Bibeli Luayãtaalá Yobu 1

YOBU

Yã́ pↄ́ kú láɛ bee guuↄ

Yobu lá dàalɛ ń yã́ pↄ́ Yobupi lèoɛ (1-2). Yobuá gbɛ̃maaɛ mɛ́ dṹnia pↄ́pii pɛ̀ɛwà. Ń beeo a gi dɛ náaide ũ Luaɛ. Kɛ́ Lua báaadàaàgu yã́i yã̀? Gwa lá aà pↄ́piↄ mìdɛ píi, aà àizɛɛↄ ń aà nɛ́ↄ ń aafia pↄ́ a vĩo ń pↄ́ pↄ́ a vĩↄ píi. Baa kɛ́ àlɛ taasikɛ, à gì lɛ́ Lua náaikɛɛ.

Lua ì sɛ́wanↄ kpelewa ni? Lá Yobu ì yãkɛ a zɛ́wa, bↄ́yãi yãvãipi aà lèii? Aà gbɛ̃na gbɛ̃ↄn àaↄ̃ↄ òɛ̀ aa mɛ̀, tàae pↄ́ a kɛ̀ go mɛ́ lɛ́ aà gbɛ̃. Beewa ↄ̃ aalɛ yã́gaga ń kↄ̃o, yã́pi ku lápi guoguo (3-31). Gbɛ̃ↄn àaↄ̃piↄ lɛ́ fɛlɛkaayãↄ o'o. Yobu sↄ̃ à gì an yã́ pↄ́ aalɛ o beei, ↄ̃ à yã́zãsìmá à mɛ̀: Yã́zɛde kuo, vãikɛnaↄ yã́ mɛ́ ì gɛ́ aɛ. A gì yã́ pↄ́ a gbɛ̃naↄ zɛ̀opiↄi, ↄ̃ à zɛ̀ ń a tàaesaidekɛo.

Gbɛ̃pãle yãsɛ̀ lↄ, aà tↄ́n Ɛlihu (32-37), ↄ̃ àlɛ wɛɛlɛ à yã́ pↄ́ Yobu lɛ́ oↄ ɛɛbo. À mɛ̀ Lua ì yã'ĩa zĩ gbɛ̃nazĩnawa lɛzaawà yã́iɛ, gbɛ̃e a fↄ̃ o Luaɛ̀ aà azĩa yã́ↄ sɛ́lɛ siuɛ sↄ̃o.

Gbɛzã ↄ̃ Lua lɛdà yã́piu azĩa sa (38.1-42.6). I we Yobuwao, ãma à yãgbɛ̀agbɛawà. Yobu yã́ pↄ́ a zãwàↄ dↄ̃̀ sa, à yã́ pↄ́ á a gbadↄ̃o ò.

Lápi yã́ làa ń yã́ pↄ́ Yobu lè gbɛzãoɛ (42.7-17). Lua mɛ̀ Yobu yã́ na dɛ aà gbɛ̃napiↄ pↄ́la, ↄ̃ à ɛ̀a pↄ́ pↄ́ Yobu vĩ yãa kã̀fĩɛ̀ lɛɛ pla.

Setãu kↄ̃nikɛa Yobuɛ sɛ̃́ia

1 Gↄ̃ɛe ku yãa Uzu bùsuu, aà tↄ́n Yobu. Gbɛ̃maaɛ, a tàae vĩo. A Lua vĩa vĩ mɛ́ à mikɛ̃̀ yãvãiwa. 2 A nɛgↄ̃ɛↄ vĩ gbɛ̃ↄn sopla, nɛnↄɛↄ gbɛ̃ↄn àaↄ̃. 3 A sãↄ vĩ mɛ̀n ↄ̀aasↄsↄo lɛɛ sopla, yiongoↄ ↄ̀aa gɛ̃o, zuↄ ↄ̀aa sↄo, zàa'ĩnaↄ ↄ̀aa pla ń basↄoo, mɛ́ aà zĩkɛnaↄ dasi maamaa. Aà zↄ̃ↄ dɛ gukpɛ oi gbɛ̃́piia. 4 Aà nɛgↄ̃ɛↄ ì blɛkɛkↄ̃ɛ bɛ ń bɛo, aaì ń dãepiↄ sísi aa mↄ pↄble aa vɛ̃ɛmińnↄ. 5 Tó aa blɛblè wa làa píi, Yobu ì ń sísi à gbãbↄnɛ́ɛ. Ì fɛlɛ kↄↄkↄↄ ì sa pↄ́ wì a pↄ́ kátɛu à tɛ́kũ o an baadeɛ, ì mɛ: Wìliↄ dↄ̃o ma nɛ́ↄ duunakɛ̀ aa dↄ̀ɛ ń Luao ń sↄ̃u. Màa Yobu ìↄ kɛ gↄↄpii.

6 Gↄↄewa luabɛ gbãadeↄ* mↄ̀ sĩ̀ Dii aɛ, mɛ́ Setãu kú ń guu. 7 Ɔ̃ Dii ò Setãuɛ: N bↄ má ni? A wèwà à mɛ̀: Málɛ bɛbɛ, málɛ liaa dṹniauɛ. 8 Ɔ̃ Dii òɛ̀: N ma zↄ̀blena Yobu èa? Aà sáa kú dṹniauo. Gbɛ̃maaɛ, a tàae vĩo. A ma vĩa vĩ mɛ́ à mikɛ̃̀ yãvãiwa. 9 Ɔ̃ Setãu† ò Diiɛ: Yobu n vĩa vĩ pã nɛe? 10 Ni ↄliaaàzi ń aà bɛo ń pↄ́ pↄ́ a vĩ gupiiuↄo lé? N báaadà aà zĩu, ↄ̃ aà pↄ́ↄ lìgua. 11 Ɔbↄ na aà pↄ́ↄwa píi ǹ gwa, a yãvãi o n musuɛ. 12 Ɔ̃ Dii òɛ̀: Ma aà pↄ́ↄ nànɛ ń ↄzĩ píi, ãma ńsu ↄkã aà mɛwao. Ɔ̃ Setãu bↄ̀ Dii kĩ́i.

13 Gↄↄewa Yobu nɛgↄ̃ɛↄ ń aà nɛnↄɛↄ lɛ́ pↄble, aalɛ vɛ̃ɛmi ń vĩ̀i bɛ. 14 Ɔ̃ gbɛ̃e mↄ̀ Yobu kĩ́i à mɛ̀: Zuↄ lɛ́ sapa mɛ́ zàa'ĩnaↄ lɛ́ sɛ̃ ble ń saɛ, 15 ↄ̃ Sebaↄ lɛ̀lɛmá aa ń naaa wà tàò, aa ń dãnaↄ dɛ̀dɛ ń fɛ̃ndao. Mámɛ ma bↄ mado, ma mↄ a baokpainɛ. 16 I yã'o a làao, ↄ̃ gbɛ̃pãle mↄ̀ à mɛ̀: Lua sù n sã kpàsaↄwa, aa tɛkũ̀, an dãnaↄ gàga. Mámɛ ma bↄ mado, ma mↄ a baokpainɛ. 17 I yã'o a làao, ↄ̃ gbɛ̃pãle mↄ̀ à mɛ̀: Kaladeↄ kↄ̃kpaalɛ̀ gãli àaↄ̃, aa mↄ̀ lɛ̀lɛ n yiongoↄwa, aa ń dãnaↄ dɛ̀dɛ ń fɛ̃ndao. Mámɛ ma bↄ mado, ma mↄ a baokpainɛ. 18 I yã'o a làao, ↄ̃ gbɛ̃pãle mↄ̀ à mɛ̀: N nɛgↄ̃ɛↄ ń n nɛnↄɛↄ lɛ́ pↄble, aalɛ vɛ̃ɛmi ń vĩ̀i bɛ, 19 ↄ̃ zàa'ĩan gbãa kàka à bↄ̀ guwaiwaiu, à sù ń kpɛ́ gola síiↄ̃wa, ↄ̃ à kwɛ̀ kà nɛ́piↄla, aa gàga. Mámɛ ma bↄ mado, ma mↄ a baokpainɛ.

20 Yobu fɛ̀lɛ à a ula ga kɛ̃̀, à a mi bò. Ɔ̃ à wùlɛ a gbɛɛu à misìilɛ Luaɛ 21 à mɛ̀:

Ma bↄ ma da gbɛɛu ↄgiiɛ,

mɛ́ má ɛa ta ↄgiiɛ.‡

Dii kpàa, ↄ̃ à ɛ̀a sìa,

ma sáaukɛ̀ ń Diio.

22 Apii guu Yobu i duunakɛo, i Lua tàae eo.

* 1:6 Ń Ɛbɛlu yã́o wà mɛ̀ Lua nɛ́ↄ. Daa 6.2 gwa. † 1:9 Zia 12.10 ‡ 1:21 1Tim 6.7