Bibeli Luayãtaalá 1 Lada 20

Laba sia Amↄniↄwa

(2Sam 12.26-31)

1 Kɛ́ í bↄ̀ ɛu, gↄↄ pↄ́ kíaↄ ì gɛ́ zĩkai, ↄ̃ Yoabu dↄ̀aa zĩgↄ̃ↄnɛ zĩlau. À Amↄni bùsu ásookɛ̀, ↄ̃ à gɛ̀ koezↄ̃̀ Labazi. Gↄↄ bee Davidi ku Yelusalɛũ. Ɔ̃ Yoabu lɛ̀lɛ Labawa a gbòo. 2 Ɔ̃ Davidi mↄ̀ ń kía vua fùa gò aà miwa. A gbia kà kiloo baakwi, mɛ́ gbɛ̀ bɛɛɛde kuwà. Ɔ̃ wa kpà Davidiɛ. À wɛ̃́lɛpi pↄ́ↄ nàaa dúuduuɛ, 3 ↄ̃ à gbɛ̃́ pↄ́ kú weↄ kũ̀kũ bↄ̀lɛńnↄ, à ń dá síi zĩu ń dúuduusu zĩo ń mↄo zĩo. Màa à kɛ̀ Amↄni wɛ̃́lɛↄnɛ píi, ↄ̃ à ɛ̀a tà Yelusalɛũ ń a zĩgↄ̃ↄ píi.

Zĩkaa ń Filitɛ̃ↄ

(2Sam 21.15-22)

4 Bee gbɛa kɛ́ zĩ̀ fɛ̀lɛ ń Filitɛ̃ↄ Gɛzɛɛ, Usa gbɛ̃́ Sibekai mɛ́ gbɛ̃́ gbã̀a bui pↄ́ wì mɛ Sipai dɛ̀, ↄ̃ Isailiↄ gbãablè Filitɛ̃ↄwa. 5 Kɛ́ zĩ̀ ɛ̀a fɛ̀lɛ ń Filitɛ̃ↄ lↄ, Yaii nɛ́ Ɛlana mɛ́ Gata gbɛ̃́ Goliati dãuna Lami dɛ̀. Lami sↄ̃mpa dɛ lán zwã̀atãna àsaliwaɛ. 6 Aalɛ zĩkańnↄ Gata lↄ. Gↄ̃sa tìisie ku we, aà ↄnɛↄ soolosooloɛ, mɛ́ aà gbánɛↄ soolosoolo, apii kɛ̀ baasↄo mɛ̀ndosai, mɛ́ gbɛ̃́ gbã̀a buiɛ lↄ. 7 À kuabìi Isailiↄwa, ↄ̃ Davidi vĩ̀i Simɛa nɛ́ Yonatãa aà dɛ̀. 8 Gbɛ̃́piↄá Gata gbɛ̃́ gbã̀a buiↄnɛ. Davidi ń a gbɛ̃́ↄ mɛ́ ń dɛdɛ.