2
1 Gbɛ̃nazĩn wisaideↄ,
à kãaa, í lɛkpaaĩ
2 e gↄↄdilɛapi àↄ gɛ́ kái,
e Dii pↄkũma zↄ̃ↄ àↄ gɛ́ á lei,
e Dii pↄkũma gↄↄ àↄ mↄ́wá,
asa gↄↄpi a su lán ése ṹawaɛ.
3 Á nↄ̀sɛdoũde pↄ́ i Dii yãmaↄ,
à aà kĩ́i wɛɛlɛ,
à wɛɛlɛ àↄ maa, á nↄ̀sɛ iↄ doũ.
Bee a gí á bↄi Dii pↄkũmagↄↄa?
Yã́ pↄ́ a Filitɛ̃ↄ le
4 Gazadeↄ pãkpa ń wɛ̃́lɛi,
Asekeloni a gↄ̃ bɛzia ũ.
Wa Asedodadeↄ ya fãanɛ,
wa Ɛkɛlonideↄ wo ń bɛ.
5 Waiyoo á Kɛlɛti bui pↄ́ á kú ísialɛↄ!
Dii yã́ pↄ́ a á le òɛ́.
Á Kanaa pↄ́ á kú Filitɛ̃ bùsuuↄ,
Dii mɛ̀ á á kaalɛ, á gbɛ̃e a gↄ̃o.
6 Ísialɛ bùsupi a gↄ̃ dã́dãkɛkĩi ũ,
wekĩi sãdãnaↄ kálɛu, aai kaaↄ dada.
7 Yuda kↄ̃naↄ gↄ̃ bùsupi vĩ,
aamɛ aa pↄ́ dã́dãkɛu,
aai wúlɛ Asekeloni kpɛ́ↄ guu oosi.
Dii ń Lua a ↄliańzi,
a suńnↄ ń pá ziu.
Yã́ pↄ́ a Mↄabuↄ ń Amↄniↄ le
8 Má mà Mↄabuↄ ma gbɛ̃́ↄ sↄ̃̀sↄ̃,
Amↄniↄ ń tↄbɛ̃ɛsì,
aa kuabìimá ń bùsu yã́ musu.
9 A yã́i ma Dii Zĩgↄ̃de Isailiↄ Lua,
má ò ń ma kuao ma mɛ̀
Mↄabuↄ gↄ̃ lán Sↄdↄũdeↄwa,
Amↄniↄ sↄ̃ lán Gↄmↄↄdeↄwa.
An bùsu a sɛ̃̀ vãi bↄlɛ,
ɛ̀ wiside aↄ diu.
Aↄ dɛ guyaaa ũ gↄↄpiiɛ.
Ma gbɛ̃́ pↄ́ gↄ̃̀ↄ ń pↄ́ↄ naaa,
bui pↄ́ má sɛ̀ kↄ̃naↄ gↄ̃ ń bùsu vĩ.
10 Buipiↄ yã́pi e ń ĩ́andãa gbɛ ũ,
asa ma Dii Zĩgↄ̃de, aa ma gbɛ̃́ↄ sↄ̃̀sↄ̃,
aa kuabìimáɛ.
11 Dii a to sↄ̃ kɛ̃́ńgu
gↄↄ pↄ́ a to dṹnia diiↄ sãalɛ píi.
Bùsu píi gbɛ̃́ↄ i kúlɛɛ̀,
baade a bùsuu.
Yã́ pↄ́ a Etiopiↄ ń Asiliↄ le
12 Etiopiↄ sↄ̃, Dii a fɛ̃nda tↄ̃́wá.
13 A ↄloo gugbãntoodeↄla,
i Asiliↄ dↄ̀ↄsↄmpa.
Niniva a gↄ̃ bɛzia ũ gii lán guwaiwaiwa.
14 Sɛ̃sao nↄ̀ↄ bui píi aaↄ wúlɛ we,
gáuↄ ń kpↄbↄ'ilɛnaↄ pɛ́pɛ a gbɛ̀pɛlɛↄwa.
An wii aↄ dↄ fɛnɛntiↄ guu,
kpɛ́ↄ zɛ́ a káka ń gĩ̀ wíwiaↄ,
a zaliↄ bↄ gupuau.
15 Wɛ̃́lɛ pↄnade pↄ́ a gbɛ̃́ↄ kálɛa dↄdↄan we.
Aa ò ń sↄ̃u aa mɛ̀,
ń wɛ̃́lɛ sáa vĩ guei lↄo.
Gwa! A gↄ̃ sↄ̃kɛ̃ngu pↄ́ ũɛ,
wàiↄ tòo ũ.
Gbɛ̃́ pↄ́ lɛ́ dↄiↄ swedↄwà
ń ↄkɛa yàayaao.