Bibeli Luayãtaalá Isaia 60

60

Siↄna gawi zia

1 Fɛlɛ tɛkɛ, asa n gupua mↄ̀,

Dii gawi pìsima.

2 Gwa! Guluuluu kù dṹniaa,

gusia kùlɛ a gbɛ̃́ↄwa.

Mpi sↄ̃, Dii a bilɛma,

aà gawi i bↄma.

3 Buiↄ mↄ n gupuau,

kíaↄ sↄ̃ n pípia í gbãai.

4 Wɛzu gugwa ǹ liai,

aa kã̀aa píi, aalɛ mↄ́ n kĩ́i.

N nɛgↄ̃ɛↄ bↄ̀ za zã̀zã, aalɛ su,

wa n nɛnↄɛↄ naaa ń gbã̀tɛ̃ɛu, wàlɛ suńnↄ.

5 Tó n bee è, n pↄna a pisi n oawa,

n nↄ̀sɛ a yáalↄ kua nzĩa dakĩiwa.

Wa n gba ísia baa àizɛɛↄ,

wa mↄnɛ ń buiↄ pↄmaaↄ.

6 Yiongo waiↄ li n bùsua,

Madiã ń Efa bùsu yiongo nɛ́ bↄlↄↄ.

Seba bùsudeↄ mↄ píi

vua ń tulaleti gĩnanaↄ sɛa,

aalɛ ma yãkɛaↄ baokpa.

7 Wa Kedaa bùsu pↄtuoↄ kãaanɛ píi,

wa Nɛbaioↄ sãsaↄ kpama ǹ n bↄↄlɛkɛò,

wi sa pↄ́ ì kamagu oò ma gbagbakĩiwa,

mí a kpɛ́ gawide gawi kã́fĩò.

8 Bↄ́mɛ táa'ò lɛ́ su lán louwa,

lán felenguuluↄ sua ń kpɛ́uwa keei?

9 Ísiabaadeↄ lɛ́ kãaamazi we,

ísia gó'ilɛnaↄ mɛ́ zɛmikũa we.

Aa bↄ̀ ń n nɛ́ↄ za zã̀zã,

aalɛ mↄ́ ń ń ã́nusuↄ ń ń vuaↄ

ma Dii n Lua tↄbↄi,

asa ma Isailiↄ Lua ma kua adoaɛ,

má gawi pisima.

10 Buipãleↄ ɛa n bĩ́iↄ bo,

an kíaↄ zĩkɛnɛ.

Baa kɛ́ ma n gbɛ̃ ń pↄfɛ̃o yãa,

má wɛ̃nadↄ̃nɛ ma sùuu yã́i sa.

11 N bĩ́ibↄlɛↄ aaↄ wɛ̃aɛ gↄↄpii,

aaliↄ taao fãanɛ ń gwãasĩnao,

kɛ́ buiↄ mↄnɛ ń ń àizɛɛↄ

ń ń kíaↄ kpán'aɛkɛa.*

12 Asa bui ge kpala pↄ́ i zↄblenɛo a midɛɛ,

wa ń bùsuↄ dɛɛlɛmpa míↄmiↄ.

13 Wa mↄnɛ ń Libã bùsu gawio,

pɛ̃liↄ ń kpɛ̃liↄ ń sɛ̃́liↄ píi,

kɛ́ mà e zãbleò ma kúkĩiwa,

ma gbadibↄpi iↄ gawi vĩ.

14 N wɛtãna nɛ́ↄ mↄ kúlɛnɛ,†

gbɛ̃́ pↄ́ aa sakàngupiↄ wúlɛnɛ n gbázĩ,

aai onɛ Dii wɛ̃́lɛ

Siↄna pↄ́ Isailiↄ Lua pↄ́ a kua adoa kàlɛ.

15 Baa kɛ́ gbɛ̃́ↄ zàngu yãa

aa pãkpànzi,

gbɛ̃eli gu baavĩ n guuo,

má n kɛ ĩ́andãbↄ láasai ũ,

gbɛ̃́ↄ iↄ pↄnakɛò e ń buiwa.

16 Ńyↄ̃ buiↄ vĩ mi,

an kíaↄ yↄ̃́ kpama,

níↄ dↄ̃ mámɛ máa Dii n Suabana ũ,

Yakↄbu Lua gbãade n Bona ũ.

17 Má mↄ́ ń vuao mↄgotɛ̃ gbɛu,

ã́nusu sↄ̃ mↄsi gbɛu.

Má mↄ́ ń mↄgotɛ̃oli gbɛu,

mↄsi sↄ̃ gbɛ gbɛu.

Má aafia dilɛnɛ n laaidↄmade ũ,

má yã́zɛde danɛ n gbãade ũ.

18 Wa yãpãsĩ súu ma n bùsuu lↄo,

ásoo ń músio a sↄ̃ n bùsu zↄ̃lɛio.

Wa tↄ́kpa n bĩ́iɛ Suaba,

n bↄlɛↄ sↄ̃ Táasi.

19 Ĩatɛ̃ ali gupunɛ fãanɛ lↄo,

mↄvua í gbãa a gupunɛ lↄo.

Ma Dii mámɛ máↄ dɛ n gupua ũ gↄↄpii,

mapi n Lua, mámɛ máↄ dɛ n tɛkɛa ũ.‡

20 N ĩatɛ̃ a gɛ̃ kpɛ́u bauo,

mɛ́ n mↄ a ↄsikɛo,

asa mámɛ máↄ dɛ n gupua láasai ũ,

n ↄↄlↄ a midɛ sa.

21 N gbɛ̃́ↄ aaↄ maa píiɛ,

mɛ́ aaↄ bùsu vĩ gↄↄpii.

Aaↄ dɛ lí pↄ́ má bà vlãpaa ũ,

ma ↄgbɛ ũ ma zãblea yã́i.

22 An gbɛ̃́ pↄ́ kɛ̃́sãańzi

a kↄ̃ à ka gbɛ̃ↄn ↄ̀aa sↄo,

an gbɛ̃́ pↄ́ kpɛɛ ń guu,

a gↄ̃ bui zↄ̃ↄ ũ.

Mámɛmaa Dii,

má yã́pi kɛ a gↄↄwa ń wãao.

* 60:11 Zia 21.25-26 † 60:14 Zia 3.9 ‡ 60:19 Zia 21.23, 22.5