Bibeli Luayãtaalá Soũↄ 74

74

Wiilɛa Luai aà kpɛ́ wia yã́ musu

Asafa lɛ.

1 Lua, bↄ́yãi n giwázi e gↄↄpiii?

Àkɛa ńlɛ pↄbↄ n níu n kpàsa sãↄ yã́ musui?

2 Gbɛ̃́ pↄ́ n ń sí za ziↄ yã́ dↄngu,

bui pↄ́ ń bò aa gↄ̃̀ ń pↄ́ ũↄ

ń Siↄna gbɛ̀sĩsĩ pↄ́ ń kɛ̀ n kúkĩi ũo.

3 N ibɛɛↄ n kúkĩi dàaĩ míↄmiↄ.

Dɛdɛ ń laaio, à ↄ̃̀ↄkpà píi.

4 N wɛ̀lɛↄ kã̀aa gu pↄ́ ni dauwálɛ,

aa ńzĩa seelaↄ pɛ̀lɛ we.

5 Wá è, an mↄona dↄ musu,

aalɛ kɛ lá wìↄ dào gbɛ̃wa.

6 Lí yↄↄa kɛfɛna pↄ́ wa kpà a gĩwa,

aa gbɛ̃̀ wa gbòo ń mↄoo ń fɛ̃nkĩnio.

7 Aa tɛsↄ̃̀ n kúkĩiwa, à kwɛ̀,

aa tò kpɛ́ pↄ́ n tↄ́ kuwàpi gbãlɛ̀.

8 Aa ò ń nↄ̀sɛu: Wà ↄtↄ̃má míↄmiↄ.

Aa tɛsↄ̃̀ wá bùsu lousisikpɛↄwa.

9 N kpɛ́ lousisibↄↄ gɛ̃̀zɛa,

ãnabie ku lↄo.

Wáↄ ku màa e bↄɛn yã̀?

Wá gbɛ̃e dↄ̃o.

10 Lua, ńyↄ̃ to n ibɛɛↄ aaↄ n yáalↄ e bↄɛ ni?

N wɛ̀lɛↄ aaↄ sakangu láasai yã̀?

11 Bↄ́yãi n ↄ kpaaũai?

Ɔgo n kùɛ, ní ń dɛdɛ.

12 Lua mɛ́ ma kía ũ za asĩnizĩ,

ↄ̃mɛ ì gbɛ̃́ suaba dṹniau.

13 Ḿmɛ n ísia zↄ̃̀ɛ ń n gbãao,*

n kwãsa mi wì í guu.

14 N Egipiↄ mìdɛ we,

n ń gɛↄ kpà wàiↄwa pↄblea ũ.

15 N swaↄ bↄ̀, n zɛwɛ̃̀ nibↄnaↄnɛ,

n swa pↄ́ a í baa vĩo zↄ̃̀ɛ.

16 Fãanɛ ń gwãasĩnao dɛ n pↄ́ ũɛ,

n mↄvua ń ĩatɛ̃o kúkĩi dìlɛnɛ́.

17 Ḿmɛ n kↄↄ dàda bùsu píiu,

n saɛ ń buziɛo gↄↄ dìlɛ.

18 Yá pↄ́ n ibɛɛↄ dↄ̀ yã́ dↄngu Dii,

mìsaidepiↄ sakà n tↄ́uɛ.

19 Ńsu ǹ n felena kpá wàiↄwao,

n wɛ̃nadeↄ yã́ su sãnguo.

20 Laaidↄ n bàakuawanↄwa,

asa wá bùsu gbɛ̀'ɛↄ pãsĩkũ̀ píiɛ.

21 Wá gbɛ̃́ pↄ́ wàlɛ gbãamↄwɛ̃ɛↄ,

ńsu to wà kpɛkpa ń wíoo.

To wɛ̃nadeↄ ń taasideↄ n táasilɛ.

22 Lua, fɛlɛ gí ń nzĩao.

N yá pↄ́ mìsaideↄ lɛ́ dↄ zɛsai màé!

23 Ńsu zↄa pↄ́ n ibɛɛↄ lɛ́ kánzi kpa swã́ao,

n wɛ̀lɛpiↄ kↄ̃fĩ dↄ gↄↄpiiɛ.

* 74:13 Bↄa 14.21