3
Nɛbukɑnɛsɑɑ u woodɑ wɛ̃
bu win bwɑ̃ɑroku wurɑguu sɑ̃
1 Sinɑ boko Nɛbukɑnɛsɑɑ u bwɑ̃ɑroku wurɑguu kuɑ. Gen gunum mu sɑ̃ɑ gɔm soonu wɑtɑ. Gen yɑsum mɑɑ sɑ̃ɑ gɔm soonu nɔɔbɑ tiɑ. Bɑ gu yɔ̃rɑsiɑ bɑtumɑ gɑɑ sɔɔ ye bɑ mɔ̀ Durɑ, Bɑbilonin tem berɑ mi.
2 Yerɑ sinɑ boko u derɑ bɑ tem mɛn sinɑmbu kpuro mɛnnɑ kɑ mɛn beri berikɑn wirugibu kɑ mɛn bwisi kɛ̃ɔbu kɑ mɛn siri kowobu kɑ be bɑ rɑ mɛn ɑrumɑnibɑ bere kɑ sere mɑɑ mɛn wirugii be bɑ tie bu kɑ bwɑ̃ɑroku gen sɑ̃ɑru tore.
3 Mɑ tɔn be kpuro bɑ mɛnnɑ. Ben bɑɑwure u yɔ̃rɑ bwɑ̃ɑroku gen wuswɑɑɔ bu kɑ gen sɑ̃ɑru tore.
4 Sɑɑ yerɑ sinɑ bokon bɑrɔ u kpɑrɑ u nɛɛ, bɛɛ bwesenu kpuro i swɑɑ dɑkio i nɔ ye sinɑ boko u bɛɛ yiiremɔ.
5 Mɑ i nuɑ bɑ kɔbɑ so kɑ guunu kɑ mɔrɔkunu kɑ bɑrɑnu kɑ gɑ̃ɑsu kɑ bɑrɑ bwese ni nu tie, i ko i yiirɑwɑ i bwɑ̃ɑroku wurɑguu ge sɑ̃ ge sinɑ boko u kuɑ mi.
6 Wi u kun yiire u gu sɑ̃wɑ bɑ koo nùn kpɛ̃ɛwɑ mii mii dɔ̃ɔ boko wi bɑ sɔ̃ruɑn suunu sɔɔ.
7 Yen sɔ̃nɑ sɑɑ ye tɔn be, bɑ nuɑ bɑ kɔbi yi kɑ guu ni so kɑ mɔrɔku ni, kɑ bɑrɑ ni, kɑ gɑ̃ɑ si, bɑ yiirɑ bɑ bwɑ̃ɑroku wurɑguu ge sɑ̃wɑ.
Dɑniɛlin kpɑɑsibu itɑ be,
bɑ yinɑ bu bwɑ̃ɑroku ge sɑ̃
8 Yen dɔmɑ te, Bɑbilonigibu gɑbu bɑ seewɑ bɑ dɑ bɑ Yuubɑ dɔmɛ sinɑ bokon mi.
9 Bɑ nùn sɔ̃ɔwɑ bɑ nɛɛ, sinɑ boko, wunɛn hunde yu dɑkɑɑ dɑ!
10 Wunɛ sinɑ boko, wunɑ ɑ woodɑ wɛ̃ ɑ nɛɛ, bɑɑwure wi u nuɑ bɑ kɔbi so kɑ guunu kɑ mɔrɔkunu kɑ bɑrɑnu kɑ gɑ̃ɑsu kɑ bɑrɑ bwese ni nu tie, u yiiro u bwɑ̃ɑroku ge sɑ̃.
11 Mɛyɑ ɑ mɑɑ nɛɛ, wi u kun yiire u gu sɑ̃wɑ bu nùn kpɛ̃ɛyɔ dɔ̃ɔ boko wi bɑ sɔ̃ruɑ sɔɔ.
12 Adɑmɑ wee Sɑdɑki kɑ Mɛsɑki kɑ Abɛnɛgo, Yuu be ɑ kuɑ Bɑbilonin tem berɑn wirugibu mi, bɑ ǹ wunɛn woodɑ ye gɑrisi gɑ̃ɑnu. Bɑ ku rɑ wunɛn bũnu sɑ̃. Mɛyɑ bɑ ǹ mɑɑ yiire bɑ wunɛn bwɑ̃ɑroku ge sɑ̃wɑ.
13 Ye sinɑ boko u gɑri yi nuɑ, yerɑ win mɔru yɑ seewɑ u nɛɛ, bu doo bu Sɑdɑki kɑ Mɛsɑki kɑ Abɛnɛgo mwɑɑmɑ. Mɑ bɑ dɑ bɑ bu mwɑɑmɑ bɑ kɑ nɑ wi, sinɑ bokon mi.
14 Mɑ sinɑ boko Nɛbukɑnɛsɑɑ u bu bikiɑ u nɛɛ, kɑ gem, i yinɑwɑ i nɛn bũnu kɑ nɛn bwɑ̃ɑroku wurɑguu ge nɑ kuɑ mi sɑ̃?
15 Tɛ̃, i doo i n sɔɔru sɑ̃ɑ. Ì n kpɑm nuɑ bɑ kɔbɑ so kɑ guunu kɑ mɔrɔkunu kɑ bɑrɑnu kɑ gɑ̃ɑsu kɑ bɑrɑ bwese ni nu tie, i yiiro kpɑ i bwɑ̃ɑroku ge sɑ̃. Ì n yinɑ, bɑ koo bɛɛ kpɛ̃ɛwɑ mii mii dɔ̃ɔ boko wi bɑ sɔ̃ruɑ sɔɔ kpɑ n wɑ ǹ n bũu weren nɑ u koo bɛɛ wɔrɑ sɑɑ nɛn nɔmun di.
16 Sɑdɑki kɑ Mɛsɑki kɑ Abɛnɛgo bɑ nùn wisɑ bɑ nɛɛ, yinni, sɑ ǹ kɑ tii yinɑmɔ.
17 À n sun kpɛ̃ɛ dɔ̃ɔ boko wi sɔɔ, Gusunɔ wi sɑ sɑ̃ɑmɔ u koo kpĩ u sun yɑrɑ dɔ̃ɔ win min di kpɑ u sun wɔrɑ wunɛn nɔmɑn di.
18 Bɑɑ ǹ n mɛren nɑ, ɑ n yɛ̃ mɑ sɑ ǹ wunɛn bũnu sɑ̃ɑmɔ. Mɛyɑ sɑ ǹ mɑɑ wunɛn bwɑ̃ɑroku ge yiirɑmmɛ.
19 Ye u ben gɑri yi nuɑ, yerɑ u kɑ bu mɔru kuɑ. Mɑ u geruɑ u nɛɛ, bu dɔ̃ɔ win kpɑ̃ɑru sosio gem gem.
20 Mɑ u durɔ gbebunu gɔsɑ win tɑbu kowobu sɔɔ be bɑ dɑm bo u nɛɛ, bu Sɑdɑki kɑ Mɛsɑki kɑ Abɛnɛgo bɔkuo bu kpɛ̃ɛ dɔ̃ɔ boko wi sɔɔ.
21 Yerɑ bɑ tɔn be mwɑ bɑ bɔkuɑ, mɑ bɑ bu kpɛ̃ɛ dɔ̃ɔ boko wi sɔɔ kɑ ben yɑ̃ɑ ni bɑ doke sɑnnu. Niyɑ ben yɑbenu kɑ ben sokoto kɑ sere mɑɑ ben furɔsu.
22 Mɑ bɑ dɔ̃ɔ win kpɑ̃ɑru sosi nge mɛ sinɑ bokon woodɑ dɑmgiɑ ye, yɑ geruɑ. Yerɑ dɔ̃ɔ win yɑm susurɑ tɑbu durɔ be go be bɑ Sɑdɑki kɑ Mɛsɑki kɑ Abɛnɛgo kpɛ̃ɛbu dɑ mi.
23 Mɑ Sɑdɑki kɑ Mɛsɑki kɑ Abɛnɛgo bɑ wɔri dɔ̃ɔ boko wi sɔɔ nge mɛ bɑ kɑ bu bɔkuɑ.
Dɑniɛlin kpɑɑsibu itɑ be,
bɑ ǹ dɔ̃ɔ mwɑɑre
24 Yerɑ sinɑ boko Nɛbukɑnɛsɑɑ u nɑndɑ mɑ u seewɑ fiɑ u be bɑ rɑ nùn bwisi kɛ̃ bikiɑ u nɛɛ, n ǹ tɔmbu itɑwɑ sɑ bɔkuɑ sɑ kpɛ̃ɛ dɔ̃ɔ boko wi sɔɔ?
Bɑ nùn wisɑ bɑ nɛɛ, oo, mɛyɑ.
25 Mɑ u bu wisɑ u nɛɛ, wee tɔmbu nnɛwɑ nɑ wɑɑmɔ bɑ sĩimɔ dɔ̃ɔ boko win suunu sɔɔ. Bɑ ǹ dɔ̃ɔ mwɑɑre. Be kpuro bɑ mɑɑ kusiɑrewɑ mɑ ben nnɛse u kɑ wɔllun tɔnu weenɛ.
26 Sɑɑ ye sɔɔrɑ Nɛbukɑnɛsɑɑ u susi dɔ̃ɔ boko win bɔkuɔ u nɛɛ, Sɑdɑki, Mɛsɑki, Abɛnɛgo, bɛɛ Wɔrukoon sɔm kowobu, i yɑrimɑ i nɑ mini.
Mɑ bɑ yɑrɑ dɔ̃ɔ boko win min di.
27 Yerɑ wirugii be sinɑ boko u rɑɑ sokɑ bɑ mɛnnɑ mi, be kpuro bɑ wɑ mɑ dɔ̃ɔ kun dɑm mɔ durɔ be sɔɔ. Mɛyɑ bɑɑ ben seri tiɑ yɑ ǹ dɔ̃ɔ mwɑɑre. Ben yɑ̃ɑ ni bɑ sebuɑ nu ǹ dɔ̃ɔ numiɛ.
28 Mɑ Nɛbukɑnɛsɑɑ u nɔɔgiru suɑ u nɛɛ, i Gusunɔ siɑro wi u sɑ̃ɑ Sɑdɑki kɑ Mɛsɑki kɑ Abɛnɛgon Yinni. Domi wiyɑ u win gɔrɑdo gɔrimɑ u kɑ win bwɑ̃ɑ be bɑ nùn nɑɑnɛ kuɑ mi fɑɑbɑ ko. Bɑ nɛ sinɑ bokon woodɑ yinɑ, bɑ ǹ ben wɑsin wɑhɑlɑ gɑrisi gɑ̃ɑnu. Bɑ yinɑ bu bũu goo sɑ̃ mɑ n kun mɔ Gusunɔ.
29 Tɛ̃ woodɑ ye nɑ wɛ̃ɛmɔ wee, tɔnu bɑɑwure bɑɑ ǹ n bwese teren nɑ u sɑ̃ɑ, mɑ u Gusunɔ, Sɑdɑki kɑ Mɛsɑki kɑ Abɛnɛgon Yinni gɑri kɑm gerusi, nɑ kon de bu yɛ̃ro bɔtiriwɑ, kpɑ win yɛnu gu ko bɑnsu. Domi goo mɑɑ sɑri wi u koo kpĩ u tɔnu fɑɑbɑ ko nge mɛ.
30 Yenibɑn biru, sinɑ boko Nɛbukɑnɛsɑɑ u Sɑdɑki kɑ Mɛsɑki kɑ Abɛnɛgo ɑye bɑkɑnu wɛ̃ Bɑbilonin tem berɑ mi.
Nɛbukɑnɛsɑɑn dosu yiruse
31 Sinɑ boko Nɛbukɑnɛsɑɑ u bwese ni nu wɑ̃ɑ hɑnduniɑ sɔɔ kpuro tɔburɑ u nɛɛ, Gusunɔ u de i n ɑlɑfiɑ mɔ.
32 N mɑn wɛ̃re n kɑ bɛɛ sɔ̃ yĩrenu kɑ mɑɑmɑɑki be Wɔrukoo u mɑn sɔ̃ɔsi.
33 Win yĩre ni, nu kpɑ̃.
Mɑɑmɑɑki ye, win sinɑrɑ.
Win bɑndɑ kun kpeemɔ.
U ko n sɑ̃ɑwɑ sunɔ sere kɑ bɑɑdommɑɔ.