Bibeli Luayãtaalá 1 Lada 6

1 Levii nɛgↄ̃ɛↄ tↄ́n kɛ: Geesↄ̃, Kɛata ń Mɛlalio. 2 Geesↄ̃ nɛgↄ̃ɛↄn Libeni ń Simɛio ũ. 3 Kɛata nɛgↄ̃ɛↄ tↄ́n kɛ: Amlaũ, Isaa, Hɛblↄ̃ ń Uziɛlio. 4 Mɛlali nɛgↄ̃ɛↄn Mali ń Musio ũ.* Levii buiↄn kɛ an dezi káauↄwa:

5 Geesↄ̃ Libeni ì, Libeni Yaata ì, Yaata Zima ì, 6 Zima Yoa ì, Yoa Ido ì, Ido Zela ì, Zela Yealai ì.

7 Kɛata Aminadabu ì, Aminadabu Kole ì, Kole Asii ì, 8 Asii Ɛlikana ì, Ɛlikana Abiasafa ì, Abiasafa Asii ì, 9 Asii Taatu ì, Taatu Uliɛli ì, Uliɛli Uzia ì, Uzia Saulu ì. 10 Ɛlikana nɛgↄ̃ɛↄ tↄ́n kɛ: Amasai ń Aimↄo. 11 Aimↄ Ɛlikana ì, Ɛlikana Zofai ì, Zofai Naata ì, 12 Naata Ɛliabu ì, Ɛliabu Yeloaũ ì, Yeloaũ Ɛlikana ì, Ɛlikana Samuɛli ì. 13 Samuɛli nɛgↄ̃ɛ sɛ̃́ian Yoɛli ũ, a plaade Abia.

14 Mɛlali Mali ì, Mali Libeni ì, Libeni Simɛi ì, Simɛi Uza ì, 15 Uza Simɛa ì, Simɛa Agia ì, Agia Asaia ì.

Lua kpɛ́

16 Gbɛ̃́ pↄ́ Davidi ń dílɛ Dii kpɛ́ lɛ̀sin gbɛ̃zↄ̃ↄↄ ũ kpagolo sua we gbɛaↄn kɛ: 17 Aaìↄ lɛsizĩ kɛ zwã̀akpɛ pↄ́ wì mɛ Kpaaũkpɛ kpɛɛlɛ e Salomↄↄ gɛ̀ kpɛdↄ̀ò Diiɛ Yelusalɛũ. Aa zĩkɛ̀ a zɛ́wa lá wa dìlɛnɛ́wa. 18-23 Gbɛ̃́ pↄ́ aa zĩpi kɛ̀ↄ ń ń nɛgↄ̃ɛↄ tↄ́n kɛ: Lɛ̀sin dↄaana Emani, Kɛata bui deziↄ tↄ́n kɛ maeↄ ń ń nɛ́ↄ daalɛa Isailiwa: Isaili, Levii, Kɛata, Isaa, Kole, Abiasafa, Asii, Taatu, Zefania, Azalia, Yoɛli, Ɛlikana, Amasai, Maatu, Ɛlikana, Zufi, Toa, Ɛliɛli, Yeloaũ, Ɛlikana, Samuɛli ń Yoɛli pↄ́ Emanipi ìo.

24-28 Emani gbɛ̃do Asafa mɛ́ ì lɛsi aà ↄplaai. Aà deziↄ tↄ́n kɛ maeↄ ń ń nɛ́ↄ: Levii, Geesↄ̃, Yaata, Simɛi, Zima, Etani, Adaia, Zela, Ɛteni, Malakia, Baaseia, Mikaila, Simɛa ń Bɛlɛkia pↄ́ Asafapi ìo.

29-32 An gbɛ̃́ Mɛlali buiↄ dↄaana Etani mɛ́ ìↄ kú ń ↄzɛɛi. Aà deziↄ tↄ́n kɛ: Levii, Mɛlali, Musi, Mali, Sɛmɛɛ, Bani, Amɛzi, Ilikia, Amazia, Asabia, Maluku, Abadi ń Kisi pↄ́ Etanipi ìo.

33 An Levii deeↄ mɛ́ zwã̀akpɛ pↄ́ dɛ Lua kpɛ́ ũ zĩ kĩniↄ kɛ̀ píi.

34 Aalona ń a buiↄ mɛ́ ì pↄ́ↄ kpasa sa'okĩiwa ń tulaletikatɛakĩio. Aamɛ aaìↄ luakukĩi zĩ kɛ, aaì Isailiↄ duuna kɛ̃́má lá Lua zↄ̀blena Mↄizi dìlɛnɛ́wa. 35 Aalona buiↄ tↄ́n kɛ: Ɛleazaa Finɛasi ì, Finɛasi Abisua ì, 36 Abisua Buki ì, Buki Uzi ì, Uzi Zelaia ì, 37 Zelaia Mɛlaio ì, Mɛlaio Amalia ì, Amalia Aitubu ì, 38 Aitubu Zadoki ì, Zadoki Aimaaza ì.

Levii buiↄ wɛ̃́lɛↄ

(Yoz 21.4-39)

39 Wɛ̃́lɛ pↄ́ wa kpàmá ń zↄ̃lɛkĩi ũↄn kɛ: Kɛata tↄũna Aalona buiↄ ↄ̃ wà gbɛlànɛ́ káau. 40 Ɔ̃ aa Hɛblↄ̃ pↄ́ kú Yuda bùsuu blè ń a dã́dãkɛkĩi pↄ́ liaaiↄ. 41 Ãma wà wɛ̃́lɛpi buaↄ ń a bualoũↄ kpà Yefũnɛ nɛ́ Kalɛbuwaɛ. 42 Aalona buiↄ mɛ́ Hɛblↄ̃ pↄ́ dɛ misiwɛ̃lɛ ũ blè ń Libenao ń Yatiio ń Ɛsɛmↄao 43 ń Ilɛnio ń Dɛbiio 44 ń Asão ń Bɛsɛmɛsio, ampii ń a dã́dãkɛkĩioɛ. 45 Aa Bɛ̃yãmɛɛ buiↄ wɛ̃́lɛↄ blè lↄ, Gɛba ń Alemɛo ń Anatoo, ampii ń a dã́dãkɛkĩioɛ. Wɛ̃́lɛ mɛ̀n kuɛ'aaↄ̃piↄá Aalona buiↄ pↄ́ɛ. 46 Kɛata bui kĩniↄ mɛ́ Manase bui pↄ́ kú bɛ'aɛ oiↄ wɛ̃́lɛↄ blè mɛ̀n kwi gbɛlaa guu. 47 Geesↄ̃ buiↄ mɛ́ Isakaa buiↄ ń Asɛɛ buiↄ ń Nɛfatali buiↄ ń Manase bui pↄ́ kú Basana bùsuuↄ wɛ̃́lɛↄ blè daɛdaɛ mɛ̀n kuɛ'aaↄ̃. 48 Mɛlali buiↄ mɛ́ Lubɛni buiↄ ń Gada buiↄ ń Zabulↄni buiↄ wɛ̃́lɛↄ blè daɛdaɛ mɛ̀n kwi gbɛlaa guu. 49 Ɔ̃ Isaili buipiↄ wɛ̃́lɛpiↄ ń ń dã́dãkɛkĩiↄ kpà Levii buiↄwa. 50 Yudaↄ ń Simɛↄ buiↄ ń Bɛ̃yãmɛɛ buiↄ wɛ̃́lɛ pↄ́ wà ń tↄ́ sìpiↄ kpàmá lↄ. 51 Kɛata buieↄ mɛ́ Ɛflaiũ buiↄ wɛ̃́lɛↄ blè lↄ.

52 Wà Ɛflaiũ bùsu sĩ̀sĩde misiwɛ̃lɛ pↄ́ wì mɛ Sikɛũ kpàmá ń Gɛzɛɛo 53 ń Yↄkemaũo ń Bɛtolonio 54 ń Ayalonio ń Galimↄo, ampii ń a dã́dãkɛkĩioɛ. 55 Manase bui pↄ́ kú bɛ'aɛ oiↄ mɛ́ Anɛɛ ń Bileaũo ń ń dã́dãkɛkĩio kpà Kɛata bui kĩniↄwa.

56 Wɛ̃́lɛ pↄ́ Geesↄ̃ buiↄ èn kɛ: Manase bui pↄ́ kú gukpɛ oi wɛ̃́lɛↄ Golana pↄ́ kú Basana bùsuu ń Asaloo ń ń dã́dãkɛkĩio. 57 Isakaa bui wɛ̃́lɛↄ Kɛdɛsi, Dabela, 58 Lamↄtu ń Anɛũo ń ń dã́dãkɛkĩiↄ. 59 Asɛɛ bui wɛ̃́lɛↄ Masala, Abedↄ̃, 60 Hukoko ń Leobɛo ń ń dã́dãkɛkĩiↄ. 61 Nɛfatali bui wɛ̃́lɛↄ Kɛdɛsi pↄ́ kú Galile, Hamↄ, Kiliataiũ ń ń dã́dãkɛkĩiↄ.

62 Levii nɛ́ Mɛlali buiↄ mɛ́ gↄ̃̀. Ɔ̃ aa Zabulↄni bui wɛ̃́lɛɛ beeↄ è: Yↄkenaũ, Kaata, Limↄnↄ ń Tabooo, ampii ń a dã́dãkɛkĩiↄ. 63 Aa Lubɛni bui pↄ́ kú Yuudɛ̃ baa bↄaa ń Yelikooↄ wɛ̃́lɛɛ beeↄ è lↄ: Bɛzɛɛ pↄ́ kú guwaiwaiu, Yaza, 64 Kedemↄ ń Mɛfaao, ampii ń a dã́dãkɛkĩiↄ. 65 Aa Gada bui wɛ̃́lɛɛ beeↄ è lↄ: Lamↄtu pↄ́ kú Galada bùsuu, Maanaiũ, 66 Ɛsɛbↄ̃ ń Yazɛɛo, ampii ń a dã́dãkɛkĩiↄ.