Bibeli Luayãtaalá Zelemii 4

1 Ma Dii ma mɛ̀, á Isailiↄ, tó á sua, à sua.

Tó a ↄzↄ̃̀ á pↄ́ pↄ́ má zauↄi,

mɛ́ álɛ liaaliaa lↄo,

2 tó a lɛgbɛ̃̀ ń ma kuao kã́ukãu ń sĩanao,

buipãleↄ báaadakↄ̃u ń ma tↄ́o,

aai ĩ́anadã ma yã́ musu.

3 Yã́ pↄ́ Dii ò Yelusalɛũdeↄ ń Yudaↄnɛn kɛ:

Á Yelusalɛũdeↄ ń Yudaↄ píi,

à kpase kɛ̃ wásawasa,

ásu pↄ́tↄ̃ lɛuo.*

4 À tↄ̃zↄ̃ á sↄ̃̀ gbãsĩwoloa ũ,

í gↄ̃ ma pↄ́ ũ wásawasa.

Tó màan sↄ̃o,

má a pↄkũmabↄbↄwáɛ

lán tɛ́ pↄ́ gbɛ̃e a fↄ̃ dɛowa

yãvãi pↄ́ á kɛ̀ yã́i.

Zĩgↄ̃ↄ bↄa gugbãntoo oi

5 À kpàwakɛ Yudaↄnɛ,

à o Yelusalɛũdeↄnɛ:

À kuupɛ á bùsuu,

à wiilɛ ń lↄↄ gbãtɛ̃o

à onɛ́ aa kãaa,

aai bàalɛ ta wɛ̃́lɛ bĩ́ideↄu.

6 À gudↄkↄ̃ɛkĩi dilɛ Siↄna,

wí mↄ́ ulɛ we, ásu zɛzɛo,

asa má tó kìsia zↄ̃ↄ ń pↄ́ ↄ̃̀ↄnɛkɛao bↄ gugbãntoo oiɛ.

7 Nↄ̀ↄmusu fɛ̀lɛ bↄ̀ a tòou,

buiↄ kàalɛnapi dàzɛu.

À gò a tía,

àlɛ gɛ́ á bùsu kɛi kɛ́lɛkɛlɛ,

á wɛ̃́lɛↄ i gↄ̃ bɛziaↄ ũ.

8 A yã́i tò à zwã̀nkasaↄ kákaála,

à ↄ́ↄlↄ à búbuapɛ,

asa Dii pↄfɛ̃awázi zↄ̃ↄ, i kpálɛo.

9 Zĩbeezĩ sↄ̃ a kɛ̃ kía ń a ìwaↄgu,

yã́pi i di sa'onaↄwa,

ãnabiↄ lɛ́ i gↄ̃ kpaaũa.

Ma Dii mámɛ má ò.

10 Ɔ̃ ma mɛ̀: Á'a Dii Lua! N ↄ̃nↄkɛ̀ Yelusalɛũdeↄnɛɛ ń gbɛ̃́ɛ beeↄ píi. Kɛ́ n mɛ̀ aaↄ ku aafiaɛ,† ↄ̃ fɛ̃nda mɛ́ aↄ wiilɛ ń miwaa?

11 Gↄↄ bee Dii a o Yelusalɛũdeↄnɛ ń gbɛ̃́ɛ beeↄ píi, à mɛ ĩ́an wãa a bↄ gbáau sĩ̀sĩ wáiwaiↄ musu à mↄ lɛ́lɛ a gbɛ̃́ↄwa. I kɛ ĩ́ana pↄ́ wì pↄ́ fã́i a gbãsĩ bↄlɛ no, 12 ĩ́ana pↄ́ á gbaɛmá gbãa aↄ dɛ beea, yã́kpalɛ á kɛńnↄ sa.

13 Gwa! Àlɛ mↄ́ lán lousisiawa,

aà zĩkasↄ̃goↄ dɛ lán zàawa,

aà sↄ̃́ↄ wãa dɛ kúuↄla.

Waiyoo wápiↄ! Wa kaalɛɛ sa.

14 Yelusalɛũdeↄ, à á sↄ̃ pípi,

kɛ́ à e bↄ aafia.

Áↄ kú ń á làasoo vãio e bↄɛ ni?

15 Wàlɛ a baokpa Dã buiↄ bùsuu,

wàlɛ músi kpàwakɛ Ɛflaiũ buiↄ bùsu sĩ̀sĩdeu:

16 À o buiↄnɛ,

í a kpàwakɛ Yelusalɛũdeↄnɛ,

ibɛɛↄ bↄ̀ bùsu zã̀zãu, aalɛ mↄ́,

aalɛ kúkua dↄ Yudaↄ wɛ̃́lɛↄwa,

17 aalɛ liai lán masedãnaↄwa,

asa Yudaↄ bↄ̀ ma kpɛɛ.

Ma Dii mámɛ má ò.

18 Á dàa ń á yãkɛaↄ mɛ́ bee ìɛ́.

Á ĩadaman we. A pãsĩ!

Àlɛ ĩadawá e á sↄ̃u.

19 Ma nↄ̀sɛ ↄ̃̀ↄkpà! Ma nↄ̀sɛ ↄ̃̀ↄkpà!

Ma nↄ̀sɛ lɛ́ pusu bↄ, sↄ̃ kɛ̃̀magu,

má fↄ̃ màↄ nílɛo.

Ma kuu'ↄ mà dↄ ń kúkuakɛao.

20 Wíwia lɛ́ kɛ wíwia,

bùsu gↄ̃̀ da wàuu gupiiu.

Wá zwã̀akpɛↄ wìwi kã́ndo,

wá zwãaↄ yàa gↄ̃̀ↄgↄ̃ↄ.

21 Máↄ dàlapooↄ gwa e bↄɛ ni?

Máↄ kuu'ↄpi ma dↄ e bↄɛɛ?

22 Dii mɛ̀ a gbɛ̃́ↄ mi vĩo, aa a dↄ̃o,

nɛ́ sↄũↄnɛ, aa yãe gbáɛo.

Vãi ↄ̃nↄ ↄ̃ aa dↄ̃, aa maakɛa dↄ̃o.

23 Ma zĩ́lɛ gwà,

má è da pã, a kɛkɛao.

Ma musu gwà, má è a gupua vĩo.

24 Ma gbɛ̀sĩsĩↄ gwà,

mà è aalɛ lualua,

sĩ̀sĩↄ sↄ̃ aalɛ deedee píi.

25 Ma gugwà, mi gbɛ̃e eo,

baa bãↄ aa ń taa kɛ̀ píiɛ.

26 Ma gugwà, ↄ̃ má è

bùsu táaede gↄ̃̀ gbáa ũ,

wɛ̃́lɛↄ wìwi píi Dii aɛ

aà pↄkũma pãsĩ yã́i.

27 Asa Dii mɛ̀

bùsu a ↄ̃̀ↄkpa píiɛ,

ń beeo á kaalɛ míↄmiↄo.

28 Ayãmɛto tↄↄlɛ a búbuapɛ,

musu i siakũ,

asa Dii yã'ò, a a nↄ̀sɛ suumpao,

à yãdìlɛ kↄ̀, a ɛa kpɛo.

29 Wɛ̃́lɛdeↄ lɛ́ tílɛ píi,

kɛ́ aa sↄ̃deↄ ń kàzunaↄ kↄ̃fĩ mà yã́i.

Gbɛ̃eↄ lɛ́ si dào guu,

gbɛ̃eↄ dɛ̀dɛ lɛ́ sↄlↄ gbɛ̀sↄↄu.

Wɛ̃́lɛↄ gↄ̃̀ bɛziaↄ ũ,

gbɛ̃e ku we lↄo.

30 Yelusalɛũ, bↄ́ ńlɛ kɛi?

Àkɛa n zwã̀a tɛ̃a yè,

n vua nↄamblebↄↄ dà, n kio kài?

N nzĩa kɛ̀kɛ pãɛ!

N gↄ̃pↄsɛↄ gìnziɛ,

aa ye n wɛ̃ni bↄɛ sa.

31 Ma wii mà lán nɛ'iwãwã wiiwa,

lán nↄɛ pↄ́ lɛ́ nɛ́ sɛ̃́ia iwa.

Siↄna wiiɛ, àlɛ we fòo, fòo,

à ↄpòo à mɛ̀: Waiyoo mapi,

gbɛ̃dɛnaↄ ↄdìɛa, má kú ga lɛ́zĩɛ.

* 4:3 Oze 10.12 † 4:10 Zel 6.13-14, 14.13, 23.16-17