Bibeli Luayãtaalá Soũↄ 1

SOŨƆ

Yã́ pↄ́ kú láɛ bee guuↄ

Soũↄá wabi mɛ̀n basoplakwi pↄ́ Isailiↄ kɛ̀ Luawaↄnɛ, mɛ́ aaì si lɛ ũ ń pↄ́ʼↄbↄna, mɛ́ Yesudeↄ lɛ́ zĩkɛò e ń a gbão.

Soũ lá kpaalɛa lɛɛ sↄoɛ. Lɛ pↄ́ Davidi dàↄ ku we dasi (51-65, 67-71) bee gbɛa Kole buiↄ lɛↄ (42-49, 84-88), Asafa lɛↄ (73-83), kíablea lɛↄ (93-99), gɛa Yelusalɛũ lɛↄ (120-134).

Soũↄ buiↄ dasi maamaaɛ:

Lɛ pↄ́ aaì Dii tↄbↄ aà zↄ̃ↄkɛ ń aà maakɛo yã́ musuↄ: 8, 19, 33, 100, 103-105, 111, 113-114, 117, 135-136, 145-149

Dii kiblea lɛↄ: Dii mɛ́ kía ũ: 47, 93, 96-99

Kíablea Soũↄ, wabikɛa kíaɛ ge kía wabikɛa: 2, 18, 20-21, 45, 72, 89, 101, 110, 144

Gɛ̃a Dii kpɛ́u lɛↄ: 15, 24

Gɛa Yelusalɛũ lɛ pↄ́ Isailiↄ ì si gↄↄ pↄ́ aalɛ gɛ́ dikpɛkɛi we: 84, 91, 121, 122

Siↄna lɛↄ, aalɛ gu pↄ́ Dii sɛ̀ wà a kpɛ́ dↄu Yelusalɛũ tↄbↄ: 46, 48, 76, 87, 132

Waaso Soũↄ: 14, 50, 53, 75, 81, 95

Soũ pↄ́ ì yãdada luanaaikɛnaↄnɛ: 1, 37, 49, 73, 78, 112, 119, 127, 133

Gbɛ̃́ pↄ́ aalɛ pↄsia kɛ aalɛ Lua sisi ń yã'ↄ̃ma guuↄ Soũↄ: 12, 44, 58, 60, 74, 79, 80, 83, 85, 90, 94, 106, 108, 123, 126, 137

Lua gbɛ̃́ↄ wiilɛawa yã'ĩa ge ĩadama ge gudɛ ge gyã ge zĩ̀zↄkɛ yã́ musu lɛↄ: 5-7, 13, 17, 22, 25-26, 28, 31, 35, 38-39, 41-43, 51, 54, 57, 59, 61, 63-64, 69-71, 86, 88, 102, 109, 120, 130, 140-143

Lua sáaukpaa kɛ́ ì ń suaba ge ì duunakɛ̃má yã́i: 9-10, 30, 32, 34, 40.1-12, 92, 107, 116, 118

Pↄna ń aafia pↄ́ luanaaikɛnaↄ vĩ lɛↄ: 3, 4, 11, 16, 23, 62, 131, 139

Yesu Soũ lɛsì Maaku 14.26 guu, mɛ́ à Soũ yã'ò a yãdanɛↄ guu (Maa 12.10, 36) ń aà wabikɛaↄ guuo (Maa 15.34, Luku 23.46).

Soũↄ guu wà dↄ̀aa wà Kilisi yã'ò ń taasi pↄ́ a kɛↄ (22, 69). Wà aà bↄa gau yã'ò lↄ ń aà taa luabɛ yã́o (16, 110, 118). Wà Soũ lá yã́ↄ ò Lua bàakuańnↄ gbɛzã láↄ guu dɛ gɛ̃n basↄola.

Isailiↄ wabikɛa, Yesu wabikɛa, Yesude káauↄ wabikɛa (Zĩn 4.24-26), Soũↄ dɛ lá pↄ́ Yesudeↄ ì lousisiò ũ e ń a gbão.

LÁ SƐ̃IA

Soũↄ 1-41

Báaade

1 Báaaden gbɛ̃́ pↄ́ lí gbɛ̃vãiↄ lɛdama mao ũ.

Ìli duunkɛnaↄ zɛ́ sɛo,

ìli zↄ̃lɛ ń gbɛ̃́ àlafiikɛnaↄo.

2 Dii ikoyã mɛ́ ì kaaàgu,

ìↄ làasookɛwà fãanɛ ń gwãasĩnao.

3 A dɛ lán lí pↄ́ wa bà swa saɛwa,*

a lá lí giigagao, ìↄ nɛ'i a gↄↄwa,

yã́ pↄ́ ì kɛ píi kã́fĩa vĩ.

4 A dɛ màa ń gbɛ̃vãiↄo.

Aa dɛ lán ése ṹa pↄ́ ĩ́ana ì sɛ́lɛwaɛ.

5 Beewa gbɛ̃vãiↄ bↄ maa yã́kpalɛkɛgↄↄzĩo,

duunkɛnaↄ zɛ gbɛ̃maaↄ saɛo.

6 Dii ì zɛmikũ gbɛ̃maaↄnɛ,

gbɛ̃vãiↄ sↄ̃, an zɛ́ mipɛ̀ kaalɛwa.