Bibeli Luayãtaalá Zelemii 9

1 Tó má pilakĩi vĩ gbáau yãaɛ lé,

má a gbɛ̃́ↄ to we mà gɛ́ weɛ,

asa gbãsĩkɛnaↄnɛ ḿpii,

náaisaideↄ gãliɛ.

2 Aaì lɛ́sakã aa ɛgɛ zuò,

aaliↄ gbãa ń bùsuu ń náaiyãoo.

Aaìↄ vãikɛ wàↄ gɛɛ, aa ma dↄ̃o.

Ma Dii mámɛ má ò.

3 Á baade laaika a gbɛ̃nai,

ásu à a daɛ náaikɛo,

asa daɛ píiá gbɛ̃sãsãnaɛ,

gbɛ̃naↄ ì kↄ̃ peɛ.

4 Gbɛ̃na ń gbɛ̃nao aaì ↄ̃nↄkɛkↄ̃ɛ,

aali sĩana'okↄ̃ɛo.

An lɛ́ dↄ́ɛkɛ̀ ń ɛɛo,

aaì tàaekɛkↄ̃ɛ e wà kpàsa.

5 Ń kú mↄafilideↄ guuɛ,

mↄafilipi mɛ́ tò aa gì ma dↄ̃i.

6 A yã́i tò ma Dii Zĩgↄ̃de ma mɛ̀,

má ń baasa mà gwaɛ.

Bↄ́ má kɛ ma gbɛ̃́ↄnɛ

an vãipi yã́ musu lↄi?

7 An lɛ́naá kagbaɛ,

mↄafili mɛ́ ìↄ dↄ ń lɛ́u.

Na'onwaaↄnɛ,

mɛ́ yaalↄma ba da ń bↄ̀ↄuↄnɛ.*

8 Yã́ bee yã́i má ĩadamáo lé?

Má tↄsi buipi taawao lé?

Ma Dii mámɛ má ò.

9 Má ↄ́ↄlↄ mà búbuapɛ sĩ̀sĩↄnɛ,

má wɛ̃nalɛ si dã́dãkɛkĩiↄnɛ.

À sɛ̃kù, gbɛ̃e lɛ́ a baa vĩ lↄo,

wìli zù ↄↄlↄ ma we lↄo.

Bãↄ ń nↄ̀bↄↄ gɛ̃̀zɛa píi.

10 Má tó Yelusalɛũ gↄ̃ bɛzia ũɛ,

gbɛ̃gbonaↄ tòo ũ.

Mí Yuda bùsu wɛ̃́lɛↄ dɛ̃ↄnzↄ̃,

gbɛ̃e aↄ ku we lↄo.

11 Dé ↄ̃nↄ mɛ́ kà yã́pi gbadↄ̃ai?

Dé Dii yãdàɛ̀ aà a bↄↄlɛkɛi?

Àkɛa bùsu gↄ̃̀ gii lán gbáawa,

à gà, gbɛ̃e lɛ́ a baa vĩ lↄo ni?

12 Ma Dii ma mɛ̀,

kɛ́ aa pãkpà ma ikoyã pↄ́ má dìlɛnɛ́i yã́iɛ,

aai ma yã́pi mao, aai zĩkɛwào.

13 An swã́gbãa mɛ́ dↄ̀aanɛ́,

ↄ̃ aa tɛ tã́aↄzi lá ń maeↄ dànɛ́wa.

14 A yã́i ma Dii Zĩgↄ̃de Isailiↄ Lua ma mɛ̀,

má gↄ̃i kpámá aa soɛ,

mí kona í kpámá aa mi.

15 Má ń fãaa buiↄ guuɛ,

bui pↄ́ ampiↄ ń ń maeↄ dↄ̃ yãaoↄ.

Mí tó wà pɛ́má ń fɛ̃ndao

e wà gɛ̀ ń mìdɛ.

16 Ma Dii Zĩgↄ̃de ma mɛ̀:

À yã́pi da,

í gɛ nↄɛ gɛ'ↄↄlↄnaↄ sísi,

í gbɛ̃́ↄ zĩ nↄɛ wɛ̃nalɛdↄ̃naↄwa aa mↄ́.

17 Aai mↄ búbuapɛɛ́,

á wɛ́ i ibↄ e à kwɛ́.

18 Wà ↄↄlↄ mà dↄ Siↄna, wàlɛ mɛ,

wa ↄ̃̀ↄkpàɛ fá, wí wá kṹ maamaaɛ.

Wálɛ wá bùsu to we,

asa wà wá uaↄ dúuzↄ̃̀ɛ.

19 Nↄɛↄ, à Dii yãma sa,

à swã́kpa yã́ pↄ́ lɛ́ bↄ aà lɛ́ui.

À ↄↄlↄ dada á nɛnↄɛↄnɛ,

í wɛ̃nalɛ dadakↄ̃ɛ.

20 Asa gaga gɛ̃̀ wá fɛnɛntiↄuɛ,

ↄ̃ à sì wá zɛgikĩiↄu.

Gapi wá nɛ́ↄ dɛ̀dɛ zɛaↄ guu,

à wá ɛ̀waasoↄ mìdɛ gãaɛ.

21 Onɛ́ ma Dii ma mɛ̀:

Gbɛ̃nazĩn gɛↄ gↄ̃ kpálɛ sɛ̃u lán pↄtuo gbↄ̃wa,

lán ése pↄ́ wa kɛ̃̀ kálɛa gbɛ̃e i mↄ sɛ́lɛowa.

22 Ma Dii ma mɛ̀:

Ɔ̃nↄna su ĩ́anadã a ↄ̃nↄyã musuo,

gↄ̃gbãa su yↄ̃̀ↄkɛ a gↄ̃sakɛ yã́io,

ↄde su azĩa sɛ lɛsĩ a ↄda yã́io.

23 Tó gbɛ̃́ ye ĩ́anadã,

aà dã kɛ́ a wɛ́ kɛ̃̀ a ma dↄ̃ yã́i.†

A dↄ̃ kɛ́ má gbɛ̃kɛ vĩ,

mi yãmaakɛ dṹniau a zɛ́waɛ,

asa yã́ beeↄ mɛ́ ì kamagu.

Ma Dii mamɛ má ò.

24 Ma Dii ma mɛ̀ a gↄↄ a mↄ́ kɛ́ má ĩada gbɛ̃́ pↄ́ aa tↄ̃zↄ̃̀ↄwa, 25 Egipiↄ ń Yudaↄ ń Ɛdↄũↄ ń Amↄniↄ ń Mↄabuↄ ń gbɛ̃́ pↄ́ aa ku guwaiwaiu aaì ń kã̀kãmↄ kɛ̃ɛlɛↄ.‡ Asa buipiↄ ń Isailiↄ píi, gyafↄↄdeↄnɛ ń sↄ̃u.

* 9:7 Soũ 28.3 † 9:23 1Kln 1.31, 2Kln 2.17 ‡ 9:25 Lev 19.27