Bibeli Luayãtaalá Yáasiↄ 1

YÁASIƆ

Yã́ pↄ́ kú láɛ bee guuↄ

Láɛ bee guu wà yáasiↄ ń ↄ̃nↄ yãdanɛↄ òu, ↄ̃ wà Salomↄↄ tↄkpàɛ, asa Isailiↄ Salomↄↄ dↄ̃ ↄ̃nↄna pↄ́ tↄbↄ̀ ũ.

Yáasi láá lá pↄ́ wà Isailiↄ fɛlɛkaa ↄ̃nↄyãↄ kɛ̃̀uↄ doɛ. Wa fↄ̃ lápi kpaalɛ lɛɛ àaↄ̃:

A sɛ̃́ia lɛ́ ài pↄ́ ↄ̃nↄ ì inɛ́ bↄↄlɛkɛ (1-9). Gueↄ ↄ̃nↄ ì yã'o lán gbɛ̃nazĩnawa (8.12-36), ì azĩa dilɛ Lua zĩkɛna ũ.

A plaade mɛ́ lápi guoguo yã́ ũ, gu pↄ́ yáasiↄ kuu (10-29). Salomↄↄ mɛ́ yáasipiↄ kɛ̀ ge a kã̀aa gudoũ (10.1-22.16, 25.1-29.27), mɛ́ wà ↄ̃nↄna pãleↄ yáasiↄ kã̀fĩ a guu lↄ (22.17-24.22, 24.23-34).

A àaↄ̃de (30-31) guu ↄ̃nↄyã pↄ́ gbɛ̃pãleↄ kɛ̃̀ↄ kuu.

Yáasi lá i yãzi ge Isailiↄ yã́ↄ o lán Bibeli lá kĩniↄwao. A yãdanɛↄá wá baade píi pↄ́ɛ, mɛ́ a lɛdamaↄ ì to gbɛ̃́ kua àↄ na, iↄ Lua pↄeã kɛ ń pↄnao. Ɔ̃nↄyã pↄ́ kú lápi guuá wá kua lá gu lɛ́ dↄ yã́ɛ. Lua mɛ́ iko vĩ. Vĩakɛaɛ̀ mɛ́ dↄ̃a zĩ́na ũ, ì mↄ́ ń yãmaakɛao ń kuanao. Músi ì gbɛ̃vãiↄ ń sↄũↄ ń ↄdeↄ le, ãma gbɛ̃maaↄ ń ↄ̃nↄnaↄ ń gbɛ̃́ pↄ́ aaì wɛ̃nadↄ̃ taasideↄnɛↄ ì ń maakɛa gbɛ e.

Yáasi lá kyokɛa ì to wà Isailiↄ kua gbadↄ̃ ń ↄ̃nↄ pↄ́ aa vĩↄ. Wì e lá an ↄ̃nↄnaↄ ì wá gbɛ̃nazĩnaↄ yã́ↄ ń wá yã'ↄ̃maↄ dↄdↄ. Ɔ̃nↄpi dɛ gↄↄpii yã́ ũɛ, mɛ́ à gì ku e ń a gbão.

Yã́ pↄ́ a yã́i wì yáasikɛi

1 Yáasi pↄ́ Davidi nɛ́ Salomↄↄ,*

Isailiↄ kía kɛ̀,

2 kɛ́ gbɛ̃́ↄ e ↄ̃nↄkũ, aaↄ laai vĩ,

aai dↄ̃ayã dada,

3 aai gↄ̃ wɛzɛ̃n làasoodeↄ ũ,

maakɛa ń yã́zɛdeo ń náaio yã́ musu.

4 Yáasipiↄ ì nↄ̀sɛdoũde gba laai,

ì to ɛ̀waaso àↄ ku a dↄ̀ↄwa ń dↄ̃ao.

5 Laaide i ma, aà yãdadaa i gɛ́ aɛ,

nↄ̀sɛde i lɛdama e a guu,

6 i yáasi ń yãlɛɛũanɛo midↄ̃

ń ↄ̃nↄdeↄ yã'oao ń ń faai yã́ↄ.

7 Vĩakɛa Diiɛ mɛ́ dↄ̃a zĩ́na ũ,†

gbɛ̃́ pↄ́ ì saka ↄ̃nↄ ń yãdadaaoguá sↄũɛ.

Laaikaa gbɛ̃vãiↄ kↄ̃nii

8 Ma nɛ́, nìli n mae yã'onɛ ma,

ńsu pãkpa n da lɛdamaio.

9 Aↄ dɛ fùa kɛfɛna ũ n miwa,

aↄ dɛ yàbaa ũ n nↄɛ.

10 Tó duunkɛnaↄ lɛ́ kↄ̃nikɛnɛ,

ńsu weio, ma nɛ́.

11 Aaì mɛ:

Mↄ wà gɛ gbɛ̃́ↄ dã́dã wà ń dɛdɛ,

wà yãesaideↄ kpákpa wà ń kṹkũ.

12 Wà ń mↄ́mↄ bɛ̃̀ɛ lá mia ì kɛwa,

wà ń mↄ́ ĩ́i lá bɛda ì kɛwa,

13 wí pↄ́ ↄde bui píi e,

wá kpɛ́ↄ i pa ń pↄ́ pↄ́ wá nàaapiↄ.

14 Mↄ wà wá baa daaa,

wápii, wá mↄkpɛ iↄ doũ.

15 Ma nɛ́, ńsu gɛ́ńnↄo,

ńsu zɛ́sɛńnↄo.

16 Asa an kɛ̀sɛ lɛɛũ ń vãikɛaoɛ,

aa wãa ń gbɛ̃dɛao.

17 Bakpaa bãↄ wáaá pãɛ.

18 Aalɛ baikpá ńzĩaɛɛ,

an tòe mɛ́ a ń pui.

19 Ɔvãi'enaↄ zian we ḿpii,

an luaa pↄ́i mɛ́ ì ń wɛ̃ni bↄ.

Ɔ̃nↄ gbɛ̃́sisia

20 Ɔ̃nↄ lɛ́ wiilɛ gãaɛ,

aà lɛ́ dↄ zɛau.

21 Ì lɛzu zɛ́ pↄ́ wìli láauo miwa,

ì kpàwakɛ wɛ̃́lɛ bĩ́ibↄlɛↄ guu à mɛ:

22 Ɔ̃nↄsaideↄ, áↄ kú ń ↄ̃nↄsaio e bↄɛ ni?

Ma láanikɛnaↄ, á zɛ ma láanikɛaɛ bↄɛ ni?

Sↄũↄ, áↄ za dↄ̃agu e bↄɛɛ?

23 Tó a ma lɛdama mà yãa,

dↄ̃ ma a nisĩna pìsiwá,

mí tó àↄ ma làasoo vĩ.

24 Lá ma á sisi, a gi swã́kpai,

ma ↄ pòoɛ́, á gbɛ̃e laai i kawào,

25 lá a ma lɛdama kpà swã́a píi,

i we laai pↄ́ ma á gbáio,

26 tó músi á lé, má á yáalↄɛ,

tó yã́ á lé, má á láanikɛɛ,

27 baa tó yã́ á lé lán zàa'ĩanawa,

mɛ́ músi á lé lán zàalolowa,

mɛ́ taasi ń yã'ↄ̃mao gɛ̃̀ázi.

28 Gↄↄ bee á gbasa lɛzumazi,

kási má weo,

á ma kĩ́i wɛɛlɛ, kási á ma eo.

29 Asa á za dↄ̃auɛ,

mɛ́ i zɛ ń vĩakɛa Diiɛoo.

30 I we ma lɛdamaio,

a sakà laai pↄ́ ma á gbáuɛ.

31 Á á dàa gbɛ'e,

yãvãi pↄ́ a zɛò a wi á musu.

32 Gia ↄ̃nↄi ì ↄ̃nↄsaideↄ dɛdɛ,

làasoosai ì sↄũↄ tↄ̀lↄzↄ̃.

33 Gbɛ̃́ pↄ́ ma yã́ kũa sↄ̃ aↄ dↄdↄa,

aↄ ku niɛ musu vãi kã̀akɛsaiɛ.

* 1:1 1Kia 5.12 † 1:7 Yob 28.28, Soũ 111.10