Bibeli Luayãtaalá Yáasiↄ 13

13

1 Nɛ́ ↄ̃nↄde ì a mae lɛdama ma,

gbɛ̃́laanikɛna gbaa laai lí tↄ̃wào.

2 Lɛgbɛ'i na ì gbɛ̃́ ká pↄmaawa,

náaisaide ì ble a pãsĩ guuɛ.

3 Gbɛ̃́ pↄ́ ì a lɛ́ fↄ̃́ ì a wɛ̃ni dↄ̃́a,

gbɛ̃́ pↄ́ a lɛ́ lí kuo ì azĩa ↄ̃̀ↄkpa.

4 Màade lí pↄ́ pↄ́ á yei eo,

ãiade mɛ́ ì namable.

5 Gbɛ̃maa za mↄafiliyãu,

gbɛ̃vãi ì widamá ì ń kpɛbↄ.

6 Yãmaakɛa ì zɛmaasɛna misi,

dàakɛa ì duunkɛna fuangba.

7 Gbɛ̃eↄ ì ńzĩa dilɛ ↄde ũ,

kási aaliↄ pↄe vĩ sↄ̃o,

gbɛ̃eↄ ì ńzĩa dilɛ taaside ũ,

kási aaìↄ pↄ́ vĩ zↄ̃ↄ.*

8 Ɔde ì azĩa bo ń a àizɛɛo,

taaside sↄ̃ ìli wɛ́tɛ̃abiima eo.

9 Gbɛ̃maaↄ gupua aↄ pipi,

gbɛ̃vãiↄ filia a gamá.

10 Zĩa sɛa lɛsĩ mɛ́ ì sòle da,

lɛdamamaa mɛ́ ì to wà ↄ̃nↄkũ.

11 Ɔvãi lí gɛ́ aɛo,

ↄ̃a'ea isima guu mɛ́ ì kↄ̃́.

12 Wɛdↄa pↄ́i gɛ̃gɛ̃a ì ń sↄ̃ ↄ̃̀ↄkpa,

pↄeã ea ì mↄ́ ń wɛ̃ni dafuo.

13 Gbɛ̃́ pↄ́ ì fionada yã́wa a yã'e,

gbɛ̃́ pↄ́ ì gbɛ̃́ yã'onɛ ma a ài'e.

14 Ɔ̃nↄna yãdanɛá nibↄna wɛ̃nideɛ,

ì ń bↄ ga lɛ́zĩ.

15 Wɛzɛ̃ gbãa ì to wàↄ nańnↄ,

ãma náaisaideↄ zɛ́ pãsĩ.

16 Laaideↄ ì yãkɛ ń dↄ̃ao,

sↄũ ì a faasaikɛ fãaa.

17 Zĩna vãi ì zu taasiu,

ìwa náaide ì su aafia.

18 Gia totoai ì mↄ́ ń taasio ń wío,

lɛdamamaa ì ń kpɛla.

19 Pↄ́nidɛa ea ì ń pↄ kɛ na,

ↄ̃ sↄũ ye kɛ̃a vãikɛawa gĩyãio.

20 Gbɛ̃́ pↄ́ tɛ́ ↄ̃nↄnaↄzi ì ↄ̃nↄkũ,

gbɛ̃́ pↄ́ kãaaa ń sↄũↄ ì vãikũ.

21 Taasi ìↄ tɛ duunkɛnaↄzi,

nama mɛ́ gbɛ̃maaↄ ài ũ.

22 Gbɛ̃maa ì túbito a tↄũnaↄnɛ,

duunkɛna sↄ̃, aà àizɛɛ a gↄ̃ gbɛ̃maaɛ.

23 Taaside bua ì blɛkɛ maamaa,

ↄ̃ yãfuangbanaↄ ì to aà kuawà.

24 Gbɛ̃́ pↄ́ lí a nɛ́ gbɛ̃o zaaàguɛ,

gbɛ̃́ pↄ́ ye a nɛ́i ì aà toto a gↄↄwa.

25 Gbɛ̃maa ì pↄble à kã́,

gbɛ̃vãiↄ nↄ̀sɛ ìↄ da gii.

* 13:7 Luk 12.21, 33