8
Dɑniɛli u yɑ̃ɑ kinɛru
kɑ boo wɑ kɑ̃siru sɔɔ
1 Bɛɛsɑsɑɑn bɑndun wɔ̃ɔ itɑse sɔɔ, nɛ Dɑniɛli nɑ kɑ̃siru wɑ te nɑ rɑɑ wɑ bɑɑsi.
2 Sɑnɑm mɛ nɑ kɑ̃si te mɛɛrɑ n mɑn sɑ̃ɑre nɑ wɑ̃ɑ wuu bɔkɔ ge bɑ mɔ̀ Susiɔ Elɑmun temɔ. Mɑ n sɑ̃ɑre nɑ wɑ̃ɑ dɑɑ te bɑ mɔ̀ Ulɑin bɔkuɔ.
3 Ye nɑ nɔni seeyɑ nɑ mɛɛrɑ, yerɑ nɑ yɑ̃ɑ kinɛru wɑ tɑ kɔbu bɑkɑnu yiru mɔ tɑ yɔ̃ dɑɑ ten dee deeru. Kɔbu teeru tɑ teeru dɛ̃ɛbu kere. Te tɑ dɛ̃ɛbu bo mi, terɑ tɑ kpiɑ dɑ̃kuru.
4 Yerɑ yɑ̃ɑ kinɛ te, tɑ ten kɔbi soomɔ sɔ̃ɔ duu yeru giɑ kɑ sɔ̃ɔ yɛ̃sɑn nɔm geu giɑ kɑ sɔ̃ɔ yɛ̃sɑn nɔm dwɑru giɑ. Yɑɑ gɑɑ sɑri ye yɑ koo kɑ tu gɑbirinɑ. Goo mɑɑ sɑri wi u koo ten yibɛrɛ wɔrɑ ten nɔmɑn di. Tɑ mɔ̀wɑ ye tɑ kĩ. Mɑ tɑ kpɛ̃ɑmɔ tɑ dɑm mɔ̀.
5 Sɑnɑm mɛ nɑ lɑɑkɑri mɔ̀, yerɑ nɑ mɛɛrɑ mɑ nɑ boo wɑ gɑ yɑrimɑ sɑɑ sɔ̃ɔ duu yeru giɑn di kɑ duki bɑkɑ gɑ tem bɔsu mɑ n sɑ̃ɑre gɑ ǹ tem dɛke. Boo ge, gɑ kɔbɑ nɑnumgiɑ mɔ gen nɔnin bɑɑ sɔɔ.
6 Mɑ gɑ turɑ sere yɑ̃ɑ kinɛ ten mi, te nɑ rɑɑ wɑ kɑ kɔbi yiru mi, tɑ yɔ̃ dɑɑ ten dee deeru. Mɑ gɑ yɑ̃ɑ kinɛ te gure kɑ gen dɑm kpuro.
7 Nɑ gu wɑ gɑ yɑ̃ɑ te susi kɑ mɔru gɑ tu so gɑ kɔbi bɔɔkɑ. Yɑ̃ɑ te, tɑ kpɑnɑ tu kɑ tii yinɑ. Mɑ gɑ tu surɑ temɔ gɑ yɑsisimɔ. Goo sɑri wi u tu wɔrɑ gen nɔmɑn di.
8 Mɑ boo ge, gɑ kpɛ̃ɑ. Ye gɑ kpɛ̃ɑ gɑ kpɑ, yerɑ kɔbɑ bɑkɑ ye, yɑ bɔɔrɑ. Kɔbɑ yen ɑyerɔwɑ kɔbi nnɛ nɑnumgii yi kpiɑ. Mɑ yi mɛɛrɑ hɑnduniɑn goonu nnɛ kpuro sɔɔ, yen bɑɑyere goo teeru giɑ.
9 Sɑɑ kɔbi yin tiɑn di, kɔbu piibu gɑgɑ yɑrɑ gɑ kpɛ̃ɑ sɔ̃ɔ yɛ̃sɑn nɔm dwɑru giɑ kɑ sɔ̃ɔ yɑri yeru giɑ kɑ sere tem mɛ mu geɑ bo giɑ.
10 Mɑ gɑ seewɑ gɑ wɔllun tɑbu kowobu girɑri mɑ gɑ ben sukum kɑ kperi sururɑ temɔ gɑ tɑɑkɑ.
11 Mɑ gɑ mɑɑ seewɑ gɑ tɑbu kowo ben guro guro seesi. Mɑ gɑ bururu bɑɑteren yɑ̃ku te bɑ rɑ nùn kue yɔ̃rɑsiɑ. Mɑ gɑ win sɑ̃ɑ yeru kɔsukɑ.
12 Gɑ wɔllun tɑbu kowobu kɑ bɑɑdommɑn yɑ̃kunu nɔmɑ doke gɑ kɑmiɑ torɑnun sɔ̃. Mɑ gɑ gem kɑsɑ kuɑ temɔ. Ye gɑ bwisikɑ gu ko kpuro, yɑ gu koorɑwɑ.
13 Mɑ nɑ tɔn dɛɛro goon gɑri nuɑ. Yen biruwɑ tɔn dɛɛro goo u gbiikoo wi bikiɑ u nɛɛ, sere sɑɑ yerɑ̀ bɑ ko n bɑɑdommɑn yɑ̃ku ten kobu yɔ̃rɑsie. Sere sɑɑ yerɑ̀ kɑm kobu ko n wɑ̃ɑ gem sɑrirun sɔ̃. Sere sɑɑ yerɑ̀ sɑ̃ɑ yee te, tɑ ko n disi duure mɛsum. Sere sɑɑ yerɑ̀ bɑ ko n wɔllun tɑbu kowo be tɑɑkumɔ.
14 Mɑ gbiikoo wi, u wisɑ u nɛɛ, sere tɔ̃nu nɔrɔbun subɑ yiru kɑ goobɑ wunɔbun (2.300) bɑɑ yɑ̀ n doonɑ. Yen biruwɑ yɑ̃ku yee te, tɑ koo wurɑmɑ tɑ n dɛɛre nge yellu.
Kɑ̃si ten tubusiɑnu
15 Sɑnɑm mɛ nɛ Dɑniɛli nɑ kɑ̃si te wɑɑmɔ, mɑ nɑ kɑsu tu mɑn yeeri, yerɑ nɑ gɑ̃ɑnu wɑ nu kɑ tɔnu weenɛ nu yɔ̃ nɛn wuswɑɑɔ.
16 Mɑ nɑ mɑɑ goon nɔɔ nuɑ dɑɑ te bɑ mɔ̀ Ulɑin suunun di. U nɔɔgiru suɑ u nɛɛ, Gɑbiriɛ, ɑ durɔ wini kɑ̃si te tubusio.
17 Mɑ u mɑn susimɑ. Ye u mɑn turuku koomɑ, yerɑ bɛrum mɑn mwɑ. Mɑ nɑ wɔrumɑ temɔ. U mɑn sɔ̃ɔwɑ u nɛɛ, tɔnun bii, ɑ de yi nun yeeri. Kɑ̃si te, tɑ wɑ̃ɑwɑ sɑnɑm dɑ̃ɑkim sɔ̃.
18 Sɑnɑm mɛ u kɑ mɑn gɑri mɔ̀, yerɑ biti bɑkɑ mɑn mwɑ. Mɑ nɑ siriru tem girɑri. U mɑn bɑbɑ u seeyɑ u yɔ̃rɑsiɑ mi nɑ rɑɑ wɑ̃ɑ.
19 Yen biru, u mɑɑ mɑn sɔ̃ɔwɑ u nɛɛ, wee kon nun sɔ̃ ye yɑ koo nɑ Yinni Gusunɔn mɔrun tɔ̃ru sɔɔ sɑnɑm dɑ̃ɑkim sɔɔ.
20 Yɑ̃ɑ kinɛ te ɑ wɑ tɑ kɔbi yiru mɔ mi, tɑ sɑ̃ɑwɑ Mɛdibɑ kɑ Pɛɛsibɑn sinɑmbu.
21 Boo ge, gɑ sɑ̃ɑwɑ Gɛrɛsin sunɔ. Kɔbɑ bɑkɑ ye yɑ bɔɔkirɑ mi, yɑ sɑ̃ɑwɑ sunɔ gbiikoo.
22 Kɔbɑ nnɛ ye yɑ kpiɑ bɑkɑ ye yɑ bɔɔkirɑn min di, yɑ sɑ̃ɑwɑ sinɑmbu nnɛ gɑbu be bɑ koo yɑri sunɔ gbiikoo win min di. Adɑmɑ bɑ ǹ dɑm wɑsi nge wi.
23 Sinɑmbu nnɛ yen bɑndu tɑ̀ n kpɑ, mɑ bɑ durumgibu kpeerɑsiɑ, sunɔ goo u koo yɑri u tii suɑ kpɑ u n tɔmbu nɔni wɔ̃kubu yɛ̃.
24 Win dɑm mu koo nuuru ko n ǹ mɔ kɑ win tiin dɑm. U koo gɑ̃ɑ dɑbinu kɑm koosiɑ ye yɑ ǹ kɑ nɔɔ gerurɔ. Win ye u mɔ̀ kpuro yɑ koo nùn koorɑ. U koo bwese dɑmginu go kɑ mɑɑ Gusunɔn tɔmbu.
25 U koo tii suɑ win dukiɑn sɔ̃ kɑ win bwisin sɔ̃. U koo tɔn dɑbinu go be bɑ wɑ̃ɑ bɔri yɛndu sɔɔ. U koo mɑm sinɑ boko seesi. Adɑmɑ u koo kɔsikirɑ goo u kun nùn bɑbe.
26 Kɑ̃si te ɑ wɑ tɔ̃nu nɔrɔbun subɑ yiru kɑ goobɑ wunɔbun (2.300) sɔ̃, tɑ sɑ̃ɑwɑ gem. A ye nɛnuɔ ɑsiri sɔɔ. Domi yɑ wɑ̃ɑwɑ sɑnɑm dɑ̃ɑkim sɔ̃.
27 Mɑ nɛ Dɑniɛli nɑ kuɑ sɔ̃ɔ dɑbiru nɑ bɑrɔ. Nɑ ǹ dɑm mɔ. Yen biruwɑ nɑ seewɑ nɑ nɛn sɔmburu mɔ̀ te sinɑ boko u mɑn wɛ̃. Mɑ nɑ wɑ̃ɑ nɑndɑbu sɔɔ kɑ̃si ten sɔ̃. Domi tɑ ǹ mɑn yeeri.