Eletar yay yo Pool ahiĉ me bugal
Efes
Waf waw wabaj me n’eletar yauye
Eletar yauye Pool nahiĉyohiĉ bi ni ejangaraay bugal ésuh yay yal Efes, nahiĉyohiĉ may bi ni guomunor ejangara gammeŋe gaa mof mamu maamme jama Turuki. Ni fipeh nahiĉ yo (Efes 3.1 ; 4.1), ban naomendówomen ategor akan gurim gareto baligenerol búsola bo naligen me sijangu sausu.
Gaᵽinor gagu gafaŋ me ebaj hámma n’eletar yauye go guomme gaa wo Aláemit ajoh me bi ekan. Dáuru waf wajahaliene waamen ni fukoᵽ, ban Yésu akane bugan bugagu n’guffas wo. Ni Yésu Kirista úkanoume, ban ugogor bátuler babu ᵽoobo, émit yay ni ettam yay. Usesen min gajogor gubaj tutor bugan bugagu ni ᵽoᵽ tutor bugan bugagu ni Aláemit. Ni waf wauwu wo Aláemit aᵽi me najoh ekan, Jangu ebaj dó gailo gámah. Pool naŋaŋar únogor wammeŋe min áᵽajul baloberol. Jangu yay níni ti enil yay yaa Kirista. Enil yauyu ebbagebah m’báelout. Jangu yauyu mul níni ti yaŋ yo Kirista aam fíĉit yo, ban ejangaraay guteᵽeyoteᵽ to me.
Ni Efes 1 bi 3, Pool nabbatorbator ni gajogor gagu gabaj mee, ni búkanum baa Yésu asen me buroŋol ni ekurua. Ejangaraay galet me Esúif gutegotegor gúni ésuh yanur ni bugagu gaamme Esúif ; guyabeyab n’Aláemit maaro mamu manur mamu. Kirista nanemenemen biinum babu bal ejoh an ni fiiñ ban nábbañenul akan tin tanur bugan bugagu gáfaculoren me.
Ni Efes 4 bi 6, Pool naaseh ejangaraay gujoh liŋ gáinen gagu ni gajogor gagu so Aláemit asenil me. Nasenilsen buaken bal eroŋ ni bakaner buvugul. Natatar mala gaunor ni yaŋ (Efes 5.21–6.9) ; wáineaw nafaŋe nalobe ni bugo. Gúni me ufan saŋ, guote gúni yo ti Kirista, asen me buroŋol. Eoh wáineaw gúbboli mamu waaril (Efes 5.25-33), dáru kakan waf uvugul. Egiten gannay gaugu ufan waw búoh gubaje anafan n’émit (Efes 6.9) kakan ᵽoᵽ waf uvugul.
1
Basaf babu baa Pool
1 Injé Pool, o Aláemit aĉob me íni aᵽotora ala Yésu Kirista, ínje iom n’esaf bugan bugagu gaamme Efes bugo Aláemit aĉob me ban ni gúinen ni Yésu Kirista.
2 Mbi Ᵽayolal Aláemit ni Ataw Yésu Kirista gúsonienul ban n’gusenul gásumay !
Gáji gagu go Aláemit ásenumolal me ni Yésu Kirista
3 Usalal Aláemit aamme Ᵽay Ataolal Yésu ! Nakanolalkan min ubajal gásonien gánogan gaa Biinum babu gáᵽullo fatiya émit yay, dó ᵽe mala gajogorolal ni Kirista.
4 N’aĉila Yésu náĉobumolal me ᵽio bo balama mof mamu mujui, min mb’únial bugan ganabe, bugan gaĉole bújoŋorol. Gábboliol go nábboliolal me guĉil me
5 min aᵽi bo nakiĉolal únial uñil bugola ni Yésu Kirista, ti súmol me,
6 dáuru ᵽe min mb’usalaol mala gájiol gájalo mee go násenumolal me n’Añolol o nábboli me nár.
7 Gájiol gújalojalo nár bireg naallorolal ni físim fafu faa Kirista, naboketolal utilolal.
8 Gáji gaugu, Aláemit nammeŋenolalgommeŋen min úbajumal to malillo ni mujah mánoman.
9 Súmolsum min akanolal mamu nuffasal bakiĉerol bo an ájuenut me ajoh, bo nákiĉali me min mbi bukano ni Kirista.
10 Bakiĉer baubu bajae me ekano iki bírir tinah bo baĉiger, bo buomme eomen waf waw ᵽe waamme fatiya ni waamme n’ettam úni ni gañen gal afan anur : afan ahumu o aamme Kirista.
11 Maagen Aláemit nakanekan waf waw ᵽe ti nakiĉ yo me. Wóli jaamme Esúif naᵽi bo nakiĉóli bi éni ufumaol, mata mamu najoge.
12 Nakanmokan min mbi wóli jamundum me jíhagum ni Kirista jiĉil bugan bugagu min gusalen bájalool aĉila Aláemit.
13 Buru ᵽoᵽ ni Kirista jíhagume kábiriŋ no juun me jiban firim fafu faa maagen, faamme Firim fafu Fásum me faŋallul mee gaᵽah. Mamu buru may, Aláemit nasenulsen Biinum Banabe bo nalobolal me mala bo, min mbi bíni ni buru fúffasum fafu fola.
14 Biinum Banabe bo buomme fugab fítiar faa gafumolal go nujaale me eyab, dó ᵽe mala bi eallorolal, wolal bugo Aláemit aĉob me únial bugola min usalenal bájalool.
Galaw Pool bi ni bugan bugagu gáinen me
15 Yo eĉil me ínje may, no niun me gulob mala gáinenul go jibaj me ni Ataw Yésu, n’gulob ᵽoᵽ mala gábboli gagu golul go júbboli me bugan bugagu ᵽe bugo jugum me gáinen,
16 ímusut ihat esalen Aláemit molul ínje ni galaw.
17 Injé umu n’elaw Aláemit ahu ala Ataolal Yésu Kirista, Ᵽaaya ahu ala gasal, min ammeŋenul Biinumol basene me malillo ni súmori, min júju jiffasol joon.
18 Nilae tima nápegul uinumul min jiffas gáhagum gay nasenul no naĉobul me, ban ni jiffas ᵽoᵽ bu gafum gagu go nabaŋ me bi ni bugola gutineni me.
19 Nilae ᵽoᵽ min mbi jiffas bájalo babu baa sembeol so an ájuut me alih, sembeol so naŋar me min arambenolal wolal ᵽe jáinen me ni o.
20 Sembe sausu nagiten mee no nailen me Kirista ni gaĉet me ak’anamen ni gáribol dó n’émit.
21 Mamu, Kirista ñer nafaŋ fufane fánofan, jávi jánojan, bájalo bánoban, gajow gánogan gájue guvogi let ni buroŋ be bare, bare ᵽoᵽ ni bice bájaeul.
22 Aláemit nabaŋe waf waw ᵽe fattam uhah Kirista, aban nakanol áni ni fuhow faa Jangu yay.
23 Maagen Jangu yay enilol yom, ban buroŋol ni bimmeŋen yo ᵽe ni gárira bo.