3
Yinni Gusunɔn tɔmbu
bɑ koo ben dɑɑ tusiɑ
1 I swɑɑ dɑkio i nɔ ye nɛ, Yinni Gusunɔ nɑ gerumɔ, bɛɛ Isirelibɑ kpuron sɔ̃, bɛɛ be nɑ yɑrɑmɑ Egibitin di.
2 Hɑnduniɑn bwesenu kpuro sɔɔ, bɛɛ tɔnɑwɑ nɑ gɔsɑ.
Yen sɔ̃nɑ kon bɛɛ sɛɛyɑsiɑ bɛɛn durum ye i kuɑ kpuron sɔ̃.
Gusunɔ ù n gɑri geruɑ,
Gusunɔn sɔmɔ kun kpɛ̃
u nɔɔ mɑri
3 Tɔmbu yiru bɑ koo swɑɑ wɔri sɑnnu
bɑ kun ginɑ nɔɔsinɛ?
4 Gbee sunɔ gɑ rɑ gbɑ̃re yɑkɑsɔ
gɑ kun yɑɑ mwɛ ro?
Gbee sunɔ buu gɑ rɑ kukiri gen kpin yerun di
gɑ kun yɑɑ wɑ gɑ dimɔ?
5 Gunɔ gɑ koo tɑɑ mwɑɑrɑ temɔ
bɑ kun ye bɛri?
Tɑɑ yɑ koo se wɔllɔ
gɑ̃ɑnu kun ye kɛsie?
6 Bɑ rɑ tɑbun kɔbɑ so wuuɔ
wuugibu bɑ kun nɑnde?
Kɛ̃siru gɑru tɑ rɑ koore wuuɔ
n kun nɛn min di?
7 Aɑwo, nɑ ku rɑ gɑ̃ɑnu gɑnu ko
nɑ kun yè nɛn sɔmɔ sɔ̃ɔwɑ.
8 Gbee sunɔ gɑ̀ n gbɑ̃rɑ,
wɑrɑ ku rɑ nɑnde.
Nɛ, Yinni Gusunɔ nɑ̀ n gɑri geruɑ,
nɛn sɔmɔ wɑrɑ kun yi kpɑrɑmɔ.
Yinni Gusunɔ
u koo Sɑmɑri sɛɛyɑsiɑ
9 I Asidɔdu kɑ Egibitin tem sinɑ kpɑɑnugibu nɔɔgiru sueyo i nɛɛ,
bu mɛnnɑmɑ Sɑmɑrin guunɔ,
kpɑ bu wɑ dɑɑ bɛrɛtɛkɛ kɑ dɑm dɔrenɑɑ
ye yɑ wɑ̃ɑ ben suunu sɔɔ.
10 Bɑ ku rɑ kɑ̃ bu geɑ ko.
Mɑ bɑ ɑrumɑni gurɑmɔ kɑ dɑm kɑ tɑki,
bɑ tɑɑsimɔ ben sinɑ kpɑɑnɔ.
11 Yen sɔ̃nɑ kon de yibɛrɛbɑ bu nɑ
bu tem mɛ tɑrusi, bu ben dɑm kpeerɑsiɑ.
Kpɑ bu ben sinɑ kpɑɑnu kɔsuku.
Nɛ, Yinni Gusunɔwɑ nɑ yeni geruɑ.
Fɑɑbɑ ye yɑ ǹ nuku dobu mɔ
12 Wee ye nɑ mɑɑ geruɑ. Nɑ nɛɛ,
nge mɛ yɑ̃ɑ kpɑro u rɑ win sɑbenun sukum wɔre gbee sunɔn nɔɔn di,
nge mɛyɑ kon bɛɛ Isirelibɑ wɔrɑ
bɛɛ be i nɑ i sɔ̃ Sɑmɑriɔ kpin yee burɑnu sɔɔ.
Kirɔbɑ
13 I swɑɑ dɑkio i nɔ
kpɑ i Yɑkɔbun bweseru kirɔ ko
i bu sɔ̃ ye nɛ Gusunɔ wɔllu kɑ tem Yinni nɑ geruɑ.
14 Nɑ nɛɛ, sɑnɑm mɛ sɔɔ, kon Isirelibɑ sɛɛyɑsiɑ ben durum sɔ̃.
Kon Betɛlin yɑ̃ku turɑnu kɔsuku,
kpɑ nin kɑ̃ɑnu nu bɔɔkirɑ nu wɔruku.
15 Kon bɛɛn diɑ mi i rɑ n wɑ̃ɑ yɑm susurun sɑɑ kɑ purɑn sɑɑ kɔsuku.
Kpɑ n bɛɛn sinɑ kpɑɑnu kɑm koosiɑ
ni, ni bɑ burɑru koosi kɑ suunu donnu,
kɑ sere dii gee ni nu tie.
Nɛ, Yinni Gusunɔwɑ nɑ yeni geruɑ.