Bibeli Luayãtaalá Yáasiↄ 8

8

Ɔ̃nↄ gbɛ̃́sisia

1 Ɔ̃nↄ lɛ́ lɛzuwázi fá!

Wɛzɛ̃ lɛ́ wá sisiaↄ!

2 A ku sĩ̀sĩ musu zɛ́ gɛɛwa,

a zɛa zɛnankpaau.

3 A ku wɛ̃́lɛ bĩ́ibↄlɛↄ saɛ,

aà lↄↄ dↄ bↄlɛ gbaↄ kĩ́i.

4 Gbɛ̃́ↄ, ámɛ málɛ á sisi,

gbɛ̃nazĩnaↄ, málɛ lɛzuázi.

5 Niazĩdeↄ, à wɛɛlɛ àↄ laai vĩ,

làasoosaideↄ, à to àↄ nↄ̀sɛ vĩ.

6 À swã́kpa, asa yã́ gbia má oɛ́,

yã́ dↄ̀ↄde a bↄ ma lɛ́u.

7 Asa ma lɛ́ ì sĩana'o,

má ye vãi gĩyãio.

8 Yã́ pↄ́ dↄ ma lɛ́uↄ maa,

a kee faasai ge kpaanlao.

9 Aa sĩana vĩ laaideɛ píiɛ,

aa zɛvĩ gbɛ̃́ pↄ́ ↄ̃nↄkũ̀ↄnɛ.

10 À ma lɛdama sɛ́ dɛ ã́nusua,

à dↄ̃a sɛ dɛ vua kɛfɛnaa.

11 Asa ↄ̃nↄ bɛɛɛ dɛ òsoↄla,

pↄ́ pↄ́ a ni kúwáe i kawào.

12 Mapi má ↄ̃nↄ, má laai vĩ,

mɛ́ má yãkɛa a zɛ́wa dↄ̃a kũa.

13 Vĩakɛa Diiɛ mɛ́ zaa vãigu ũ.

Má za zĩasɛa lɛsĩ ń ĩ́andãao

ń zɛa ń vãio ń yãkpaanla'oaogu.

14 Lɛdama ń yãkɛkɛa dↄ̃aoá ma pↄ́ɛ,

mámɛ má wɛzɛ̃ ũ,

ma kĩ́i gbãa ì bↄu.

15 Kíaↄ ì kpalable ma sabaiɛ,

ↄ̃ kpalablenaↄ ì yã́zɛde dilɛò.

16 Gbãadeↄ ì ikokɛ ma sabaiɛ

ń dṹnia kpaladeↄ píi.

17 Má ye gbɛ̃́ pↄ́ yemaziↄzi,

gbɛ̃́ pↄ́ lɛ́ ma wɛɛlɛↄ mɛ́ aa ma e.*

18 Àizɛɛ ń gawio ku ma ↄzĩ

ń ↄda kã́fĩadeo ń namao.

19 Nɛ́ pↄ́ mi inɛ́ maa dɛ vua sĩanaa,

kã́fĩa pↄ́ mi kɛnɛ́ dɛ ã́nusu maaa.

20 Má bɛ yã́ dↄ̀ↄde zɛ́u,

mi táa'o zɛ́ súsu guu.

21 Mi gbɛ̃́ pↄ́ yemaziↄ gba àizɛɛ,

an làasiↄ i pa.

22 Dii ma kũa za a zĩ daalɛgↄↄ,

e àↄ gɛ́ yã́ pↄ́ a kɛ̀ za káauↄ kɛi.†

23 À ma dilɛ za asĩnizĩɛ,

za a daalɛgↄↄ, dↄ̃ i dṹnia kɛo.

24 À ma i zadↄ̃ ísia kuo,

nibↄnae ku gↄↄ beeo.

25 À ma i sĩ̀sĩↄ ãa,

e àↄ gɛ́ gbɛ̀sĩsĩↄ zĩ́napɛlɛi,

26 e àↄ gɛ́ dṹnia kálɛi,

ge sɛ̃sao ge bùsu wɛ́n do.

27 Kɛ́ àlɛ pↄ́ pↄ́ kú musuↄ kɛ,

kɛ́ àlɛ bàluma da ísiaa,

28 kɛ́ àlɛ lou na musu,

kɛ́ àlɛ ísia í zɛ́ fↄ̃,

29 kɛ́ àlɛ kↄↄ da ísiaɛ,

a í su a baa vĩo,

kɛ́ àlɛ tↄↄlɛ zĩ́napɛlɛ,

má kú weɛ.

30 Má kú aà saɛ zĩpi ziia ũ,

ma pↄ ìↄ nawà lá gu lɛ́ dↄ,

miↄ pↄnakɛ aà aɛ gↄↄpii.

31 Miↄ kↄ̃̀ↄ'o aà dṹniaa,

gbɛ̃nazĩnaↄ dɛ ma pↄnakɛbↄ ũ.

32 Tiasa ma nɛ́ↄ, à ma yãma.

Báaaden gbɛ̃́ pↄ́ ma yãkɛaↄ kũa ũ.

33 À lɛdama ma, í ↄ̃nↄkũ,

ásu niazĩkpaio.

34 Báaaden gbɛ̃́ pↄ́ lɛ́ ma yãma

ìↄ ma dã ma kpɛɛlɛ ũ,

ìↄ taamalɛ gↄↄpii.

35 Asa gbɛ̃́ pↄ́ ma e wɛ̃ni èɛ,

aↄ na ń Diio.

36 Gbɛ̃́ pↄ́ kùaa vãi ì azĩaɛɛ,

gbɛ̃́ pↄ́ zamaguↄ, ga ↄ̃ aa yei.

* 8:17 Mat 7.7-8 † 8:22 Daa 1.1, Zãa 1.1-3, Zia 3.14