Eletar yay éutten yo
Ᵽier
ahiĉ me
Waf waw wabaj me n’eletar yauye
Eletar yauye ehiĉihiĉ bi ni ejangaraay ᵽee. Enogonogor nan gurim gom gaa búhanor. Ᵽier naage tinah talu tal eĉelol tulofe (2 Ᵽier 1.13). Nahiĉyohiĉ min mbi bugan bugagu gáinen me guosen nánonan baligenerol.
Ᵽier naagilseh n’eletar yauye jambi gubelen gáni gagu gáari me gajoumulo me ni gáinen gagu golil, ban mbi gujoh to liŋ bi nánonan ni baligener babu bo guyab me (2 Ᵽier 1). Ᵽúrto, natigen uligenaaw galet me bugaa maagen galigene me bugan bugagu waf waa jibij ban nihi gukan dó me (2 Ᵽier 2). Mbiban nalob mala funah fafu fo Ataw Yésu ajae me ébbañul (2 Ᵽier 3). Ejangaraay bugaa jabbah jítiar guĉele ᵽee, ban bi maer Yésu abbañerulat. Ñer gammeŋe ni bugo n’gúguo mata gujogut wa uĉile garatten gaugu. Bare ejangaraay bugo n’enagol, Aláemit umu n’egiten ebeben yay yola, dó ᵽe bi éji bugan bugagu ᵽe bulago min gúbahen buroŋil.
Ejangaraay gubaje Bahiĉer babu bal uboñer waw bugal Aláemit baamme ni sílebur sasu so guvoge me "Bahiĉer babu Bufan babu" bi ejjonenil ni gáinenil. Guyayab ᵽoᵽ baligener babu baa bugan bugagu bugo Yésu Kirista faŋaol aligen me (2 Ᵽier 3.2). Ni tinah talu no eletar Ᵽier éutten ehiĉi me, totoh siletar Pool sice so baffaseri (2 Ᵽier 3.15). Ᵽier naage ñer jambi an amaŋ áᵽajul Bahiĉer babu o nevonol (2 Ᵽier 1.20), jambi ᵽoᵽ akan yo o mbaᵽinorut ák’átijen (2 Ᵽier 3.16). Tale til rorene garamben gagu gaa bugagu ejangara ni ᵽoᵽ gaa Biinum Banabe.
1
Basaf babu baa Ᵽier
1 Injé Simoŋ Ᵽier aamme aroka ni aᵽotora ala Yésu Kirista, ínje ihiĉe eletar yauye bi ni buru bugo gáinenul gunnam me ni góloli, gáinen gaugu gáᵽullo me ni maĉole mamu mal Aláemilolal ni Aᵽagenaolal Yésu Kirista.
2 Mbi gáji ni gásumay síni faŋ ni buru, ni búkanum baa gaffas gal Aláemit ni gaa Yésu aamme Ataolal.
Gailo gagu gáari me gal ejangaraay
3 Aláemit ni sembeol násenumolal me waf waw ᵽe wo núroŋumal me ni wo, ni gajogor gagu ni o. Nakanolalkan min uffasal an ahu aĉobolal me mala gasalol ni músumol.
4 Mamu Aláemit ásenumolal me maaro mamu matineni mee ban ni mubaj hámma mo nalobolal me esen, min mbi júju júᵽur ni gaija gagu gaamme ni mof maume mahajen mee, min jíbajum to ni gáni gagu gola.
5 Yo eĉil me juote jikakanor min jiŋar ekan maaro jitajen to ni gáinenul, n’jiŋar gaffas gagu go jiffas me Aláemit jitajen to n’ekan maaro yay,
6 n’jiŋar éju ejogoro jitajen to ni gaffas gagu go jiffas me Aláemit, n’jiŋar emuten jitajen to n’éju ejogoro yay, n’jiŋar gáholi Aláemit jitajen to n’emuten yay,
7 n’jiŋar gajogor ti batiay jitajen to ni gáholi Aláemit gagu, n’jiŋar gábboli jitajen to ni gajogor gagu ti batiay.
8 Maagen mamu, gáni gaugu gáari mee go juot me jibaj. Jibaj go me faŋ, ᵽan gukanul min jiaken n’jurok ban ᵽoᵽ n’júju jifaŋ n’jiffase Ataolal Yésu Kirista.
9 Maagen mamu, an abajut me gáni gaugu gáari mee, an ahumu ajugérit ŋanno : nánini ti ápima o nah’amamaen dó me, ban nájumor búoh utilol wo nakanen me no uboketiboket.
10 Yo eĉil me, gutiom, jikakanor faŋ min júttun maagen mamu gavoh gagu go Aláemit avogul me, eĉob yay yo naĉobul me. Jikan mo me, mati julo ni gatil.
11 Mamu Aláemit ᵽan akanul min júju junogen n’gásumay ni Jávi jaju jaa bándor jal Ataolal Yésu Kirista aamme ᵽoᵽ Aᵽagenaolal.
12 Yauyu eĉil me, jiffas yo min jiffas yo, ban n’jíni ni maagenul min jínie, ᵽan nih’iosenul yo nánonan.
13 Bare niᵽinoᵽinor nieh wáriari min iosenul yo maer ᵽan no niroŋ maa ni buru, min mbi juluj to.
14 Niffase búoh tinagom tulofulo tal eĉet, ti Ataolal Yésu Kirista agitenom yo me.
15 Bare ᵽan ikakanor min mbi júju jibaŋ n’uinumul gurim gaugu bi nánonan, hani ínje baleler.
Bugan bugagu gajuh me bájalo babu baa Kirista
16 Maagen mamu, let ni waf waa jibij wóli jújoume min jikanul n’jiffas mala éjoul yay yal Ataolal Yésu Kirista ni sembe yo ró, bare wóli faŋaóli jujujuh táh bájalo babu bola.
17 No Aláemit Ᵽaaya aĉobol me aban nasenol gasal ni bájalo, firim ni fúᵽurul ni bájalo babu bal Aláemit baije mee salsal min fuogol : « Dáure Añolom o níbboli me ; ésumayom ᵽe ni o yom. »
18 Firim faufu fáᵽullo me n’émit, wóli faŋaóli juunfowun no juomen to me ni o baubu ni firijaŋ fafu fanab me.
19 Ban wóli jifaŋ me til ejoh liŋ firim fafu fo uboñer waw bugal Aláemit gulob me ; jikan to me uinumul ni fo, ᵽan may wári faŋ bi ni buru. Firim faufu fínini ti ejaŋa yaam n’efijigen tiñ tamoĉe, bi no tinah talu tijae me ehalen min eraben yay ekan uinumul n’uŋanno.
20 Juote jumundum jiffas wauwe : an ájuut áᵽajul aĉila faŋaol firim faa Bahiĉer babu fo an alobe ni búkanum bal Aláemit.
21 Maagen mamu, bajut firim ti faufu fajoumulo ni búnongum bal arafuhow ; bare ni gáĉibben gaa Biinum Banabe bugan bugagu gulobe mee ni gajow gal Aláemit.