Bibeli Luayãtaalá Soũↄ 145

145

Dii táasilɛa aà maakɛa yã́i

Dii táasi pↄ́ Davidi lɛ.

1 Má n táasilɛ ma Lua, ma Kía,

máↄ n tↄbↄ gↄↄpiiɛ.

2 Máↄ n sáaukpa lá gu lɛ́ dↄ,

máↄ n táasilɛ láasaiɛ.

3 Dii zↄ̃ↄ, à kà wà aà táasilɛ,

aà zↄ̃ↄkɛ lɛ́ vĩo.*

4 Kpàiↄ n yãkɛaↄ sáaukpa Wueↄnɛ,

aa n yãzↄ̃ↄkɛaↄ galikɛ.

5 Aa n maa zↄ̃ↄ gawide yã'o,

má n yãbↄnsaɛkɛaↄ wàaipa.

6 Aa n dabudabukɛa gbãa yã'o,

mí n zↄ̃ↄkɛ dau siunɛ́.

7 Aa n maakɛa zↄ̃ↄ baokpa,

aai gulakɛ n yã́zɛdekɛaↄ yã́i.

8 Dii sùuu vĩ ń sósobio,

aà pↄ lí pa kpaao, a gbɛ̃kɛ vĩ zↄ̃ↄ.

9 Dii ì maakɛ gbɛ̃́piiɛ,

ì a pↄkɛaↄ wɛ̃nagwa píi.

10 Dii, n pↄkɛaↄ n sáaukpa píi,

n yãmanaↄ n tↄbↄ.

11 Aa n kpala gawi faai bo,

aa n iko gbãa yã'o.

12 Aa n yãzↄ̃ↄkɛaↄ da gbɛ̃́ↄnɛ

ń n kpala maa gawide yã́o.

13 N kpalaá kpala láasaiɛ,

ńyↄ̃ↄ dɛ kía ũ wɛ̃̀ píiɛ.

Dii náai vĩ a yã́pii musu,

a sùuu vĩ ń a pↄkɛaↄ píi.

14 Dii ì gbɛ̃́ pↄ́ lɛ́ lɛ́lɛↄ kṹ,

ì gbɛ̃́ pↄ́ taasi tↄ̃̀máↄ fɛlɛ.

15 Pↄ́pii wɛ́ dↄnzi,

ni blɛ kpámá a gↄↄwa.

16 Ni ↄ poonɛ́, pↄ́ mↄ́má,

ni pↄ́ bɛ̃́ɛ píi pↄeã bↄↄlɛkɛɛ̀.

17 Dii kɛkɛáↄ maa píi,

a gbɛ̃kɛ vĩ a yã́pii kɛa guu.

18 Dii kãi ń a sìsinaↄ píi,

gbɛ̃́ pↄ́ aaì aà sísi ń sĩanaoↄ.†

19 Ì a vĩakɛnaↄ pↄeã bↄↄlɛnɛ́,

ì ń wiilɛa ma, i ń suaba.

20 Dii ì gbɛ̃́ pↄ́ yeaziↄ dↄ̃́a píi,

ãma a vãikɛnaↄ míↄnzↄ̃ɛ.

21 Dii táasilɛa aↄ dↄ ma lɛ́uɛ.

Pↄ́pii aaↄ aà tↄbↄgↄↄ píi, asa a kua adoaɛ.

* 145:3 Lom 11.33 † 145:18 Zãa 4.24