3
1 Nemme wóli jújuenut jinah faŋ to, n’jujoh enamo wóli bareóli n’ésuh yay yal Aten,
2 ban ni juboñulul atiolal Tímonte, aamme ni burok ni wóli bi mala Aláemit ni gavare gagu gaa Firim fafu Fásum me falob me mala Kirista. Juboñulolboñ min mb’aliŋen gáinenul ban ᵽoᵽ nasenul buaken nímoro,
3 mamu, jambi gálatien gagu go nuomal maa ni go gukan an ni buru min állelen. Buru faŋaul jiffase búoh gálatien ti gaugu Aláemit naᵽiᵽi nakiĉ go ahato bi ni wolal.
4 Maagen mamu, no wóli juomen to me ni buru, jiᵽiene n’julobáliul búoh ᵽan gúlatienolal, yo may ebaj me, ban jiffase ᵽe.
5 Yo eĉil me ñer, nemme íjuenut inah faŋ to, níboñul Tímonte ákail ajuh bu gáinenul gukane. Níholienholi jambi Seytane abutul min ñer burokóli mati bubaj nafa.
6 Bare maer ñer, Tímonte naotulo ban nalobólilob gurim gásume mala gáinenul ni ᵽoᵽ mala gábboliul. Nagitenóli ᵽoᵽ bu buru juroŋ me n’eᵽinor móloli ni gábboli ró, ni may bu buru jimaŋ me jibbañ jujugóli ti wóli faŋaóli jimaŋ me ejugul.
7 Yo eĉil me, gutióli, hani min wóli jibaj me buyoh baubu ni sílam sausu ᵽe, wóli jiyayab buaken no gulobóli me molul. Gáinen gagu golul gúsenoli mee buaken baubu.
8 Nemme buru jútutuh liŋ tir n’Ataw, kanólikan ñer nan wóli jibbannobañ jíni m’buroŋ.
9 Gay gasal wóli jújue ᵽiaŋ jisal Aláemit molul, mala ésumay yay ᵽe yo jiŋallóli me bújoŋorol ?
10 Etufunaha ni efuga, wóli ubugu n’elaol faŋ aboket akan tima n’jibbañ jujugul táh, min jifabenul waf waw waŋaño bo me tima gáinenul n’gufaŋ n’guliŋe.
11 Mbi Ᵽayolal Aláemit faŋaol ni Ataolal Yésu gusenóli bulago bal ekelul bujuh !
12 Mbi Ataw akan min gábboli gagu go júbbolior me ni go júbboli me bugan bugagu ᵽe gufaŋ n’gújaloe maagen mamu, mb’akan go n’gúni ti go wóli júbboliul me.
13 Mb’affaŋen uinumul, mamu ñer ᵽan jíni bugan ganabe, bugan gáriŋe bújoŋor Ᵽayolal Aláemit, no Ataolal Yésu ajae me ébbañul ni bugan bugagu ró ᵽe bugo naĉil me.