ́yãi wa lɛyèi,
kɛ́ ńlɛ wá gwao ni?
Bↄ́yãi wa wázĩa bùsainɛ,
kɛ́ ń wá fãn vĩo ni?
Gwa! Á lɛyegↄↄ i ázĩa pↄeã kɛ,
mɛ́ i á zĩkɛnaↄ wɛtã píi.
4 Gwa! Á lɛyea ì midɛ ń lɛkpaao ń sòleo,
i kↄ̃ gbɛ̃ ń ↄkũ gbãao.
Á fↄ̃ lɛye lá álɛ kɛ gbãɛwa
mà á lↄↄ ma musue?
5 Lá ma lɛye dìlɛn wee?
Zĩabusaa ado yã́ nɛe?
I kɛ mipɛlɛa lán kpootɛ̃wa
ge wúlɛa túfuu ń zwã̀nkasa kákaaálao yã́ no.
Pↄ́ pↄ́ i mɛ lɛyen wea?
Bee mɛ́ ì kamagua?
6 Lɛye pↄ́ má dìlɛ min kɛo lò?
À vãikɛnaↄ gala polo gbɛ̃́ↄwa,
à zuubↄlɛ gbɛ̃́ↄnɛ,
à gbɛ̃́ pↄ́ wàlɛ ↄtↄ̃máↄ gbaɛ,
í gbãamↄa gbɛ̃́ↄnɛ midɛ píi.
7 À blɛli nↄandɛnaɛ,
à wɛ̃nade bɛsaide dilɛ.
Tó a gbɛ̃́ è bɛ puizi, à pↄ́ nai.
Tó i bàalɛ á mɛdoũdeɛo,
8 gu a puɛ́ lán ĩatɛ̃ bilɛawa,
á gↄ̃a maa a bↄlɛ àannↄ,
á maakɛa a zɛmikũɛ́,
ma gawi iↄ tɛ́ á kpɛ.
9 Tó a lɛzùmazi sa, má wewá,
tó a wiilɛ̀mazi, má oɛ́: Má kɛ́!
Tó a gbãamↄa gbɛ̃́ↄnɛ mìdɛ á guu
ń ↄtondↄakↄ̃wao ń yãpãsĩ'oao,
10 tó a nↄandɛna gbà á pↄeã blɛ,
mɛ́ a pↄ́ kpà wɛ̃nadewa à kã̀,
gu a puɛ́ gusiau,
gubeebee a gↄ̃ɛ́ lán fãanɛwa,
11 míↄ dↄaaɛ́ gↄↄpii.
Má tó pↄ́ mↄ́wá gu tɛ́kũau,
má á wá baasaɛ́,
íↄ dɛ lán swalu mↄ̀sɛdewa,
lán nibↄna pↄ́ a í lí baowa.
12 Á á bɛzia zi fɛlɛ,
á á wɛ̃́lɛ pↄ́ kálɛa à gɛ̃̀gɛ̃ vu,
wi mɛɛ́ bĩ́igbooa ń uazĩↄ kɛ̀kɛnaↄ.
13 Tó álɛ gbabↄ kã́mabogↄↄzĩo,
mɛ́ álɛ ázĩa pↄeã kɛ ma gↄↄpiwao,
tó a mɛ̀ kã́mabogↄↄzĩ na,
mɛ́ a ma gↄↄpi dìlɛ gbia,
tó á dìlɛ gbia mɛ́ a á bↄↄlɛ tò,
tó i ázĩa pↄeã kɛuo,
mɛ́ i yãyaaabↄlɛuo,
14 á pↄ́ a kɛa na,
mí tó àↄ kible bùsu gulɛsĩↄu,
mí tó à á dezi Yakↄbu túbible.
Ma Dii ma lɛ́ mɛ́ ò.