Firim fafu Fásum me ti
Saaŋ
anabaw ahiĉ fo me
Waf waw wabaj me n’élebur yauye
Saaŋ nahihiĉ ewansil yay yola bi ni guomunor gagu gal ejangaraay gaĉin me ni mof mamu maa Siri ni ᵽoᵽ ni mamu mo guvoge me jama Turuki.
Bajaer ewansil yauye búbuliore ni baa sasu siewansil saamme sífaji, hani balober yo mamu búbulior mee ni bala so. Tánotan ni yo egitengiten majahaliene mamu mo balober babu ni bakaner babu saa Yésu sibaj me.
Funah fafu faa Paak, Yésu náᵽurul maroŋe ulagorol gujugol (Saaŋ 20 ni 21). Ñer ahiĉa élebur yay aamme Saaŋ nalob dáure aah nahihiĉ éleburol min mbi bugan bugagu gajugut me Yésu, bugo may gúinen ni Yésu ahumu (Saaŋ 20.29-31).
Ewansil yay yaa Saaŋ ñammeŋe elolob mala Esúif yay ti bugan gáᵽure jolil. Min Saaŋ aage me "Esúif yay," ñammeŋe mala ulatoraaw bugaa Yésu namaŋe elob, fáŋum ufanil galalol me. Yésu faŋaol Asúif nam ti bugo, ban ulagorol gútiar may mo. No Saaŋ alobe mala Esúif yay, let ñer mala bugo ᵽe nalobe, bare mala ánoan ᵽe alale Yésu Kirista.
Ewansil yay yaa Saaŋ elobut mala gabugi Yésu ter mala éᵽurol ni fuhay. Bare ni fíĉilum yo fahuli mee egitengiten búoh Yésu Kirista aamme Firim fafu fal Aláemit, faam to me manur n’Aláemit kábiriŋ ni buju babu (Saaŋ 1.1-18). Yésu aamme Firim Aláemit, najoulojow ákiil aroŋ ni bugan bugagu. Mamu n’gúju gúni uñil bugal Aláemit. Ni buroŋol babe n’ettam, Yésu najogojogor liŋ tir ni Ᵽaaya. O aamme an ahu o Ᵽaaya aboñulo me babe ni mof. Bugan bugagu ᵽe galiᵽe me Aláemit gújue gújoum n’aĉila Yésu min guffasol.
1
Firim fafu faŋar me enil yal arafuhow
1 Ni fíĉilum fafu, Firim fubaje. Firim fafu ni fíni tiñ tanur n’Aláemit, ban Firim fafu Aláemit o faŋaol fom.
2 Firim fafu n’Aláemit fuomene ni fíĉilum fafu.
3 Ni fiĉila Aláemit átulum me waf waw ᵽe, ban bajut uce wakani fo m’balet.
4 Fiĉila furoŋen me waf waw ᵽe, ban buroŋ baubu bo buomme gajaŋa bi ni bugan bugagu.
5 Gajaŋa gaugu n’gujaŋ n’emoĉ yay, ban emoĉ yay éggubut go.
6 Bajene an ace o Aláemit aboñulo, gajaol Saaŋ Batis.
7 Najoulo bi egiten mala gajaŋa gaugu ; o mb’aĉil me min bugan bugagu ᵽe gubaj gáinen ni go.
8 Let aĉila aamme gajaŋa gagu, bare bi egiten mala go najoulo mee.
9 Gajaŋa gaugu go guomme gaa maagen, gafijigene me ánoan no guĉilo me ni mof.
10 Firim fafu ufuen ni mof, ban ni fiĉila mof mamu mútulumi me ; bare til mof mamu mútallout fo.
11 Funonulo n’ésuh fo, bare bugan bugagu bugala fo guyabut fo.
12 Ban gayab fo me ᵽe, dóemme gáinen me ni fo, fisenilsen sembe sasu sal éni guñol Aláemit.
13 Gúni me guñol Aláemit, dóemme let gabugi gal enil ter gamaŋ gace gal arafuhow guĉil dó, bare Aláemit faŋaol akanil n’gúni guñolol.
14 Firim fafu ni fuŋar enil yal arafuhow min fúkail fiĉin n’etulolal, ni fimmeŋ gáji ni maagen. Ban nujugale bájalool ; bájalo babu biĉila nabaj bo mala min aamme Erímbani yay yal Aláemit Ᵽaaya.
15 Saaŋ Batis nalobe bugan bugagu mala an ahumu aah fatiya : « Dáru aĉila o nilob mee mola ioh : “An ahumu ajae mee éjoul búsolom, o ayabom gayoŋ, mata namundom áni.” »
16 Ban wolal ᵽe nuyabale bímmeŋenum babu bola ; nuyabale gáji gunaᵽ gapago.
17 Aláemit ni Móis násenum me gúboñ gagu ; ban gáji ni maagen, so, ni Yésu Kirista siraŋulo.
18 An ámusut ajuh Aláemit ; bare Erímbani yay, aamme Aláemit ban najogor ni Ᵽaaya ti an anur, aĉila nakanolal min uffasalol.
Bagitener Saaŋ Batis mala aĉila ni Yésu Kirista
(Mácie 3.1-12 ; Maruk 1.2-8 ; Lík 3.15-17)
19 Funah fice, ufan Esúif yay n’gúboñul ufan uteŋenaaw ni ᵽoᵽ bugan bugaa fiil fafu faa Lévi kábiriŋ Yérusalem bi eroren Saaŋ Batis o aamme ay.
20 Alalut ébalil, nalob ŋanno ca bújoŋoril ᵽe aah : « Let ínje iomme Kirista ahu. »
21 N’guogol : « Ñer aw uomme ay ? Aw uomme aboñer ahu Elí ? » Naagil : « Ilet aĉila. » N’guogol : « Aw uomme aboñer ahu o Móis alobóli me mola ? » Naagil : « A-a. »
22 Ñer n’guogol : « Aw uomme ay ? Ulobóli min mbi júju jíbal bugan bugagu gaboñulóli me. Wa nújue ulobóli míya ? »
23 Saaŋ naagil :
« Injé iomme an ahu o aboñer ahu Esai alob me mola.
Injé iomme an ahu o náh’áᵽib mee ni gafit gagu aah :
“Jucokor Ataw bulago baĉolea !” »
24 Bugan bugaubugu bugo guboñulo me, Eᵽárisie bugom.
25 N’gubbañ gurorenol n’guogol : « Iní me ulet Kirista ahu, ulet Elí, ban ᵽoᵽ ulet aboñer ahumu, wa uĉile ñer núh’úbatise bugan bugagu ? »
26 Saaŋ naagil : « Injé ni mal níh’íbatise bugan bugagu. Bare baje ace n’etulul o buru jiffasut
27 aam n’éjoul búsolom ; iᵽilout bi ejal ganew gadalaol. »
28 Dáuru ᵽe n’ésuh yay yo guvoge me Betani baj mee, yaamme ñagagu fal fafu fo guvoge me Suruden ; ni fal faufu Saaŋ náh’ábatise me bugan bugagu.
Yésu o aamme gabbarum gagu gal Aláemit
29 Tihalen fo, Saaŋ najuh Yésu o n’éjoul mbal aĉila, ñer naah : « Gabbarum gagu gal Aláemit uge, gáᵽurene me gatil gagu gaa mof.
30 Mola nilob mee no nioh me : “An ahu ajae me éjoul búsolom nafaŋom fúf mata o amundom áni.”
31 Ban ínje faŋaom iffasenutol, bare nikeloke íbatise ni mal bi ekan ésuh yay yal Israel min guffasol. »
32 Saaŋ natajen aah : « Nijuge Biinum Banabe búavul n’émit ti gálab íkiil birembor ni o.
33 No, iffasenutol, bare Aláemit aboñulom me íbatise ni mal, naagomseh : “An ahu o nujae me ejuh Biinum Banabe búavul iki birembor ni o, an ahumu ajae me ébatise ni Biinum Banabe.”
34 Ban ínje Saaŋ nijuhrójuh, yo eĉil me ñer nigiten búoh aĉila aamme Añol Aláemit. »
Ulagora Yésu gútiar
35 Tihalen fo, Saaŋ nabbañ áni tiñ talu tanur tatu, manur ni ulagorol gúuba.
36 No najuh me Yésu áni n’égat, naah : « Gabbarum gagu gal Aláemit ugu. »
37 Ulagorol gaamme gúuba n’guun gurim gaugu, ban n’gulagen Yésu.
38 Ñer Yésu nábahoul najuh búoh aĉila guom n’elagen naagil : « Wa jiliᵽe buru ? » N’guogol : « Rabbi (yaamme "Aligena ahu"), tay nuĉine ? »
39 Naagil : « Jújoul, ban ᵽan jujuh. » N’gujow, ban may n’gujuh to naalen me ; ñer funah faufu n’gunamo to n’aĉila. Maageima tinah báruser, utaw batiñer uban.
40 Ace ni gaamme gúuba gaun me gurim gagu gaa Saaŋ, mbiban n’gulagen Yésu, gajaol Andere, ati Simoŋ Ᵽier.
41 Namundum ak’atoh atiol Simoŋ naagol : « Wóli jujuge An ahu o Aláemit aĉob me » (yoemme Kirista ni gugerekay).
42 Aban nájaenumol bi ni Yésu. Yésu nalujol aluj naagol : « Aw uomme Simoŋ, añol Saaŋ ; ᵽan ivogi Kefas. » (Dóemme Ᵽier ni gugerekay, yaamme "fuval".)
43 Tihalen fo, Yésu najoh bi ejow mbaa mof mamu maa Gálile. N’ejaol naemor n’ace áine gajaol Fílip ban naagol : « Ulagenom ! »
44 Fílip ahumu an om ala Betusaida, ésuh yay bo ᵽoᵽ Andere ni Ᵽier gúᵽullo me.
45 Ñer Fílip nak’atoh apalol gajaol Natanael naagol : « Wóli jujuge an ahu o gulobe mee mola ni gúboñ gagu gaa Móis ni ᵽoᵽ ni bahiĉer bugagu uboñer, o aamme Yésu ala Nasaret, añol Susef. »
46 Natanael naagol : « Waf ᵽiaŋ waaro way újue úᵽurul Nasaret ? » Naagol : « Ujóul, ban ᵽan ujuh. »
47 No Yésu ajuh me Natanael min ájaeul mee, nalob mola aah : « An ala Israel ala maagen umu ; bajut ni o uce walet waa maagen. »
48 Ñer Natanael naagol : « Bu jáorum me nuffasom ? » Yésu naagol : « Injé imundum me ijugi no nuomen me fattam bífig babu, balama Fílip ákail avogi. »
49 Naagol : « Afanom, aw uomme Añol Aláemit, aw uomme ávi ahu ala Israel. »
50 Yésu naagol : « Nemme niegiseh nijugi fattam bífig babu, yo eĉil me núinen n’ínje ; ᵽan ujuh uce wafaŋe gájalo wauwe ! »
51 Natajen aah : « Maagen, ínje ilobul yo : ᵽan jujuh émit yay épegulo, ban emalaka Aláemit ᵽan nihi gujiŋ n’gúavul fatiya Añol Arafuhow. »