Bibeli Luayãtaalá Soũↄ 78

Lɛdaawá Isailiↄ yã́ musu

Asafa lɛ.

1 Ma gbɛ̃́ↄ, à ma lɛdama ma,

à swã́kpa ma yã́i.

2 Má yã'oɛ́ ń yáasio,

má yã́ pↄ́ ulɛa za zi bↄↄlɛkɛɛ́,*

3 yã́ pↄ́ wá mà mɛ́ wá dↄ̃,

yã́ pↄ́ wá maeↄ a galikɛ̀wɛ̃ɛ.

4 Wá yã́pi ulɛ wá nɛ́ↄnɛo,

wá Dii táasilɛa da wá tↄũnaↄnɛ

ń aà gbãao ń yãbↄnsaɛ pↄ́ a kɛ̀ↄ.

5 À yãdìlɛ Yakↄbu buiↄnɛ,

à a ikoyã dà Isailiↄnɛ.

A ò wá deziↄnɛ aa tó ń nɛ́ↄ dↄ̃,

6 i gↄ̃ ń bui pↄ́ kpɛ́ↄnɛ fɛlɛkaa ũ,

aai fɛlɛ dada ń nɛ́ↄnɛ sↄ̃,

7 kɛ́ aa e Lua náaikɛ,

kɛ́ Lua yãkɛaↄ su sã́ńguo,

aaiↄ aà yãdilɛaↄ kũa,

8 kɛ́ aasu wàↄ dɛ lán ń deziↄwao,

asa aa swã́gbãakɛ̀ aa gì Lua yã́i,

an sↄ̃ ku Luawao, aa náai vĩɛ̀o.

9 Ɛflaiũ buiↄá kàzunaↄnɛ,

ↄ̃ aa kpɛkpà zĩ guu.

10 Aai zɛ ń Luabaakuańnↄoo,

aa gì tɛ́i aà ikoyãi.

11 Aà yãkɛaↄ sã̀ńgu

ń aà yãbↄnsaɛ pↄ́ a ↄ̀lↄnɛ́ↄ.

12 À dabudabuↄ kɛ̀ an deziↄ wáa

Zoã wɛ̃́lɛu, Egipi bùsuu.†

13 À ísia zↄ̃̀ɛ à bùańnↄ,

à í bĩ́ibò.‡

14 À dↄ̀aanɛ́ tɛlu guu fãanɛ,

gwãasĩna sↄ̃ ń tɛ́ gupuao.§

15 À gbɛsi pàa guwaiwaiu,

à í kpàmá zↄ̃ↄ lán ísia íwa.

16 A tò í bↄ̀nɛ́ gbɛu,

ípi bàalɛ̀ lán swadawa.*

17 Ɔ̃ aa gì tɛ duunawa,

aa gì Musude yãmai guwaiwaiu.

18 Aa gí kɛ̀ aa Lua lɛwɛ,

aa ń pↄeã blɛ gbɛ̀awà.†

19 Aa Lua bɛ̃̀ɛbò aa mɛ̀:

A fↄ̃ ↄpi'i dilɛwɛ̃ɛ sɛ̃u lae?

20 Gwa, à gbɛ lɛ̀, í bↄ̀ dàgua mɛ!

A fↄ̃ blɛ ge nↄ̀ↄ kpáwá sↄ̃a?

21 Kɛ́ Dii yã́pi mà, aà pↄ pà,

ↄ̃ tɛ́ kũ̀ Yakↄbu buiↄwa,

à pↄkũmabↄ̀bↄ Isailiↄwa.

22 Asa aai Lua yã́ sio,

aa aà gbɛ̃́ suabaa gbãa náai vĩo.

23 À yãdà bàlumaɛ,

à zɛwɛ̃̀ musu,

24 ↄ̃ mana kwɛ̀nɛ́ blɛ ũ,‡

à musu pↄ́wɛna gbↄ̃ yònɛ́.

25 Aa malaikaↄ blɛ blè,

à kũ̀sũakɛ̀nɛ́, à dìńla.

26 A tò ĩ́an gbãa bↄ̀ gukpɛ,

ń aà gbãao à bↄ̀ gɛↄmidↄkĩi oi lↄ,

27 ↄ̃ à nↄ̀ↄ kwɛ̀nɛ́ lán luutɛ̃wa,

bãↄ lìńla lán ísialɛ ũfãawa.§

28 A tò aa kwɛ̀ ń bòou,

aa gↄ̃̀ kálɛa liaa ń kpɛ́ↄi.

29 Lua pↄ́ pↄ́ aa a ni vĩ kpàmá,

ↄ̃ aa sò aa kã̀ pã́upãu.

30 E a ni àↄ gɛ́ bↄińla,

gↄↄ pↄ́ blɛpi da ń lɛ́u,

31 Lua fɛ̀lɛ fɛ̃̀ńnↄ,

à Isaili gↄ̃gbãaↄ dɛ̀dɛ,

à ń ɛ̀waasoↄ kwɛ̀.*

32 Gia ń beeo aa gì tɛ duunawaɛ,

ń aà yãbↄnsaɛkɛaↄ aai aà náaikɛo.

33 Ɔ̃ à ń wɛ̃ni kɛ̀nɛ́ lán lɛ́'ĩanawa,

a tò ↄ̃̀ↄnɛkɛa ń mìdɛ.

34 Tó à ń pisabò, aaì aà aɛya,

aaì ɛa wà aà kĩ́i wɛɛlɛ ń wãao.

35 Aa dↄ̃̀ sa Lua mɛ́ ń gbɛsi ũ,

Lua Musude mɛ́ ń Mìsina ũ.

36 Ãma aaì lɛ́mawà,

aaì ɛɛtoɛ̀,

37 an sↄ̃ kuwào,

aa aà bàakuańnↄ yã́ gbòo.

38 Aàpi sↄ̃ à ń wɛ̃nagwà,

à ń duuna kɛ̃̀má, i ń midɛo.

Ìↄ azĩa zùukɛ mↄ̀ↄmↄↄɛ,

i a pↄkũmabↄbↄmá píio.

39 À ń gbɛ̃nazĩnkɛ dↄ̃̀má,

asa aaì gɛ̃zɛa susai lán ĩ́anawaɛ.

40 Aa swã́gbãakɛ̀ guwaiwaiu gɛ̃n ũma'ũma!

Aa aà pↄ yàɛ̀ sɛ̃u we à kɛ̀ zài.

41 Aa Lua lɛwɛ,

aa Lua lɛwɛ,

aa Isailiↄ Lua pↄ́ a kua adoa fɛ̃̀.

42 Aà iko gbãa sã̀ńgu,

lá à ń sí ń ibɛɛↄwa,

43 lá à dabudabuↄ kɛ̀ Egipi,

mɛ́ à yãbↄnsaɛↄ kɛ̀ Zoã bùsuu.

44 À ń swa'iↄ lìlɛ au ũ,†

ↄ̃ aai fↄ̃ aa a imì lↄo.

45 À ũsĩnaↄ kàńgu, aa ń soso,‡

ń blↄↄↄ lↄ, aa yãyìamá.§

46 A tò kwaↄ ń pↄ́wɛnaↄ blè,

à kwasutɛ̃ kà ń buapↄ́ↄu.*

47 A tò lougbɛ ń vɛ̃ɛbuↄ kɛ̀ kɛ́lɛkɛlɛ,

a zàa'ĩana ń kaa líↄ ɛ̀'ɛ.

48 À ń pↄtuoↄ músikɛ̀ ń lougbɛpio,

lua sù ń kpàsaↄwa.†

49 À a pↄkũma zↄ̃ↄ bↄ̀bↄmá,

à ĩ́isɛ̀ńnↄ ń pↄfɛ̃o ń kpɛ̃nɛo,

à músi malaikaↄ gbàɛmá.

50 À a pↄkũma gbà zɛ́,

i zɛzↄ̃ gaɛ lↄo, à gagyãkàńgu.

51 À Egipi nɛgↄ̃ɛ sɛ̃́iaↄ dɛ̀dɛ píi,‡

Haũ bui gↄ̃sakɛ nɛ́piↄ gàga.

52 À bↄ̀ ń a gbɛ̃́ↄ lán sãↄwa,

à dↄ̀aanɛ́ guwaiwaiu lán sã waiↄwa.§

53 A bɛńnↄ, aa ku dↄdↄa vĩasai,

an ibɛɛↄ sↄ̃, ísia kũ̀aamá.*

54 À kàńnↄ a bùsu zↄ̃lɛu,†

gusĩsĩde pↄ́ a sì ń a gbãaopiu.

55 À buipãleↄ yànɛ́,

ↄ̃ à ń bùsu kpaalɛ̀nɛ́ ń pↄ́ ũ,

à uakpàkpa Isaili buipiↄnɛ.‡

56 Ɔ̃ aa Lua lɛwɛ aa gì aà yãmai,

aa Musude yãdilɛaↄ kũao.§

57 Aa kpɛkpà aa bↄ̀ aà kpɛ lán ń maeↄwa,

aa náai vĩo lán sá gia baiwa.

58 Aa aà pↄ fɛ̀lɛɛ̀ ń ń sa'okĩio,

aa aà zafɛ̃̀ɛ̀ ń ń tã́aↄ.

59 Kɛ́ Lua è màa, ↄ̃ aà pↄ pà,

à ↄzↄ̃̀ Isailiↄzi pãsĩpãsĩ.

60 À a zwã̀akpɛ tò Silo* we,

aà bɛ pↄ́ a kpà gbɛ̃nazĩnaↄ guupi.

61 A tò an wɛ̀lɛↄ mↄ̀ a kpagolo sɛ̀,†

ↄ̃mɛ aà gbãa ń aà gawio kúkĩi ũ.

62 A tò wà a gbɛ̃́ↄ dɛ̀dɛ ń fɛ̃ndao,

aà pↄ pà bui pↄ́ a sɛ̀pizi.

63 An ɛ̀waasoↄ tɛkũ̀ zĩ guu,

an wɛ̃́ndiaↄ i zãkɛlɛ dↄ̃ lↄo.

64 Wà ń sa'onaↄ dɛ̀dɛ ń fɛ̃ndao,

an gyaaↄ i fↄ̃ ↄ́ↄlↄ̀o.

65 Ɔ̃ Dii vù ń io sa,

lán gↄ̃sa pↄ́ vù ń wɛ̃'iowa.

66 À ń wɛ̀lɛↄ gbɛ̃̀, aa kpɛkpà,

a tò aa gↄ̃̀ ń wío gↄↄpii.

67 Ɔ̃ à gì Ɛflaiũ buiↄzi,

i Yosɛfu buipi sɛ lↄo.

68 Yuda bui ↄ̃ a sɛ̀ sa

ń Siↄna gbɛ̀sĩsĩ pↄ́ á yeio.

69 À a kúkĩi dↄ̀ musumusu we,

aↄ ku gↄↄpii lán dṹnia kálɛawa.

70 Ɔ̃ à a zↄ̀blena Davidi sɛ̀,‡

à aà bↄ̀ sã kaau.

71 À aà bↄ̀ sãdãu, à dↄ̀aa Isailiↄnɛ,§

Lua gbɛ̃́ Yakↄbu buipiↄ kíaɛ.

72 Davidi ń kpá a kpɛ ń nↄ̀sɛmɛndoo,

à dↄ̀aanɛ́ ń a ↄ báaadeo.

* 78:2 Mat 13.35 † 78:12 Bↄa 7.8-12.32 ‡ 78:13 Bↄa 14.21-22 § 78:14 Bↄa 13.21-22 * 78:16 Bↄa 17.1-7, Nao 20.2-13 † 78:18 Bↄa 16.3, Nao 11.4-5 ‡ 78:24 Bↄa 16.14-15, Nao 11.7-9, Zãa 6.31 § 78:27 Bↄa 16.13, Nao 11.31-32 * 78:31 Nao 11.33 † 78:44 Bↄa 7.17-21 ‡ 78:45 Bↄa 8.20-24 § 78:45 Bↄa 8.1-6 * 78:46 Bↄa 10.12-15 † 78:48 Bↄa 9.22-25 ‡ 78:51 Bↄa 12.29 § 78:52 Bↄa 13.17-22 * 78:53 Bↄa 14.26-28 † 78:54 Yoz 3.14 ‡ 78:55 Yoz 11.16-23 § 78:56 Dↄa 2.11-15 * 78:60 Yoz 18.1, Zel 7.12 † 78:61 1Sam 4.4-22 ‡ 78:70 1Sam 16.11-12 § 78:71 2Sam 7.8