Eletar yay yo Pool ahiĉ me
Filemoŋ
Waf waw wabaj me n’eletar yauye
Filemoŋ abuge om ala aᵽotora ahu Pool. Pool navareolvare Firim fafu Fásum me min ábbañul áni ajangara. Ᵽan kan an asanumete, mata nabaje umigel. Onesim, aamme amigel ace ala Filemoŋ, náᵽupur n’ende afanol atey akay. Ᵽúrto, naemor ni Pool ni fipeh fafu dó naamme. Aĉila may nabbanno áni ajangara. Pool nabbañen ñer Onesim mbal afanol n’eletar yauye ró. Filemoŋ bu najae eyab Onesim nogor ?
Eletar yay yo Pool ahiĉ me Filemoŋ ehiĉihiĉ may bi ni ejangaraay gaemore me yaŋol (Filemoŋ 1.2). Elolob mala waf wagore fuomunor ejangaraay ᵽoofo.
Gannay gaugu, ebaj yay yaamme ni mof mamu maa Rom ni fimigelet ejoumulo. Ᵽan kan búoh bugan bugagu gaĉin me ni mof maumu, ugaboril me ukan uŋas úuba, gaŋas ganur bugala go ᵽe umigel. Gukanekan urok waw ᵽoowo, ban ufanil guĉilil ni wánowan. Amigel atee akay, gujogol me, nah’ayayab gúteh gátañie faŋ, ñammeŋe nayabeyab eĉet.
Pool n’eletarol naaseh Filemoŋ ayab Onesim ti atiay o nábbolie faŋ. Maagen mamu, ni Kirista, bugan bugagu gaamme umigel ni galet me ni fimigelet, bugo ᵽe batiay ni bálinay gom. Bare Pool asenut Filemoŋ gáboñ ; namaŋe til mbi Filemoŋ faŋaol ajoh wo najae me ekan.
Ni unnay wauwu, ejangaraay gútiar gújuenut gúbahen to baenah fiiloil faa buroŋil. Bare gáinen ni Yésu Kirista gúbahene bu nuroŋale me ni mof me. Firim fafu faa gábboli fuŋalloŋar waf uvugul ni buroŋ bal an áinene.
1
Basaf babu baa Pool
1 Injé Pool, o gukul me mala Yésu Kirista, ni atiolal Tímonte, wóli jihiĉeulul maa eletar yauye. Jihiĉulo yo bi n’aw Filemoŋ, aamme abugeóli ni ᵽoᵽ apalóli ala burok.
2 Jihiĉuloyohiĉ may bi n’álinolal Apia ni apalolal Aruĉip o nuomal me ni bútaj babu banur babu. N’jihiĉ yo ᵽoᵽ bi n’ejangaraay gaomunore me yaŋi.
3 Mbi Aláemit Ᵽayolal ni Ataolal Yésu Kirista gúsonienul ban ni gusenul gásumay buru ᵽooul !
Pool o n’emalen Filemoŋ mala gáinenol ni gábboliol
4 Atiom Filemoŋ, nánonan no niom ni galaw, nih’iᵽinoᵽinor míya, ban nisalesal Aláemit,
5 mata niunil gulob ᵽoᵽ mala gáinen gagu go nubaj me ni Ataw Yésu ni ᵽoᵽ mala gábbolii go núbboli me bugan bugagu ᵽe bugal Aláemit.
6 Injé umu n’elaw Aláemit tima gáinen gagu go nugumal me n’gubugor n’aw, tima nufaŋ nukane bugan bugagu n’guffas maaro mamu ᵽe mo Kirista aŋallo me ni buroŋolal.
7 Atiom, gábbolii guŋallomŋar ésumay ni basafor sámah ; nukane uinum waw waa bugan bugagu bugal Aláemit min ufilo.
Pool o n’elaw Filemoŋ min mb’aalen Onesim ni gásumay
8 Atiom Filemoŋ, baje waf wo nimaŋe ilai. Hani min ibaj me ni Kirista sembe sal egiteni bu nuot me ukan,
9 bare faŋe ésumom min ilai galaw ge mala gábbolior gagu gaamme n’etulola. Injé Pool, aam maa gáfanum, ban ᵽoᵽ nibbañ íni ni fipeh mala Yésu Kirista,
10 waf wanur nilai bi ni Onesim. Nijogoljoh ti añil úmbam, mata ínje iĉilol min áinen ni Yésu dáre ni fipeh fe.
11 No, Onesim ahumu anafaenuti wáfowaf, bare maer nababaj nafa ni wola jaamme gúuba.
12 Ban ibbañenuli o, o áni me maer ti gálan gal enilom.
13 Faŋene ésumom ijogol ihat tale n’ínje, dáre dó niom maa ni fipeh mala Firim fafu Fásum me, tima narambenom ni burokom butumi ;
14 bare imaŋut ikan wáfowaf aw m’bagitenutom gaᵽinori, jambi ní ínje iegi ukan, bare aw faŋai uŋar biinumi min ukan.
15 Ter til éfaculorul aw ni Onesim yaᵽiout mee ebabaj mala min mbi abbañ áni úiya bándor !
16 Maer ñer jamb’ubbañ me ujogol ti amigel, bare ujogol faŋ nár amigel : ujogol ti atii o núbboli me nár ! Injé faŋaom níbboliolboli faŋ ; kan ñer aw nuote ufaŋ núbboliol, let mala min aamme amigeli bare, bare ᵽoᵽ min aamme atii o jugum me gáinen ni Ataw.
17 Iní me ñer nujogomjoh ti abugei, mb’ualen Onesim ti nihi ní me ínje faŋaom nualene.
18 Eno me babaj maarat mice mo nakani, ter waf uce wo naogeni, dó ᵽe uŋar ukan ni gajow gúmbam.
19 Injé Pool, ínje inave min ihiĉuli ni gañenom gurim gauge : ínje faŋaom ᵽan ilugeni wo. (Togut min ioseni búoh aw faŋai nuogenom ganew gaamme buroŋi faŋabo.)
20 Ey, atiom, ni gajow gaa Kirista, nilai uboket úttun galaw gaugu go nilai mee ; ukan biinumom m’bifilo mala gábbolior gagu go Kirista aŋallo me n’etulola.
21 Min iom maa n’ehiĉuli, nifiume gaa búoh ᵽan úttun galaom ; niffase gaa búoh ᵽan ukan faŋ to.
22 Mbi may uliᵽom futoŋ dó nijae me ealen, mata nifiume búoh mati ᵽio Aláemit ᵽan áttun ulaul min akan min guhalenom níjoul mbaa buru.
Basaf búsola
23 Epafuras o gukulor me manur n’ínje mala Yésu Kirista nasafi,
24 aĉila, Maruk, Arisutaruk, Demas ni Lík, gaamme ᵽooil gupalom bugaa burok.
25 Mbi Ataolal Yésu Kirista ásonienul buru ᵽe !