Bibeli Luayãtaalá Yobu 12

12

Lua mɛ́ gbãa vĩ

1 Ɔ̃ Yobu yãsɛ̀ à mɛ̀:

2 Sĩanaɛ, ámɛ a maa gbɛ̃́ↄnɛ sa lá!

Ɔ̃ álɛ e tó a ga, ↄ̃nↄ mìdɛn we.

3 Mapi sↄ̃ má nↄ̀sɛ vĩ lááwaɛ,

má kɛ̃́sãaázio,

démɛ a fu yã́ pↄ́ álɛ oↄwai?

4 Ma gbɛ̃́ pↄ́ ma lɛzù Luazi a wèa,

ma gↄ̃ pↄ́ yáalↄa ũ ma gbɛ̃naↄnɛ.

Ma gbɛ̃́ pↄ́ ma yã́ na mɛ́ má tàae vĩo,

ma gↄ̃ pↄ́ yáalↄa ũ.

5 Gbɛ̃́ pↄ́ aa ku niɛniɛↄ

ì gbɛ̃́ pↄ́ músi ń léↄ gwa pãɛ,

aaì saka gbɛ̃́ pↄ́ kpàguaↄgu.

6 Gbɛ̃blenaↄ sↄ̃ aaìↄ zↄ̃lɛa ń bɛ ń laaiwa,

lualɛwɛna pↄ́ an gbãa dɛ ń lua ũpiↄ ìↄ ku dↄdↄa.

7 À gɛ nↄ̀bↄↄ la, aai yãdaɛ́,

à gbɛa bãↄwa, aai oɛ́.

8 À yã'o ń tↄↄlɛo, i ↄ̃nↄ daɛ́,

à to kpↄↄ sɛ́lɛ siuɛ́.

9 Pↄ́piↄ píi, an kpele mɛ́ gí dↄ̃i

kɛ́ Lua mɛ́ pↄ́pii kɛ̀ ń a gbãaoi?

10 Pↄ́pii wɛ̃ni ku aà ↄzĩɛ

ń gbɛ̃́pii nisĩnao.

11 Lá lɛ́na ì pↄ́ í dↄ̃,

màa swã́ ì yã́ dↄ̃kↄ̃ɛ.

12 Gbɛ̃́ ziↄ mɛ́ ↄ̃nↄ vĩ,

gbɛ̃́ pↄ́ wɛ̃ kɛ̀ↄ wɛ́ mɛ́ zɛ̃a.

13 Ɔ̃nↄ ń gbãaoá Lua pↄ́ɛ,

lɛdama ń wɛzɛ̃o ì bↄ aà kĩ́iɛ.

14 Ì pↄ́ gboo, wìli fↄ̃ kɛ̀kɛo,

ì zɛtańlɛ, wìli fↄ̃ wɛ̃̀o.

15 Ì lou zɛ, gu i giigaga,

ì to loupↄↄ fↄ̃, tↄↄlɛ i foofↄ̃.

16 Aàpi mɛ́ iko vĩ ń dɛnlao,

gbɛ̃sãsãnaↄ ń gbɛ̃́ sã́sãaↄ ku aà ↄzĩ ḿpiiɛ.

17 Ì to lɛdamadeↄ ta kyalesai,

ì to yã́kpalɛkɛnaↄ gↄ̃ mìsaideↄ ũ.

18 Ì gala pↄ́ kíaↄ kpà gbɛ̃́ↄnɛ polo,

ↄ̃ ì bɛlɛona ye kíapiↄnɛ.

19 Ì to sa'onaↄ ta kyalesai,

ì gbɛ̃́ pↄ́ an zĩ́na pɛ̀lɛↄ fuangba.

20 Ì to náaideↄ lɛ́ gↄ̃ kpaaũa,

ì yã́zɛdↄ̃a si maezↄ̃ↄↄwa.

21 Ì saikɛ kpalablenaↄwa,

ì nɛgↄ̃naↄ gↄ̃kɛbↄↄ polomá.

22 Ì asiiyã pↄ́ kú gusiau biiwànɛ́,

ì bↄ ń yã́ pↄ́ wa a gbadↄ̃oo gupuau.

23 Ì to buiↄ tↄbↄ, ↄ̃ ì ń midɛ,

ì to aa ligua, ↄ̃ ì ń fãaa.

24 Ì to dṹnia dↄaanaↄ gↄ̃ mìsai,

ì to aa sã́sã gugii zɛsaideu.

25 Aaìↄ ↄmalɛmalɛ gusiau filiasai,

aaìↄ tàlaatalaabo lán idɛnaↄwa.