Bibeli Luayãtaalá Soũↄ 80

80

Isailiↄ sua ń pá ziu wabikɛa

1 Asafa lɛ.

2 Swã́kpa Isailiↄ Dↄaana,

n gbɛ̃́ pↄ́ ni Yosɛfu buiↄ dã lán sãↄwa.

Bↄ gupuau, n gbɛ̃́ pↄ́ ń zↄ̃lɛa malaika gã̀sĩadeↄ zãnguo,*

3 ní dↄaa Ɛflaiũ buiↄnɛ

ń Bɛ̃yãmɛɛ buiↄ ń Manase buiↄ.

Fɛlɛ ń n gbãao, mↄ ǹ wá suaba!

4 Lua, to wà ɛa su wá pá ziu.

Wá wɛgwa wà aafiaʼe.

5 Dii Lua Zĩgↄ̃de,

ńlɛ pↄbↄ n níu e tia,

ńyↄ̃ n gbɛ̃́ↄ wabikɛa mamá bↄɛ ni?

6 N wɛ́'i kpàmá blɛ ũ,

n ń wɛ́'i yↄ̃̀nɛ́ pↄ́ pai aa mì.

7 Ń tò wa gↄ̃ láanipↄ ũ wá saɛdeↄnɛ,

wá ibɛɛpiↄ lɛ́ wá kɛ pↄ́ↄpↄↄ.

8 Lua Zĩgↄ̃de, to wà su wá pá ziu,

wá wɛgwa wà aafiaʼe.

9 N vɛ̃ɛli wò Egipi,

n buipãleↄ yà ↄ̃ ń pɛ̀ ń gbɛu.

10 N gukɛ̀kɛɛ̀, à zĩ́napɛ̀lɛ,

ↄ̃ à ↄtà à a bùsu pà.

11 A uedà gbɛ̀sĩsĩↄla,

a gↄ̃naↄ dɛ sɛdɛ lí zↄ̃ↄↄla.

12 À ↄtà à gɛ̀ e ísialɛ,

a ↄnɛↄ gɛ̀ e Uflatai.

13 Bↄ́yãi n a kaa gbòo,

gbɛ̃́ pↄ́ lɛ́ gɛ̃zɛaↄ ìↄ ↄmalɛii?

14 Dào sàwa ì lɛ́ kái,

sɛ̃̀anↄbↄↄ ì mↄ a lá blei.

15 N yã́ na! Lua Zĩgↄ̃de, wá wɛgwa!

Kua za musu wɛzu ǹ gwa!

Laaidↄ vɛ̃ɛlipiwa,

16 bui pↄ́ ń pɛ̀ nzĩa,

nɛ́ pↄ́ ń sì n pↄ́ ũpi.

17 Wà n vɛ̃ɛlipi zↄ̃̀ wà tɛsↄ̃̀wà.

Wɛpãsĩ biimá aa midɛ.

18 Ɔda gbɛ̃́ pↄ́ kú n ↄplaaiwa,

gbɛ̃nazĩn nɛ́ pↄ́ ń sì n pↄ́ ũ.

19 Wá kɛ̃ma lↄo.

Wá lɛ́ ń láo, wí n sísi.

20 Dii Lua Zĩgↄ̃de,

to wà su wá pá ziu,

wá wɛgwa wà aafiaʼe.

* 80:2 Bↄa 25.22