Bibeli Luayãtaalá Zelemii 7

Lua zɛ́ ɛgɛnaá pãɛ

1 Dii yã'ò Zelemiiɛ à mɛ̀: 2 Gɛ ǹ zɛ ma kpɛ́ bↄlɛu, ní kpàwakɛnɛ́ we ǹ mɛ: Á Yuda pↄ́ álɛ gɛ̃ bↄlɛu la álɛ gɛ́ kúlɛimɛɛↄ, à ma yãma.

3 Ma Dii Zĩgↄ̃de Isailiↄ Lua ma mɛ̀,

à nↄ̀sɛlilɛ ń á yãkɛaↄ,

mí tó àↄ ku guɛ beeu.

4 Ásu sã́sãyã náaikɛ à mɛ

Dii kpɛ́n kɛ, Dii kpɛ́ɛo.

5 Tó a nↄ̀sɛlìlɛ ń á yãkɛao sĩana,

mɛ́ álɛ yãkɛkↄ̃ɛ a zɛ́wa,

6 tó i gbãamↄ nibↄↄ ń tonɛↄ ń gyaaↄnɛo,

mɛ́ i yãesaideↄ dɛdɛ guɛ beeuo,

mɛ́ i ĩada ázĩawa a gɛ dii pãleↄwao,

7 má tó àↄ ku guɛ beeuɛ.

Gupi ↄ̃ má kpà á deziↄwa

aaↄ kuu gↄↄpii.

8 Á èa?

Álɛ sã́sãyã pↄ́ ài vĩo náaikɛ.

9 É'e! I kpã́i'o, i gbɛ̃dɛ,

i gbãsĩkɛ, i ɛɛto ń ma tↄ́o,

i tulaletikatɛa Baaliɛ,

i gɛ́ tã́a pↄ́ á ń dↄ̃ yãaoↄwa,

10 ↄ̃ i gbasa mↄ zɛ ma aɛ

kpɛ́ pↄ́ ma tↄ́ kuwàɛ beeu.

I mɛ a bↄ aafia,

ↄ̃ i ɛa gɛ yãbɛ̃ɛpiↄ kɛ.

11 Álɛ e kpɛ́ pↄ́ ma tↄ́ kuwà pi

á kpã́iwɛliwɛↄ tòo nɛe?*

Màa málɛ ewá.

Má Dii mámɛ má ò.

12 Ayãmɛto,

à gɛ́ gu pↄ́ ma zↄ̃lɛu káau Silo,†

í yã́ pↄ́ má kɛ̀ we gwa

ma gbɛ̃́ Isailiↄ vãikɛa yã́i.‡

13 Ma Dii ma mɛ̀:

Gↄↄ pↄ́ álɛ yã́piↄ kɛ píi,

mi dↄaa màↄ oɛ́ mↄ̀ↄmↄↄɛ,

ↄ̃ ili swã́sɛio.

Ma lɛzùázi, i weao.

14 A yã́i, lá má kɛ̀ Siloɛ,

màa má kɛ gu pↄ́ má kpà á deziↄwaɛ,

kpɛ́ pↄ́ ma tↄ́ kuwà álɛ a náaikɛpi.

15 Má á yá à gomalaɛ,

lá ma á gbɛ̃́ Ɛflaiũ buiↄ yàwa.

16 Ńsu wabikɛa gbɛ̃́piↄnɛo.

Ńsu wiilɛa ń yã́ musuo.

Ńsu yãgbɛaanɛ́o.

Ńsu ǹyↄ̃ zɛmazi ń yã́io,

asa má yãmamao.

17 Ń è lá aalɛ kɛ Yuda wɛ̃́lɛↄ guu

ń Yelusalɛũ gãaɛↄa?

18 Nɛ́ↄ ì yàawɛ, maeↄ ì tɛsↄ̃wà,

nↄɛↄ ì pↄ́wɛnti dɛ aa kàa kɛ musu nↄɛ kíaɛ.

Aaì ítↄ̃lɛ dii pãleↄwa,

kɛ́ a yã́ e ↄ̃a yã́i.

19 Ɔ̃ ma Dii ma mɛ̀

i kɛ mámɛ a ↄ̃ao,

ampiↄ ↄ̃ a ↄ̃má, wí i ń kṹ.

20 A yã́i tò ma Dii Lua ma mɛ̀,

má a pↄkũma pãsĩ bↄbↄ guɛ bee ń a gbɛ̃́ↄwa

ń a pↄtuoↄ ń sɛ̃̀a líↄ ń buapↄ́ↄ.

Aa tɛ́kũ píiɛ, wa e tɛ́pi dɛo.

21 Ma Dii Zĩgↄ̃de Isailiↄ Lua ma mɛ̀,

à sa pↄ́ wì a pↄ́ kátɛu à tɛ́kũ kã́fĩ sáaukpasaↄu,

à ãiakɛ àↄ a nↄ̀ↄ so màa àↄ gɛò.

22 Asa kɛ́ ma á deziↄ bↄ̀lɛ Egipi,

ma yãdìlɛnɛ́,

i kɛ sa pↄ́ wì a pↄ́ kátɛu à tɛ́kũ

ń sa pãleↄ yã́ ↄ̃ má dìlɛnɛ́ adoo.

23 Má ònɛ́ lↄ aaↄ ma yã́ kũa,

míↄ dɛ ń Lua ũ,

aaiↄ dɛ ma gbɛ̃́ↄ ũ.

Má ònɛ́ aa zɛ́ pↄ́ má ↄ̀lↄnɛ́ sɛ́,

an kua iↄ na.

24 Kási aai swã́sɛio,

aai laaidↄwào,

an nↄ̀sɛvãi swã́gbãa yã́ mɛ́ dↄ̀aanɛ́.

Aa gbɛzã gwà, aai gɛ́ aɛo.

25 Za gↄↄ pↄ́ á deziↄ bↄ̀ Egipi e gbã

miↄ a zↄ̀blena ãnabiↄ dilɛɛ́,

26 kási ili swã́sɛ ń yã́io,

ili laaidↄwào, a swã́gbãakɛ̀,

ↄ̃ a yãvãikɛ̀ dɛ á deziↄla.

27 Tó n yã́piↄ ònɛ́, aa swã́sɛ n yã́io.

Tó n lɛzùńzi, aa wemao.

28 Onɛ́ bui pↄ́ i Dii ń Lua yãmaon ń ũ.

Aai we totoaio,

ↄ̃ sĩana pìlimá, a kú ń lɛ́uo.

29 À á mi kãkɛ̃ɛlɛ kↄ́lɛ,

í wɛ̃nalɛ si sĩ̀sĩ wáiwaiↄ musu,

asa á gbãgbɛ̃ↄ, ma giáziɛ,

ma pãkpàázi ń pↄfɛ̃oɛ.

30 Ma Dii ma mɛ̀: Yudaↄ yã́ pↄ́ má yeio kɛ̀, aa pↄbɛ̃ɛ kàlɛ kpɛ́ pↄ́ ma tↄ́ kuwàu aa a gbãlɛ̀. 31 Aa Tofɛti gulɛsĩ bò Bɛninↄũ guzulɛu,§ aa sa pↄ́ wì a pↄ́ kátɛu à tɛ́kũ ò we ń ń nɛgↄ̃ɛↄ ń ń nɛnↄɛↄ. Mámɛ mi yã́pi dilɛnɛ́o, a làasoo i gɛ̃ ma sↄ̃ guu seo. 32 Ayãmɛto ma Dii ma mɛ̀, a gↄↄ lɛ́ mↄ́ kɛ́ wa o guɛ beeɛ Tofɛti ge Bɛninↄũ guzulɛ lↄo, sema Gbɛ̃dɛdɛguzulɛ, asa waↄ gɛ vĩvĩ Tofɛti e gu gɛ́ láaɛ. 33 Gbɛ̃́piↄ gɛ a gↄ̃ bãↄ ń wàiↄ pↄblea ũɛ. Gbɛ̃e a ↄkɛnɛ́ yàayaao. 34 Má pↄna wii ń yaalↄo ń nↄsɛkↄ̃fĩo midɛ* Yuda wɛ̃́lɛↄu ń Yelusalɛũ gãaɛↄ, asa bùsupi a gↄ̃ bɛzia ũɛ.

* 7:11 Mat 21.13 † 7:12 Yoz 18.1 ‡ 7:12 Soũ 78.61 § 7:31 2Kia 23.10 * 7:34 Zia 18.23