Bibeli Luayãtaalá Titu 1

TITU

Yã́ pↄ́ kú láɛ bee guuↄ

Tituá Yesudeɛ, ãma Yuda no (Gal 2.1-3). À gↄ̃̀ Pↄlu ìwa ũɛ mɛ́ à zĩ zↄ̃ↄ kɛ̀ Kↄlɛnideↄ ń Pↄluo maakↄ̃ɛ yã́ musu (2Kln 7.6-16). Pↄlu láɛ bee kɛ̃̀ɛ̀ gↄↄ pↄ́ Titupi ku Kɛlɛtiɛ, à Yesude pↄ́ aa kú ísia gũgũnapiwaↄ yã́gɛa'aɛzĩ nàɛ̀ aà ↄzĩ.

Lápi daalɛaá waaso pↄ́ Pↄlu ìↄ kɛnɛ́ yã́ɛ (1.1-4). Bee gbɛa yã́ pↄ́ a dìlɛ gãli dↄaanaↄnɛɛ (1.5-16). Lɛɛ pla guu à lɛdà Tituwa gbɛ̃́ pↄ́ àlɛ zĩkɛńnↄↄ yã́ musu: Maeziↄ, nↄɛziↄ (à kũ̀ aa yãdada wɛ̃́ndiaↄnɛ), ɛ̀waasoↄ ń zↄↄ (2.1-15). Lɛɛ àaↄ̃ guu à Yesude yãkɛaↄ bↄↄlɛkɛ̀, kɛ́ an kua aaↄ na, aasuli kↄ̃kpaalɛo (3.1-11). Bee gbɛa à lɛdà Tituwa, à fↄkpàmá (3.12-15).

Lápi kyokɛna a e kɛ́ lápi waaso dɛ Titu yã́ ũ adoo. Yã'ĩa pↄ́ Pↄlu òↄá yã'ĩa pↄ́ ìↄ Yesudeↄ le mↄ̀ↄmↄↄↄɛ: Yesudeↄ yã́ↄ zɛ́kalɛa ń dↄaanaↄ yãkɛaↄ ń Yesudepiↄ yãkɛaↄ.

Titu zĩkɛa Kɛlɛti bùsuu

1 Ma Pↄlu, Lua zↄ̀blena, Yesu Kilisi zĩna, à ma zĩ mà gbɛ̃́ pↄ́ Lua ń sɛ́ↄ da a zɛ́u, mí tó aa lousisia sĩana dↄ̃, 2 an wɛ́ iↄ dↄ àizãna pↄ́ Lua a lɛgbɛ̃̀ zadↄ̃ gↄↄ i daalɛozi, Luapi lí ɛɛto sↄ̃o. 3 Yã́pi bↄ̀ gupuau a gↄↄwa waaso pↄ́ Lua wá Suabana nàmɛɛ ma ↄzĩ guu, lá a dìlɛwa. 4 Mámɛ ma láɛ bee kɛ̃̀nɛ Titu,* ma nɛ'ia Yesu zɛ́ pↄ́ wá kúu sãnu guu. Mae Lua ń Kilisi Yesu wá Suabanapio gbɛ̃kɛkɛnɛ, aai n gba aafia.

5 Ma n to Kɛlɛti kɛ́ ǹ yã́ pↄ́ gↄ̃̀ weↄ gↄ̃́gↄ̃, ní gbɛ̃zↄ̃ↄↄ dilɛ wɛ̃́lɛ ń wɛ̃́lɛo lá má ònɛwa. 6 A maa gbɛ̃zↄ̃ↄ líↄ ku tàaesai nↄmɛndode ũɛ. Aà nɛ́ↄ ìↄ luayãmanaↄ ũ, i kɛ aaↄ dɛ nɛ́ zazaa lalasideↄ ũ no. 7 Lá dↄaanaá ziiaɛ Lua zĩ guu, a maa aàↄ dɛ tàaede ge swã́gbãade ge pↄkũmade ge igbɛ̃na ge ãiapãsĩde ge ↄwɛɛlɛmbɛ̃ɛ ũo, 8 sema nibↄfↄ̃na ũ, laaide pↄ́ zɛ̀ ń maakɛao ũ, gbɛ̃maa pↄ́ a kua adoa mɛ́ a azĩa kũa dↄ̃ ũ,† 9 gbɛ̃́ pↄ́ zɛ̀ súsu ń Lua yã́ náaideo lá wì danɛ́wa ũ, kɛ́ à e lɛda gbɛ̃pãleↄwa ń yã́ sĩandepio, i gbɛ̃́ pↄ́ bↄ̀ a yã́ kpɛↄ ɛɛkanɛ́ ń ↄzĩ.

10 Asa swã́yãmansaide pↄ́ aaì gbɛ̃́ↄ liaa ń ń yã'oaoↄ dasi, atɛ̃sa Yudaↄ guu. 11 Aaì ua bṹu gbɛ̃́ↄ ↄ̃̀ↄkpa. A maa wà lɛsↄkpanɛ́. Aaì yã́ pↄ́ dɛ wà danɛ́o danɛ́ ↄbɛ̃ɛ'ea yã́i. 12 Kɛlɛti bùsu ãnabie mɛ̀ Kɛlɛtiↄá ɛɛdeↄnɛ, wài pãsĩↄnɛ, ye'uiade pↄewonsaiↄnɛ. 13 Yã́piá sĩanaɛ. Ayãmɛto lɛdamá pãsĩpãsĩ, kɛ́ aa zɛ́sɛ súsu. 14 Aasu laaidↄ Yudaↄ fĩwao ge gbɛ̃́ pↄ́ kɛ̃̀ sĩanawaↄ yãdilɛaↄ. 15 Pↄe líↄ gbãsĩ gbãsĩsaideↄnɛo, mɛ́ pↄe líↄ gbãsĩsai luayãdansai gbãsĩdeↄnɛo, kɛ́ an làasoo ń ń nↄ̀sɛo vãi yã́i. 16 Aaì mɛ wa Lua dↄ̃, ↄ̃ an yãkɛa ì ń ɛɛbo. Lua ginzideↄnɛ, aali aà yãmao, aali fↄ̃ yãmaae kɛ̀o.